COVID-19
អន្តរជាតិ
ករណីឆ្លងនៅថៃកើនដល់៣២២ បន្ទាប់ពីរកឃើញអ្នកផ្ទុក COVID-19 ៥០នាក់ទៀត រូបភាព៖ AFP
× ថៃ នារសៀលថ្ងៃទី២០ ខែមីនា បានរកឃើញករណីឆ្លងជំងឺរលាកសួត ដែលបង្កដោយកូរ៉ូណាវីរុស (COVID-19) បន្ថែមទៀត។ ករណីឆ្លងថ្មីនេះ ភាគច្រើននៅតែមានពាក់ព័ន្ធជាមួយកន្លែងប្រដាល់ កន្លែងកម្សាន្ត។
បើតាមការប្រកាសរបស់ក្រសួងសុខាភិបាល ថៃបានរកឃើញអ្នកផ្ទុក COVID-19 ចំនួន ៥០ករណីបន្ថែមទៀត។ ក្នុងចំនួននេះ ៤១ករណី គឺមានទាក់ទងទៅនឹងកន្លែងប្រដាល់ និងកន្លែងកម្សាន្ត។ ចំណែក ៩ករណីទៀត គឺជាករណីថ្មី ដែលមិនមានពាក់ព័ន្ធនឹងករណីមុនៗ។ ករណីសរុប COVID-19 ថៃកើន ដល់ ៣២២ករណី អ្នកស្លាប់ ១ករណី និងអ្នកជាសះស្បើយ ៤២ករណី។
តាមរបាយការណ៍របស់ក្រសួងសុខាភិបាលថៃ ក្នុងចំនួនអ្នកជំងឺ COVID-19 សរុប គឺបុរសមានចំនួន ៦៦ភាគរយ។ មនុស្សអាយុចាប់ពី៣០ឆ្នាំ ដល់៣៩ឆ្នាំ គឺមានចំនួនអ្នកផ្ទុក COVID-19 ច្រើនជាងគេរហូតដល់ ៧៩នាក់។ ចំនួនអ្នកជំងឺមានអាយុចាប់ពី២០ឆ្នាំ ដល់ ២៩ឆ្នាំមាន ៥១នាក់។ ក្នុងរបាយការណ៍ដដែលនេះ បានបញ្ជាក់ថា អ្នកជំងឺ៨០ភាគរយ គឺត្រូវបានរកឃើញក្នុងទីក្រុងបាងកក។
សូមបញ្ជាក់ថា គិតត្រឹមរសៀលថ្ងៃទី២០ ខែមីនានេះ ថៃ គឺជាប្រទេសទីបី ក្នុងតំបន់អាស៊ីអាគ្នេយ៍ ដែលរកឃើញ COVID-19 ច្រើនជាងគេ បន្ទាប់ពីម៉ាឡេស៊ី និងសិង្ហបុរី៕
© រក្សាសិទ្ធិដោយ thmeythmey.com