COVID-19
អន្តរជាតិ
ករណីស្លាប់ដោយសារ COVID-19 នៅម៉ាឡេស៊ីឡើងដល់១៥នាក់ ក្រោយរកឃើញ ១ករណីទៀត រូបភាព៖ Reuters
× ម៉ាឡេស៊ី នាថ្ងៃទី២៤ ខែមីនា បានរាយការណ៍ពីអ្នកស្លាប់ដោយសារជំងឺរលាកសួត ដែលបង្កដោយកូរ៉ូណាវីរុស (COVID-19) ១ករណីទៀត។ ករណីចុងក្រោយនេះ គឺជាបុរសម្នាក់ ដែលបានឆ្លង COVID-19 ពីពិធីសាសនាឥស្លាមមួយ នាទីក្រុងគូឡាឡាំពួ នាពេលកន្លងទៅ។
បើតាមការអះអាងរបស់អគ្គនាយកសុខាភិបាលម៉ាឡេស៊ី លោកNoor Hisham Abdullah ករណីស្លាប់ចុងក្រោយនេះ គឺជាបុរសវ័យ ៧១ឆ្នាំ ដែលរស់នៅទីក្រុង Malacca ។ បុរសរូបនេះ បានឆ្លង COVID-19 បន្ទាប់ពីចូលរួមពិធីសាសនាមួយ នៅព្រះវិហារឥស្លាម Sri Petaling ក្នុងទីក្រុងគូឡាឡាំពួ។ នេះ គឺជាករណីស្លាប់ទី១៥ហើយរបស់ម៉ាឡេស៊ី។
បើតាមការអះអាងរបស់អាជ្ញាធរសុខភាពម៉ាឡេស៊ី បុរសវ័យ ៧១ឆ្នាំនេះ ក៏មានជំងឺរ៉ាំរ៉ៃជាប់ខ្លួនដែរ និងបានទទួលការព្យាបាលនៅមន្ទីពេទ្យមួយកន្លែងក្នុងក្រុង Muar រដ្ឋ Johor ជាប្រចាំ។
ក្នុងមួយរយៈចុងក្រោយនេះ ម៉ាឡេស៊ី បានរកឃើញអ្នក COVID-19 យ៉ាងគំហុក។ ភាគច្រើននៃអ្នកជំងឺ គឺមានទាក់ទងទៅនឹងពិធីសាសនាឥស្លាមមួយ ដែលប្រារព្ធឡើងពីថ្ងៃទី២៧ ខែកុម្ភៈ ដល់ថ្ងៃទី១ ខែមីនា។ ក្នុងពិធីសាសនានេះ គឺមានអ្នកចូលរួមរហូតដល់ជាង ១៦០០០នាក់ឯណោះ និងមកពីប្រទេសមួយចំនួនក្នុងតំបន់។
សូមបញ្ជាក់ថា ករណីឆ្លង COVID-19 សរុបនៅម៉ាឡេស៊ីមាន ១៥១៨ករណី និងអ្នកស្លាប់ ១៥ករណី ខណៈអ្នកជាសះស្បើយមានចំនួន ១៥៩នាក់។ ក្នុងបណ្តាប្រទេសអាស៊ីអាគ្នេយ៍ទាំងអស់ ម៉ាឡេស៊ី នៅតែមានអ្នកជំងឺCOVID-19 ច្រើនជាងគេ ខណៈបណ្តាប្រទេសមួយចំនួន បានរកឃើញកូរ៉ូណាវីរុសជាបន្តបន្ទាប់៕
© រក្សាសិទ្ធិដោយ thmeythmey.com