ភ្នំពេញ៖ គណបក្សប្រជាធិបតេយ្យមូលដ្ឋាន(គ.ប.ម) ស្នើរដ្ឋាភិបាលជួយសម្រួលដល់ការដឹកជញ្ជូន និងរៀបចំកន្លែងស្នាក់នៅបណ្ដោះអាសន្នតាមព្រំដែន ដល់ប្រជាពលរដ្ឋខ្មែរ ដែលធ្វើការ និងរកស៊ីនៅប្រទេសថៃ ហើយសម្រុកចូលកម្ពុជាវិញ។ ពលរដ្ឋខ្មែរសម្រុកចូលមកកម្ពុជាវិញនេះ ក្រោយពីភាគីថៃបានប្រកាសបិទច្រកព្រំដែនជាមួយកម្ពុជា ដើម្បីទប់ស្កាត់និងបង្ការវីរុសCOVID-19។
គណបក្សប្រជាធិបតេយ្យមូលដ្ឋាន មើលឃើញថា រដ្ឋាភិបាលមិនទាន់ឆ្លើយតបទាន់ពេលវេលា ក្នុងការជួយសម្រួលដល់ពលរដ្ឋខ្មែរ ដែលសម្រុកចូលមកកម្ពុជាវិញឡើយ។ ប៉ុន្តែវាក៏មិនទាន់ហួសពេលដែរ បើសិនជារដ្ឋាភិបាល ដាក់ចេញចំណាត់ការ និងផែនការសមស្របជួយសម្រួលដល់ពលរដ្ឋខ្មែរ ជាពិសេសវិធានការទប់ស្កាត់វីរុសCOVID-19នេះ។
ត្រង់ចំណុចនេះគណបក្សប្រជាធិបតេយ្យមូលដ្ឋាន បានស្នើឱ្យរដ្ឋាភិបាលជួយសម្របសម្រួលការដឹកជញ្ជូន និងរៀបចំការស្នាក់នៅបណ្ដោះអាសន្នតាមតំបន់ជិតព្រំដែន ជាពិសេសជួយឧបត្ថម្ភជីវភាព និងធ្វើតេស្តពិនិត្យសុខភាពមុននឹងបន្តដំណើរទៅស្រុកកំណើតពួកគេ។ គ.ប.ម ក៏ស្នើឱ្យមានការរៀបចំទីកន្លែងស្នាក់នៅមួយកន្លែង ឬផ្ទះដាច់ដោយឡែកនៅតាមមូលដ្ឋានរបស់ពលករដែលត្រឡប់មកពីក្រៅប្រទេស ដោយរដ្ឋាភិបាលត្រូវមានគោលការណ៍ឧបត្ថម្ភដល់ពួកគេ រួមទាំងការពិនិត្យតាមដានសុខភាពឱ្យបានច្បាស់សិន មុននឹងអនុញ្ញាតឱ្យពួកគេអាចដើរចេញក្រៅធម្មតា។
កាលពីថ្ងៃទី២២ មីនា មានពលករខ្មែរនៅប្រទេសថៃរាប់ពាន់នាក់ បានសម្រុកមកកម្ពុជាវិញ តាមច្រកព្រំដែនកម្ពុជា-ថៃ។ ការសម្រុកមកវិញនេះ ក្រោយពីភាគីថៃបានប្រកាសបិទច្រកព្រំដែនទាំង២៤ ជាមួយកម្ពុជា ដើម្បីទប់ស្កាត់និងបង្ការវីរុសCOVID-19។ ដោយសារពលករខ្មែរ សម្រុកមកវិញច្រើននេះ ទើបធ្វើឱ្យមានការខ្វះចន្លោះលើការធ្វើតេស្តពិនិត្យសុខភាព ក៏ដូចជាការដឹកជញ្ជូន និងការរៀបចំកន្លែងស្នាក់នៅបណ្ដោះអាសន្នជាដើម។
សារព័ត៌មានថ្មីៗ មិនទាន់អាចទាក់ទងលោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំការអត្ថាធិប្បាយជុំវិញករណីនេះនៅឡើយទេ។
