COVID-19
កីឡាអន្តរជាតិ
អន្តរជាតិ
Premier League ប្ដេជ្ញាបន្តប្រកួតដល់ចប់រដូវកាល ទោះ COVID-19 នៅតែរាលដាល
× ក្របខណ្ឌ Premier League ប្តេជ្ញាត្រឡប់ចូលការប្រកួតជាធម្មតាវិញដើម្បីបញ្ចប់រដូវកាល ២០១៩-២០ នេះ បើទោះ COVID-19 នៅតែរាលដាលក្តី។ ការលើកឡើងបែបនេះ ធ្វើឡើងក្នុងកិច្ចប្រជុំបន្ទាន់របស់គណៈគ្រប់គ្រង Premier League នៅថ្ងៃទី១៩ ខែមីនានេះ តាមរយៈសន្និសីទតាមវីដេអូ។
ដោយសារតែរោគឆ្លង COVID-19 បានបង្ខំឲ្យការប្រកួតទាំងអស់គ្រប់កម្រិតនៃលីគបាល់ទាត់នៅអង់គ្លេសត្រូវប្រកាសផ្អាករហូតដល់ថ្ងៃទី៤ ខែមេសា និងបន្ថែមការពន្យារពេលមួយកម្រិតទៀតរហូតដល់ថ្ងៃទី៣០ ខែមេសា។
ស្របពេលការរាតត្បាតកាន់តែខ្លាំងនៃជំងឺរលាកសួតបង្កដោយកូរ៉ូណាវីរុសប្រភេទថ្មីនេះ គេរំពឹងថាការពន្យារពេលប្រកួតនឹងបន្តយូរជាងនេះក្នុងរយៈពេលជាច្រើនសប្តាហ៍ទៅមុខទៀត។ បើទោះបីក្លិបនានាមិនកំណត់កាលបរិច្ឆេទច្បាស់លាស់ ប៉ុន្តែពួកគេសង្ឃឹមថានឹងបន្តការប្រកួតនេះឡើងវិញដើម្បីបញ្ចប់រដូវកាលនេះ។
ការពន្យារពេលប្រកួត Euro ឆ្នាំ ២០២០ គឺដើម្បីបើកទ្វារឲ្យការប្រកួតលីគក្នុងស្រុកបញ្ចប់ទៅតាមកាលកំណត់នៅចុងខែមិថុនា។ រហូតមកទល់ពេលនេះ មិនត្រឹមតែប្រជាជនទេដែលឆ្លង កីឡាករបាល់ទាត់នៅអឺរ៉ុបមួយចំនួនក៏កើត COVID-19 នេះដែរ។
ប្រសិនបើការរឹតត្បិតលើការប្រមូលផ្តុំមនុស្សច្រើនដែលដាក់ចេញដោយរដ្ឋាភិបាលអង់គ្លេសនៅតែបន្ត នោះ Premier League នឹងតម្រូវឲ្យមានការប្រកួតដោយបិទទ្វារកីឡដ្ឋានដើម្បីបញ្ចប់រដូវកាល ២០១៩-២០ នេះតែម្តង។
Liverpool ជាក្រុមរំពឹងខ្ពស់បំផុតក្នុងការលើកពានលីគកំពូលអង់គ្លេសរដូវកាលនេះ និងជាការលើកពានក្នុងស្រុកលើកដំបូងក្នុងរយៈពេល៣០ឆ្នាំចុងក្រោយ។ ក្រោមការដឹកនាំរបស់លោក Jürgen Klopp ហង្សក្រហមមានពិន្ទុនាំមុខដាច់រហូតដល់២៥ពិន្ទុ ខណៈនៅសល់៩ប្រកួតទៀតនឹងបញ្ចប់រដូវកាលនេះតែម្តង។
គិតត្រឹមថ្ងៃទី១៩ ខែមីនា នេះ ចក្រភពអង់គ្លេសមានអ្នកឆ្លង COVID-19 ចំនួន ២៦២៦នាក់ ស្លាប់១០៤នាក់ និងសះស្បើយ៦៥នាក់៕
Tag:
COVID-19
Premier League
© រក្សាសិទ្ធិដោយ thmeythmey.com