ជាតិ
ព្រះបរមរាជវាំង ផ្អាកព្រះរាជពិធីត្រស្ដិសង្ក្រាន្ត រូបពី Royal du Cambodia
× ភ្នំពេញ៖ ព្រះបរមរាជវាំងនឹងផ្អាកការរៀបចំ ព្រះរាជពិធីត្រស្ដិសង្ក្រាន្ត(ភាណយក្យ) ដែលនឹងប្រារព្ធនៅព្រះបរមរាជវាំង ចាប់ពីថ្ងៃសុក្រ ១២រោច ដល់ថ្ងៃចន្ទ១៥រោច ត្រូវនឹងថ្ងៃទី២០-២៣ ខែមីនា ឆ្នាំ២០២០។ នេះបើតាមសេចក្ដីជួនដំណឹង របស់ក្រសួងព្រះបរមរាជវាំង។
សេចក្ដីជូនដំណឹងនេះ ធ្វើឡើងក្រោយពី ក្រសួងសុខាភិបាល ប្រកាសបិទនូវរាល់ការជួបជុំបែបសាសនាគ្រប់បែបយ៉ាង នៅទូទាំងប្រទេសក្នុងស្ថានភាពជំងឺកូវីដ១៩ កំពុងតែរីករាលដាល ដែលសេចក្ដីប្រកាសនោះចុះថ្ងៃទី១៧ ខែមីនា ឆ្នាំ២០២០។
តាមឯកសារ ព្រះរាជពិធីត្រស្តិសង្ក្រាន្ត ជាព្រះរាជពិធីសូត្រមន្តរំដោះព្រះគ្រោះចម្រើនព្រះសិរីសួស្តីរបស់ព្រះរាជបល្ល័ង្ក ដូចពិធីសូត្រមន្ត ឬចម្រើនព្រះបរត្តិធម្មតា តែមានរបៀបរៀបចំធំជាង ព្រោះជាព្រះរាជពិធីព្រះមហាក្សត្រ ហើយ១ឆ្នាំត្រូវធ្វើតែម្តងនៅវេលាដាច់ឆ្នាំ។ តាមទម្លាប់អ្នកស្រុក គេចូលចិត្តហៅថា ព្រះរាជពិធីសូត្រភាណយក្ស។
រៀងរាល់ឆ្នាំ ព្រះរាជពិធីត្រស្តិសង្ក្រាន្ត ប្រព្រឹត្តនៅថ្ងៃ ១២ - ១៣ -១៤-១៥ រោច ខែ ក្នុងព្រះបរមរាជវាំង។ ព្រះរាជពិធីនេះតែងធ្វើនៅក្នុងព្រះទីនាំង ទេវាវិនិច្ឆ័យ និងក្នុងរោងមណ្ឌលទាំង ៥ ខាង ក្រៅកំពែងព្រះបរមរាជវាំង ជាកិច្ចជូនដំណើរឆ្នាំចាស់ដែលត្រូវចេញទៅ ទទួលឆ្នាំថ្មីដែលត្រូវចូលមក នឹងបំបាត់ឧបទ្រព្យចង្រៃក្នុងឆ្នាំចាស់ឲ្យអស់ទៅ អញ្ជើញទេវតាឆ្នាំថ្មីឲ្យចូល មកចម្រើន សិរីសួស្តីជ័យមង្គលមហាប្រសើរ ចំពោះព្រះរាជបល្ល័ង្ក និងដល់ ប្រជាពលរដ្ឋទូទាំងព្រះរាជាណាចក្រកម្ពុជា ។
ព្រះរាជពិធីនេះ មានឈ្មោះហៅច្រើនយ៉ាង គឺហៅថា ព្រះរាជពិធីត្រស្តិសង្ក្រាន្តក៏បាន ថាព្រះរាជពិធីបញ្ជាន់ត្រស្តិក៏បាន ថាព្រះរាជពិធី សម្ពច្ឆរច្ឆិន្ទក៏បាន ថាព្រះរាជពិធីសូត្រភាណយក្សក៏បាន, តែក្នុងផ្លូវការ ហៅថា ព្រះរាជពិធីត្រស្តិសង្ក្រាន្ត។
ពាក្យថា ត្រសិ្ត ឬ ត្រុដិ ប្រែថា ការកាត់ ការផ្តាច់ ពាក្យថា សម្ពច្ឆរច្ឆិន្ទ ប្រែថា ការផ្តាច់ឆ្នាំ គឺការជូនដំណើរឆ្នាំចាស់ ទទួលដំណើរឆ្នាំថ្មី, ឯពាក្យថា សូត្រភាណយក្ស គឺសូត្រអាដានាដិយបរិត្តបណ្តេញយក្ស ខ្មោចបិសាច ហើយនឹងពាក្យថា បញ្ជាន់ត្រស្តិ គឺបញ្ជាន់បណ្តេញខ្មោចបិសាចឆ្នាំចាស់ឲ្យ បរវៀសជៀសឆ្ងាយទៅ ។
រួមពាក្យទាំងអស់នេះ បានសេចក្តីថា ព្រះរាជពិធី ដែលធ្វើនៅថ្ងៃ ១២ - ១៣ - ១៤ - ១៥ រោច ខែផល្គុន ជាព្រះរាជពិធីជូន ដំណើរឆ្នាំចាស់ ដែលត្រូវផុតទៅនៅថ្ងៃ ១៥ រោចខែផល្គុន ទទួលដំណើរ ឆ្នាំថី្ម ដែលត្រូវធ្វើដំណើរចូលមកនៅថ្ងៃ ១ កើត ខែចេត្រ ព្រោះថា តាំងពីថ្ងៃ ១ កើត ខែចេត្រទៅ លោករាប់ថាជាឆ្នាំថ្មីហើយ គ្រាន់តែមិនទាន់ឡើងស័ក ប៉ុណ្ណោះ៕
Tag:
ព្រះបរមរាជវាំង
ព្រះរាជពិធី
ត្រស្ដិសង្ក្រាន្ត
សង្ក្រាន្ត
© រក្សាសិទ្ធិដោយ thmeythmey.com