អន្តរជាតិ
អ្នកវិទ្យាសាស្ត្រអូស្ត្រាលី សិក្សាពីរបៀបដែលខ្លួនមនុស្សប្រយុទ្ធនឹងCOVID-19
× ក្រុមអ្នកវិទ្យាសាស្ត្រនៅឯប្រទេសអូស្ត្រាលី បាននិយាយថាពួកគេរកឃើញវិធីសាស្ត្រដែលប្រព័ន្ធកាពាររាង្គកាយ (immune system) របស់មនុស្សប្រយុទ្ធប្រឆាំងនឹងជំងឺផ្លូវដង្ហើម COVID-19 ដែលផ្ទុះឡើងដំបូងក្នុងប្រទេសចិន។ ការពិសោធរបស់ពួកគេ ដែលត្រូវបានចុះផ្សាយនៅក្នុង Nature Medicine Journal កាលពីថ្ងៃអង្គារសប្តាហ៍នេះ បានបង្ហាញថា មនុស្សជាច្រើន បាននិងកំពុងជាសះស្បើយពីវីរុសមួយនេះ ដូចជាការជាសះស្បើយពីជំងឺផ្តាសាយធំធម្មតាដែរ។
សារព័ត៌មានអង់គ្លេស BBC កាលពីថ្ងៃទី១៧ ខែមីនា បានចុះផ្សាយថា ការយល់ដឹងពីវត្តមាននៃប្រភេទប្រព័ន្ធការពាររបស់មនុស្សនៅពេលមានវីរុសចូលទៅក្នុងខ្លួន គឺជាវិធីសាស្ត្រដ៏សំខាន់មួយក្នុងការផលិតវ៉ាក់សាំងដែលមានប្រសិទ្ធភាព។
នៅជុំវិញពិភពលោក ប្រមាណជា១៦០ពាន់ករណីនៃការឆ្លងជំងឺ COVID-19 ត្រូវបានគេរកឃើញ ដែលក្នុងនោះមានអ្នកស្លាប់ប្រមាណជា៦៥០០នាក់។ សហអ្នកនិពន្ធនៃការសិក្សាស្រាវជ្រាវមួយនេះ សាស្ត្រាចារ្យនៃវិទ្យាស្ថាន Peter Doherty អ្នកស្រី Katherine Kedzierska បាននិយាយថា៖«ការរកឃើញនេះពិតជាសំខាន់ណាស់ ពីព្រោះនេះគឺជាលើកទីមួយហើយដែលយើងអាចតាមដានដឹងពីរបៀបដែលប្រព័ន្ធការពាររាង្គកាយរបស់មនុស្សប្រយុទ្ធប្រឆាំងជាមួយនឹងវីរុសកូរ៉ូណា»។
នៅពេលដែលមានមនុស្សជាសះស្បើយពីវីរុសមួយនេះ គេអាចដឹងបានថាខ្លួនប្រាណមនុស្សកំពុងតែប្រើប្រាស់ប្រព័ន្ធការពាររបស់ខ្លួនក្នុងការប្រយុទ្ធនឹងវីរុស។ អ្នកជំនាញបានធ្វើការត្រួតពិនិត្យអ្នកជំងឺដែលមានរោគសញ្ញាពីកម្រិតតិចតួចទៅកាន់កម្រិតមធ្យម។
តួយ៉ាង ស្ត្រីអាយុ៤៧ឆ្នាំមួយរូបមកពីទីក្រុងវូហាន បានមកស្នាក់នៅក្នុងមន្ទីរពេទ្យមួយនៅប្រទេសអូស្ត្រាលី។ ស្ត្រីមួយរូបនេះបានជាសះស្បើយឡើងវិញក្នុងរយៈពេល១៤ថ្ងៃ។ ការសិក្សាបានបញ្ជាក់ថា បីថ្ងៃមុនពេលដែលស្ត្រីម្នាក់នេះត្រៀមនឹងជាសះស្បើយ អ្នកជំនាញបានរកឃើញកោសិកាពិសេសម្យ៉ាងមកមានវត្តមាននៅក្នុងសរសៃឈាម។ បើនិយាយអំពីអ្នកដែលកើតមានជំងឺផ្តាសាយធំវិញ កោសិកាពិសេសនេះក៏មានវត្តមានក្នុងពេលវេលាប្រហាក់ប្រហែលគ្នាជាមួយនឹងអ្នកដែលផ្ទុកវីរុស COVID-19 នេះដែរ។
«ការដឹងពីពេលវេលា និងសកម្មភាពរបស់ប្រព័ន្ធការពាររាង្គកាយ អាចផ្តល់ជាតម្រុយឲ្យយើងដឹងពីសកម្មភាពរបស់វីរុសផងដែរ» នេះជាការលើកឡើងរបស់សាស្ត្រាចារ្យ Bruce Thompson នៃសកលវិទ្យាល័យបច្ចេកវិទ្យា Swinburne ។ លោកបានបន្តទៀតថា ការដឹងពីដំណាក់កាលនៃការប្រយុទ្ធរបស់ប្រព័ន្ធការពាររាង្គកាយ អាចធ្វើឲ្យយើងមានរូបភាពកាន់តែច្បាស់អំពីដំណាក់កាលនៃការជាសះស្បើយរបស់អ្នកជំងឺ។
ទាក់ទិននឹងរឿងនេះ រដ្ឋមន្ត្រីក្រសួងសុខាភិបាលអូស្ត្រាលីក៏បាននិយាយផងដែរថា ការរកឃើញនេះអាចពន្លឿនការផលិតវ៉ាក់សាំង និងវិធីព្យាបាលផ្សេងៗទៀតទៅកាន់អ្នកដែលកំពុងផ្ទុកវីរុស។ ទន្ទឹមនេះ សាស្ត្រាចារ្យ អ្នកស្រី Katherine ក៏បានបន្ថែមទៀតថា ជំហានបន្ទាប់នៃការសិក្សាគឺការពិនិត្យមើលទៅលើមូលហេតុដែលនាំឲ្យប្រព័ន្ធការពាររាង្គកាយចុះខ្សោយខ្លាំងនៅក្នុងដំណាក់កាលធ្ងន់ធ្ងរ។ ជាពិសេសគឺការកំណត់ភាពខុសគ្នារវាងអ្នកដែលបានជាសះស្បើយពីវីរុស និងអ្នកដែលបានទទួលភាពធ្ងន់ធ្ងរ ឬស្លាប់ដោយសារវីរុស៕
© រក្សាសិទ្ធិដោយ thmeythmey.com