អាជ្ញាធរសុខាភិបាលអាមេរិក៖ កន្សែង និងក្រមាបង់កអាចប្រើបានក្នុងករណីខ្វះម៉ាស់

COVID-19

អន្តរជាតិ

អាជ្ញាធរសុខាភិបាលអាមេរិក៖ កន្សែង និងក្រមាបង់កអាចប្រើបានក្នុងករណីខ្វះម៉ាស់

20, Mar 2020 , 7:39 pm

រូបភាព

ដោយ:

អាជ្ញាធរសុខាភិបាលអាមេរិក បានប្រាប់បុគ្គលិកសុខាភិបាលរបស់ខ្លួនថា ពួកគេអាចប្រើកន្សែង និងក្រមាបង់ការបានក្នុងករណីអាសន្នពេលខ្វះខាតម៉ាស់អំឡុងពេលប្រឈមមុខនឹងជំងឺ COVID-19។ នេះជាផ្នែកមួយនៃវិធានការរបស់មជ្ឈមណ្ឌលគ្រប់គ្រង និងការពារជំងឺឆ្លងរបស់សហរដ្ឋអាមេរិក (CDC) ដែលដាក់ឲ្យអនុវត្តនៅកម្រិតសហព័ន្ធ រដ្ឋ និងបុគ្គលិកសុខាភិបាលទូទាំងប្រទេស។

មជ្ឈមណ្ឌលគ្រប់គ្រង និងការពារជំងឺឆ្លងរបស់សហរដ្ឋអាមេរិក (CDC) លើកឡើងថា ក្នុងករណីដែលមិនមានម៉ាស់ និងគ្មានជម្រើសដទៃទៀត បុគ្គលិកសុខាភិបាល អាចប្រើម៉ាស់ដែលធ្វើដោយខ្លួនឯងបាន (កន្សែង និងក្រមាបង់ក) ក្នុងពេលដែលត្រូវថែទាំអ្នកជំងឺ COVID-19 ។ ប៉ុន្តែការប្រើកន្សែង ឬក្រមានេះ ជាជម្រើសចុងក្រោយប៉ុណ្ណោះ។

យ៉ាងណាមិញ CDC បានបញ្ជាក់ថា៖ « គេត្រូវប្រុងប្រយ័ត្ន នៅពេលពិចារណាជ្រើសរើសជម្រើសនេះ ដោយហេតុតែសមត្ថភាពការពាររបស់វានៅមិនទាន់ដឹងនៅឡើយ»។ នេះបើតាមការផ្សាយរបស់ទីភ្នាក់ងារព័ត៌មាន AFP ។

ទាក់ទងរឿងម៉ាស់នេះ លោក ម៉ៃ ផេន អនុប្រធានាធិបតីអាមេរិកអះអាងថា ផលិតកម្មម៉ាស់កំពុងបង្កើនយ៉ាងរហ័សដោយក្រុមហ៊ុនឯកជនដើម្បីបំពេញតម្រូវការ។ ក្នុងសន្និសីទសារព័ត៌មានប្រចាំថ្ងៃនៅសេតវិមាន លោក ផេន បានបន្ថែមថា ក្រុមហ៊ុនឯកជននៅអាមេរិកបានបង្កើនការផលិតម៉ាស់ N95 ដល់ចំនួន ១០លាន។ ចំណែកឯក្រុមហ៊ុនមួយទៀតបានបង្កើនផលិតមកដល់ ៣៥លានក្នុងមួយខែ។

បន្ថែមពីនេះក្រុមហ៊ុនសំណង់ទូទាំប្រទេស ក៏បានបរិច្ចាគម៉ាស់សម្រាប់ឧស្សាហកម្មឲ្យទៅមន្ទីរពេទ្យផងដែរ។ នេះជាការបន្ថែមរបស់លោក ផេន ដែលទទួលបន្ទុកកិច្ចការដោះស្រាយការរាលដាលវីរុសប្រភេទថ្មី។

បើយោងតាមតួលេខប្រមូលដោយសកលវិទ្យាល័យ John Hopkin គិតត្រឹមថ្ងៃទី១៩ ខែមីនា ករណី COVID-19 នៅអាមេរិក មានចំនួន ១០,៧៥៥ ករណី ខណៈករណីស្លាប់មានចំនួន ១៥៤ ករណី៕