COVID-19
ជាតិ
COVID-19៖ និស្សិតខ្មែរនៅអាមេរិក១២នាក់ នឹងវិលមកកម្ពុជាវិញ លោក ជុំ សុន្ទរី ឯកអគ្គរដ្ឋទូតកម្ពុជាប្រចាំសហរដ្ឋអាមេរិក
× ភ្នំពេញ៖ សិស្ស-និស្សិតខ្មែរចំនួន១២នាក់ ដែលសិក្សានៅអាមេរិក នឹងត្រឡប់មកកម្ពុជាវិញ ក្រោមការសម្របសម្រួលពីស្ថានទូតកម្ពុជាប្រចាំសហរដ្ឋអាមេរិក ដើម្បីបង្ការការឆ្លងជំងឺ COVID-19 ដែលកំពុងកើនឡើងខ្លាំង។
ស្ថានទូតខ្មែរ បានបញ្ជាក់ថា ការវិលត្រឡប់របស់សិស្ស និងនិស្សិតខ្មែរទាំងនេះ ធ្វើឡើងស្របពេលដែលសាលារៀន និងអ្នកឧបត្ថម្ភកម្មវិធីសិក្សាដល់សិស្សកម្ពុជាមួយចំនួន បានសម្រេចបញ្ចប់វគ្គ ឬកម្មវិធីសិក្សា ហើយតម្រូវឱ្យសិស្ស និងនិស្សិតបរទេសទាំងអស់ ត្រឡប់ទៅប្រទេសខ្លួនវិញ ដើម្បីបង្ការការឆ្លងជំងឺCOVID-19 ក៏ដូចជាបញ្ចៀសការកំណត់ឃុំខ្លួននៅមួយកន្លែង និងការរិតត្បិតសេរីភាពដើរហើរ ឬបិទជើងយន្តហោះជាដើម។
និស្សិតខ្មែរ ដែលត្រឡប់មកកម្ពុជាវិញនេះ គឺកាន់ទិដ្ឋាការ F1 (សិស្សសិក្សានៅអាមេរិក) និង J1 (សិស្សផ្លាស់ប្ដូរកម្មវិធីសិក្សា) នៅអាមេរិក ។ អាមេរិក មានករណី COVID-19 ជាង៤៦,០០០ករណី ខណៈអ្នកស្លាប់បានកើនជិត៦០០ករណី និងជាសះស្បើយជិត៣០០នាក់។ អាមេរិក បានក្លាយជាប្រទេសមានកូរ៉ូណាវីរុសច្រើនជាងគេលំដាប់ទី៣ បន្ទាប់ពីចិន និងអ៊ីតាលី។
សម្រាប់សិស្ស-និស្សិត ដែលបានទិញសំបុត្រយន្តហោះរួច ត្រូវទាក់ទងមកស្ថានទូត ឱ្យបានមុនពេលធ្វើដំណើរ តាមរយៈលេខទូរស័ព្ទ ២០២ ៧២៦ ៧៧៤២ , ២០២ ៩៩៧ ៧០៣១ ឬ តាមរយៈអ៊ីម៉ែល
[email protected] ។ ការណ៍ផ្ដល់ដំណឹងមកកាន់ស្ថានទូតនេះ ដើម្បីស្ថានទូតជួយសម្រួលដល់ការធ្វើដំណើរ ការពិនិត្យសុខភាព និងការធ្វើចត្តាឡីស័កដល់សិស្ស-និស្សិត៕
Tag:
សិស្ស
និស្សិត
COVID-19
© រក្សាសិទ្ធិដោយ thmeythmey.com