ការរីករាលដាលនៃជំងឹរលាកផ្លូវដង្ហើមបង្កឡើងដោយមេរោគកូរ៉ូណាប្រភេទថ្មី COVID-19 បានធ្វើឲ្យរាជរដ្ឋាភិបាលកម្ពុជាចាត់វិធានជាបន្តបន្ទាប់ ដើម្បីបង្ការនិងទប់ស្កាត់បញ្ហានេះ។ ព្រឹត្តិការណ៍កីឡាមួយចំនួនត្រូវបានផ្អាក និងពន្យាពេលជាបណ្តោះអាសន្ន ហើយការប្រមូលផ្តុំហ្វឹកហាត់របស់ក្រុមកីឡាករជម្រើសជាតិថ្នាលត្រូវបានរំសាយ។ បញ្ហានេះ ក៏នឹងធ្វើឲ្យប៉ះពាល់ដល់គម្រោងចេញទៅហ្វឹកហាត់នៅក្រៅប្រទេសរបស់ប្រភេទកីឡាមួយចំនួនផងដែរ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា កម្ពុជាអាចនឹងលុបចោលគម្រោងចេញទៅហ្វឹកហាត់នៅក្រៅប្រទេសរបស់ប្រភេទកីឡាមួយចំនួននៅឆ្នាំនេះ បើបញ្ហារីករាលដាលនៃ COVID-19 នៅតែបន្តកើនឡើង។ លោកបានបន្ថែមថា កីឡាករដែលគ្រោងចេញទៅហ្វឹកហាត់នៅក្រៅប្រទេសឆ្នាំនេះមានចំនួន១១០នាក់ តែលោកមិនបានបញ្ជាក់លម្អិតពីប្រភេទកីឡាទាំងនោះឡើយ។
ប្រសាសន៍របស់លោក វ៉ាត់ ចំរើន៖
ទោះបីយ៉ាងនេះក្តី លោក អះអាងថា បញ្ហានេះមិនបានជះឥទ្ធិពលធ្ងន់ធ្ងរដល់ការអភិវឌ្ឍន៍វិស័យកីឡានៅកម្ពុជានោះទេ។ ដ្បិតកម្ពុជា នឹងបង្វែការហ្វឹកហាត់នៅក្រៅប្រទេស មកពង្រឹងការហ្វឹកហាត់នៅក្នុងស្រុក តាមរយៈនាំគ្រូបង្វឹកបរទេសល្អៗមកបង្វឹកនៅកម្ពុជា។ សម្រាប់លោក វ៉ាត់ ចំរើន ការហ្វឹកហាត់នៅក្រៅប្រទេសមិនខុសគ្នាពីការហ្វឹកហាត់នៅក្នុងស្រុកនោះទេ ឲ្យតែកីឡាករយកចិត្តទុកដាក់ និងខិតខំហ្វឹកហាត់។
តែយ៉ាងណាក្នុងចំណោមកីឡាករទាំង១១០នាក់ខាងលើ មិនមែនមានន័យថា សុទ្ធតែត្រូវផ្អាកការហ្វឹកហាត់នៅក្រៅប្រទេសនោះទេ ព្រោះកម្ពុជាកំពុងពិចារណាបង្វែពីប្រទេស ដែលមានការរីករាលដាលនៃ COVID-19 ទៅហ្វឹកហាត់នៅប្រទេសផ្សេង។ នេះបើតាមការបញ្ជាក់របស់លោក វ៉ាត់ ចំរើន ដែលអះអាងថា គម្រោងបញ្ជូនកីឡាករទៅហ្វឹកហាត់នៅបរទេសនៅតែរក្សានៅដដែល ប្រសិនបើការរីករាលនៃ COVID-19 មានភាពធូរស្បើយ។
ការរីករាលដាលនៃ COVID-19 បានធ្វើឲ្យកម្ពុជាផ្អាក និងពន្យាពេលរៀបចំព្រឹត្តិការណ៍មួយចំនួនដូចជាការប្រកួតពានរង្វាន់លីគកំពូលនិងពានរង្វាន់សម្តេច ហ៊ុន សែន, ពានរង្វាន់បាល់ទាត់យុវជនអាយុក្រោម១៨ឆ្នាំ និង១៦ឆ្នាំ, ការប្រកួតកីឡាជាតិលើកទី៣, ការប្រកួតកីឡាសិស្សបឋមសិក្សាថ្នាក់ជាតិ, រំសាយការប្រមូលផ្តុំក្រុមកីឡាករជម្រើសជាតិថ្នាល និងផ្អាកសង្វៀនប្រដាល់តាមស្ថានីយទូរទស្សន៍ជាដើម។
បញ្ហានេះដែរ រាជរដ្ឋាភិបាលកម្ពុជាបានសម្រេចបិទសាលារៀននិងគ្រឹះស្ថានសិក្សានានា, KTV, រោងភាពយន្ត, ក្លិបកម្សាន្តនានា, ផ្អាកចូលទស្សនាក្នុងបរមរាជវាំង និងពិធីជួបជុំបែបសាសនាផ្សេងៗ។ COVID-19 មិនត្រឹមតែឆ្លងដល់មនុស្សប៉ុណ្ណោះទេ តែវាធ្វើឲ្យប៉ះពាល់វិស័យសេដ្ឋកិច្ច ពាណិជ្ជកម្ម ទេសចរណ៍ និងជីវភាពរបស់ប្រជាពលរដ្ឋទៀតផង។
គិតត្រឹមព្រឹកថ្ងៃទី២៣ ខែមីនា ឆ្នាំ២០២០ កម្ពុជាបានរកឃើញអ្នកផ្ទុកជំងឺរលាកផ្លូវដង្ហើមបង្កឡើលដោយមេរោគកូរ៉ូណាវីរុសប្រភេទថ្មី COVID-19 ចំនួន៨៦នាក់ហើយ ក្រោយរកឃើញពីរករណីបន្ថែមទៀត ក្នុងនោះ១ករណីកើតនៅខេត្តកោះកុង និង១ករណីនៅខេត្តកំពង់ចាម៕