តែយ៉ាងណាលោក ផៃ ស៊ីផាន អ្នកនាំពាក្យរដ្ឋាភិបាល បានបញ្ជាក់ថា រដ្ឋាភិបាលបានបញ្ជាឱ្យមានការរៀបចំទីកន្លែងស្នាក់នៅ និងដាក់ដោយឡែកនៅតាមមូលដ្ឋានហើយ ជាពិសេសខេត្តនៅជិតព្រំដែន ដែលត្រូវយកចិត្តទុកដាក់រៀបចំកន្លែងស្នាក់នៅរបស់ពលករខ្មែរ ចូលមកកម្ពុជាវិញតែម្ដង។
ពលរដ្ឋខ្មែរមិនតិចជាង១,០០០នាក់ទេ បាននាំគ្នាចាកចេញពីប្រទេសថៃនៅតាមច្រកទ្វារអន្តរដូងក្នុងខេត្តបាត់ដំបង ហើយបន្តធ្វើដំណើរទៅផ្ទះកំណើតរៀងៗខ្លួន ដោយមិនបានត្រួតពិនិត្យសុខភាពអ្វីឡើយ ពិសេសត្រួតពិនិត្យរក អ្នកសង្ស័យផ្ទុកមេរោគកូវីដ-១៩ កាលពីថ្ងៃទី២២ មីនា។ នេះបើតាមសារជាសម្លេងរបស់សម្តេច ស ខេង ។
ដោយសារបញ្ហានេះ ទើបសម្តេច ស ខេង បានស្នើដល់អភិបាលខេត្តនីមួយៗ ណែនាំដល់ថ្នាក់មូលដ្ឋាន ពិសេសថ្នាក់ភូមិ-ឃុំឱ្យរាយការណ៍ចំនួនអ្នកទើបមកពីបរទេស ពិសេសមកពីប្រទេសថៃ ហើយត្រូវបញ្ជូនគ្រូពេទ្យឱ្យទៅពិនិត្យអ្នកទាំងនោះ។ លើសពីនេះ អាជ្ញាធរត្រូវណែនាំអ្នកទាំងនោះឱ្យសម្ងំឬសម្រាកនៅក្នុងផ្ទះចំនួន១៤ ដោយរក្សាគម្លាតមិនឱ្យប៉ះពាល់ ឬមានទំនាក់ទំនងជិតសិ្នតជាមួយសមាជិកក្នុងគ្រួសារ និងអ្នកដទៃ ដើម្បីតាមដានសុខភាពខ្លួនឯង និងដើម្បីបង្ការនៃការឆ្លងមេរោគកូវីដ-១៩ ដែលរាលត្បាតខ្លាំងនេះ។
រដ្ឋមន្ត្រីមហាផ្ទៃរូបនេះបាននិយាយដូច្នេះ៖«គ្រប់មូលដ្ឋានបើសង្ស័យថាពលរដ្ឋក្នុងតំបន់របស់ខ្លួន ពិសេសអ្នកមកពីបរទេសមានផ្ទុកមេរោគកូវីដ-១៩ ធ្វើបញ្ជូនទៅមណ្ឌលសុខភាពដែលនៅជិតបំផុតដើម្បីយកកំហាក ឬសំណាក យកទៅតេស្តរកមេរោគកូវីដ-១៩នៅវិទ្យាស្ថានប៉ាស្ទ័រនៅរាជធានីភ្នំពេញ»។
ជាមួយគ្នានេះសម្តេចនាយកមន្ត្រី ហ៊ុន សែន ក៏បានបញ្ជាឱ្យតាមសារសំឡេង ក្នុងបណ្តាញទំនាក់ទំនងសង្គម ទៅមន្ត្រីខ្លួន និងអាជ្ញាធររាជធានី-ខេត្តទាំងអស់ ឱ្យរៀបចំសាលារៀនតាមខេត្ត សម្រាប់ដាក់អ្នកឆ្លងវីរុសCOVID-19 ជាបណ្តោះអាសន្ន។ សម្ដេច ក៏បានបញ្ជាឱ្យនគរបាល យោធា និង កងរាជអាវុធហត្ថ ជួយកិច្ចការនេះ តាមរយៈការរៀបចំតភ្ជាប់ភ្លើងនិងប្រព័ន្ធទឹកទៅកាន់សាលារៀនទាំងនោះផង៕