ក្រសួងសាធារណការ ឱ្យក្រុមហ៊ុនដឹកអ្នកដំណើរ វាស់កម្ដៅនិងលាងដៃឲ្យភ្ញៀវ មុននឹងឡើងរថយន្ត

COVID-19

ជាតិ

រថយន្ត

23, Mar 2020 , 8:19 pm

រូបភាព

ដោយ: ឡាយ សុភាវតី

ភ្នំពេញ៖ ក្រសួងសាធារណការ និងដឹកជញ្ជូន បានណែនាំក្រុមហ៊ុនដឹកជញ្ជូនអ្នកដំណើរទាំងអស់ ពិនិត្យកម្ដៅ និងការលាងដៃជាមួយទឹកអាល់កុល មុននឹងអនុញ្ញាតឱ្យភ្ញៀវចូលក្នុងរថយន្ត ដើម្បីទប់ស្កាត់ការរាលដាលជំងឺ COVID-19។

ក្រៅពីនេះ សេចក្ដីណែនាំរបស់ក្រសួងសាធារណការ និងដឹកជញ្ជូន ចុះថ្ងៃទី២០ មីនា ក៏បានណែនាំឱ្យក្រុមហ៊ុនដឹកជញ្ជូនអ្នកដំណើរ រក្សាអនាម័យជានិច្ច ទាំងកន្លែងលក់សំបុត្រ កន្លែងរង់ចាំ និងកន្លែងទទួលទានអាហារជាដើម។ មិនត្រឹមតែប៉ុណ្ណោះ អ្នកបើកបរ និងបុគ្គលិកបម្រើការងារ ក៏តម្រូវឲ្យពាក់ម៉ាស់ក្នុងពេលបំបេញការងារ និងត្រួតពិនិត្យសុខភាពជាប្រចាំផងដែរ។ ក្នុងករណីមានបុគ្គលិក និងអ្នកដំណើរមានកម្ដៅលើសពី៣៧.២ អង្សា ក្អក បញ្ហាដង្ហើម មិនអនុញ្ញាតឱ្យជិះឡាន ឬមកបំពេញការងារនិងតម្រូវឱ្យទៅមណ្ឌលសុខភាពដែលនៅជិតបំផុតជាបន្ទាន់ និងហៅទូរស័ព្ទទៅលេខ ១១៥។ នេះជាខ្លឹមសារនៅក្នុងសេចក្តីណែនាំរបស់ក្រសួងសាធារណការ និងដឹកជញ្ជូន។

ទន្ទឹមនឹងនេះ ក្រសួងណែនាំឱ្យ ម្ចាស់ ឬអ្នកគ្រប់គ្រងរថយន្តដឹកអ្នកដំណើរ ប្រើប្រាស់អាល់កុល ឬសារធាតុសម្លាប់មេរោគ ជូតសម្អាតរាល់វត្ថុទាំងឡាយក្នុងឡានដូចជា របារតោង ភ្នាល់ដៃ កៅអីជាដើម ឱ្យបានញឹកញាប់តាមលទ្ធភាពដែលអាចធ្វើបាន។ ជាមួយគ្នានេះក្រសួង បានអំពាវនាវ ឱ្យក្រុមហ៊ុនដឹកអ្នកដំណើរ ក៏ដូចជាអ្នកដំណើរខ្លួនឯង ត្រូវរក្សាអនាម័យ និងអនុវត្តវិធានការបង្កាជំងឺឆ្លង នៅពេលធ្វើដំណើរ៕