អន្តរជាតិ
×![]()
កាលពីព្រឹកថ្ងៃសុក្រ ២០មីនានេះ ឥណ្ឌាបានព្យួរកបុរស ៤នាក់ក្នុងករណីរំលោភនារីម្នាក់ក្នុងឡានក្រុងនៅក្នុងទីក្រុង ញូដេលី កាលពីឆ្នាំ២០១២។ ករណីនេះរំលោភនេះបណ្តាលឲ្យមានបាតុកម្មទូទាំងប្រទេស និងការស្អប់ខ្ពើមពីសហគមន៍អន្តរជាតិ។ 
លោក Sandeep Goel ប្រធានពន្ធនាគារ Tihar ក្បែរទីក្រុងញូវដេលីបានប្រាប់ទីភ្នាក់ងារព័ត៌មាន AFP ថាបុរសទាំង៤ខាងលើត្រូវបានព្យួរក តាំងតែពី ម៉ោង៥:៣០ ព្រឹកព្រលឹមថ្ងៃសុក្រនេះ។ ការព្យួរកនេះ គឺជាការប្រហារជីវិតលើកដំបូងក្នុងប្រទេសឥណ្ឌាគិតតាំងពីឆ្នាំ២០១៥មក។
ករណីរំលោភដ៏ព្រៃផ្សៃលើនិស្សិតពេទ្យ បណ្តាលឲ្យមានបាតុកម្មរាប់សប្តាហ៍នៅទូទាំងប្រទេស នឹងឆ្លុះបញ្ចាំងពីការបៀតបៀនផ្លូវភេទ និងគ្រោះថ្នាក់ដែលស្ត្រីឥណ្ឌាប្រឈមនៅក្នុងសង្គម។
ការព្យួរកប្រហាជីវិតនេះទទួលបានគាំទ្រ នៅក្នុងប្រទេសប្រជាធិបតេយ្យធំបំផុតមួយនេះ ខណៈមានការជួបជុំអបអរសាទរតូចមួយនៅក្រៅពន្ធនាគារ។ លោកស្រី Asha Devi ដែលជាម្តាយយុវតីរងគ្រោះបានប្រាប់អ្នកយកព័ត៍មានថា៖ « យើងពេញចិត្តដែលទីបំផុតទៅ កូនស្រីរបស់យើងទទួលបានយុត្តិធម៌ក្រោយពេលរង់ចាំជាង ៧ឆ្នាំមកនេះ»។
យុវតី Singh វ័យ ២៣ឆ្នាំត្រូវបាន បុរស៦នាក់រំលោភនៅលើឡានក្រុង ក្រោយពីនាងបានត្រឡប់ពីរោងភាពយន្តជាមួយមិត្តភ័ក្តិរបស់នាង កាលពីថ្ងៃ១២ ធ្នូ ឆ្នាំ២០១២។ នាងបានទទួលមរណៈភាព ១៣ថ្ងៃក្រោយ នៅមន្ទីរពេទ្យក្នុងប្រទេសសិង្ហបុរីក្រោយមានរបួសខាងក្នុងរាងកាយធ្ងន់ធ្ងរ។
គួរបញ្ជាក់ផងដែរថា ក្នុងឆ្នាំ២០១៨ របាយការណ៍ផ្លូវការរបស់អាជ្ញាធរបានបង្ហាញថាករណីរំលោភមានដល់ទៅ ៣៤,០០០ករណី ខណៈមនុស្សមួយចំនួនគិតថាវាមានចំនួនតិចណាស់ ត្បិតអីស្ត្រីរងគ្រោះនៅខ្លាចមិនហ៊ានរាយការណ៍ប្រាប់សមត្ថកិច្ច។ នៅឥណ្ឌា មានជនសង្ស័យក្នុងករណីរំលោភចំនួន ១៥០,០០០ ដែលរង់ចាំការកាត់ទោសពីតុលាការ ខណៈប្រព័ន្ធយុត្តិធម៌ឥណ្ឌាសឹងតែមិនដំណើការ៕
Tag:
ឥណ្ឌា
© រក្សាសិទ្ធិដោយ thmeythmey.com
