COVID-19
ជាតិ
លោក កឹម សុខា ៖ សូមកុំបំភ្លៃព័ត៌មាន និងកុំលាក់បាំងព័ត៌មានពិត នៃCOVID-19
× ភ្នំពេញ៖ មេដឹកនាំអតីតគណបក្សសង្គ្រោះជាតិ លោក កឹម សុខា ស្នើឱ្យពលរដ្ឋរួមគ្នាទប់ស្កាត់វីរុសCOVID-19 ប្រសើរជាងបំភ្លៃព័ត៌មាន និងលាក់បាំងព័ត៌មានពិតជុំវិញបញ្ហាវីរុសនេះ។
«សាមគ្គីភាពជាតិ និងសាមគ្គីភាពអន្តរជាតិ” គឺជាការចាំបាច់ណាស់ ក្នុងការប្រយុទ្ធប្រឆាំងនឹងការរីករាលដាលជំងឺCovid-19 ដ៏សាហាវឃោឃៅនៅពេលនេះ។ ពីព្រោះគ្រោះអាសន្ននេះ មិនមែនជាបញ្ហារបស់បុគ្គលណា គ្រួសារណា សហគមន៍ណា ប្រទេសណា ជាតិសាសន៍ណាមួយនោះឡើយ វាក្លាយទៅជាវិបត្តិសកលទៅហើយ»។ នេះជាការលើកឡើងរបស់លោក កឹម សុខា។
តាមរយៈហ្វេសប៊ុកផ្លូវការខ្លួន មេដឹកនាំអតីតប្រឆាំងដែលកំពុងដំណើរនីតិវិធីក្តីក្ដាំរូបនេះ បានបញ្ជាក់ថា មនុស្សទាំងអស់ត្រូវរួមគ្នា ប្រយុទ្ធប្រឆាំងនឹងវីរុសCOVID-19នេះ ព្រោះវាមិនត្រឹមតែសម្លាប់ជីវិតមនុស្សទេ តែវាក៏បំផ្លាញដល់សេដ្ឋកិច្ច និងជីវភាពពលរដ្ឋទៀតផង។
លោក កឹម សុខា បានសរសេរដូច្នេះថា៖«ម្យ៉ាងទៀតវីរុសCovid-19នេះ វារាតត្បាតបង្ករជំងឺ និងសម្លាប់មនុស្សដោយមិនរើសមុខ មិនរើសអើង ជាតិសាសន៍ ប្រទេសតូចឬធំ ប្លុកកុម្មុនីស ឬសេរី អ្នកធំ អ្នកតូច អ្នកមានឬអ្នកក្រ...នោះឡើយ។ ជាពិសេសជំងឺរាតត្បាតនេះ មិនត្រឹមតែវាយប្រហារទៅលើសុខភាព និងអាយុជីវិតមនុស្សដោយផ្ទាល់នោះទេ លើសពីនេះទៅទៀត វាធ្វើឲ្យប៉ះពាល់ដល់សេដ្ឋកិច្ចពិភពលោក សេដ្ឋកិច្ចជាតិនិងជីវភាពរស់នៅរបស់មនុស្សទូទៅយ៉ាងធ្ងន់ធ្ងរ បើយើងមិនរួបរួមគ្នាប្រយុទ្ធយកឈ្នះលើវាឲ្យបានព្រមៗគ្នា និងឲ្យបានឆាប់រហ័សនោះទេ»។
មេដឹកនាំអតីតគណបក្សប្រឆាំងរូបនេះ ក៏ស្នើឱ្យពលរដ្ឋរួមគ្នាទប់ស្កាត់វីរុសCOVID-19 ដោយកុំប្រកាន់និន្នាការនយោបាយ និងកុំរើសអើងជាតិសាសន៍។ ជាពិសេសកុំបំភ្លៃ ឬបំប៉ោងពត៌មាន និងកុំលាក់បាំងព័ត៌មានពិតជុំវិញCOVID-19នេះ។បើតាមលោក កឹម សុខា ប្រជាពលរដ្ឋខ្មែរទាំងក្នុងនិងក្រៅប្រទេស ក៏ត្រូវចូលរួមសាមគ្គីជាតិ ឯកភាពជាតិ និង ផ្តល់អាទិភាពខ្ពស់ចំពោះការដោះស្រាយបញ្ហានេះដែរ។
គិតត្រឹមថ្ងៃទី២៣ មីនានេះ កម្ពុជា មានអ្នកឆ្លងវីរុសCOVID-19 ចំនួន៨៦នាក់ហើយ។
© រក្សាសិទ្ធិដោយ thmeythmey.com