COVID-19
អន្តរជាតិ
លោកស្រី Jacinda Ardern នាយករដ្ឋមន្ត្រីនូវែលសេឡង់-AFP
×![]()
លោកស្រី Jacinda Ardern នាយករដ្ឋមន្ត្រីនូវែលសេឡង់ នឹងដាក់ប្រទេសក្នុងស្ថានភាពអាសន្នកម្រិតខ្ពស់ ដោយសាលារៀន ការិយាល័យ និងសេវាកម្មមិនចាំបាច់មួយចំនួននឹងត្រូវបិទ ចាប់ពីថ្ងៃអង្គារ ទី២៤ មីនាតទៅ។ ចំណាត់ការនេះ នឹងរក្សាអនុវត្តយ៉ាងតិច ៤សប្តាហ៍ខាងមុខ។ 
ថ្លែងនៅសន្និសីទព័ត៌មានមួយ នៅថ្ងៃចន្ទ ២៣ ខែមីនានេះ លោកស្រីនាយករដ្ឋមន្ត្រី អះអាងថា រង្គសាល ហាងកាហ្វ ភោជនីយដ្ឋាន និងរោងភាពយន្តនានានឹងត្រូវបិទទ្វារ ខណៈឱសថស្ថាន និងហាងលក់ម្ហូបអាហារ នឹងត្រូវបន្តបើកដំណើរការធម្មតា។
ទំនិញ និងសម្ភារចាំបាច់សម្រាប់តម្រូវការប្រចាំថ្ងៃរបស់ពលរដ្ឋទាំងអស់នេះ នឹងមានការផ្គត់ផ្គង់គ្រប់គ្រាន់។ លោកស្រី Ardern សង្កត់ធ្ងន់បែបនេះ ដោយបន្ថែមដូច្នេះថា៖«នូវែលសេឡង់ កំពុងរៀបចំប្រទេសដើម្បីដាក់ឲ្យនៅដាច់ពីគេ»។
គួរបញ្ជាក់ផងដែរថា ចំនួនអ្នកឆ្លង COVID-19 បានកើនឡើងដល់ ១០០ករណីហើយ ក្រោយរកឃើញការឆ្លងថ្មីចំនួន ៣៦ករណី។ ក្នុងករណីឆ្លងខាងលើ មានករណីចំនួន២ ដែលជាការឆ្លងបែបសហគមន៍។ នេះជាការបន្ថែមរបស់លោកវេជ្ជបណ្ឌិត Ashley Bloomfield អគ្គនាយកសុខាភិបាលក្នុងសន្និសិទសារព័ត៍មានថ្ងៃចន្ទនេះ។ ខណៈករណីពាក់កណ្តាលទៀតទាក់ទងនឹងការធ្វើដំណើរទៅក្រៅប្រទេស។
នៅមុនការប្រកាសរបស់លោកស្រី Jacinda Ardern នាយករដ្ឋមន្ត្រីនូវែលសេឡង់ មេដឹកនាំគណបក្សប្រឆាំងបានសម្រេចផ្អាកយុទ្ធនាការផ្សព្វផ្សាយ ក្នុងការបោះឆ្នោតសកលនាថ្ងៃ ១៩ កញ្ញាខាងមុន។
«ព្រឹកនេះ ខ្ញុំបានស្នើឲ្យអ្នកតំណាងរាស្ត្ររបស់យើងផ្អាកយុទ្ធនាការផ្សព្វផ្សាយការបោះឆ្នោតគ្រប់ទម្រង់» នេះជាសម្តីលោក Simon Bridgesមេដឹកនាំអ្នកបក្សជាតិ ដែលជាបក្សប្រឆាំងដែលមានទំនោរ កណ្តាល និងស្តាំនិយម។
កាលពីគ្រាមុន លោក Bridges ដែលជាមេដឹកនាំគណបក្សប្រឆាំងបានទាមទារឲ្យរដ្ឋាភិបាលដាក់ប្រទេសក្នុងស្ថានភាពអាសន្នកម្រិតខ្ពស់បំផុត។ ដោយឡែក កាលពីសប្តាហ៍មុន នូវែលសេឡង់បានប្រកាសថាខ្លួននឹងបិទព្រំដែន មិនឲ្យជនបរទេសចូលប្រទេសខ្លួន ជាកិច្ចប្រឹងប្រែងក្នុងការរាំងខ្ទប់ការឆ្លងជំងឺកូរ៉ូណាវីរ៉ុស៕
© រក្សាសិទ្ធិដោយ thmeythmey.com
