COVID-19
ជាតិ
COVID-19៖ ពេទ្យខេត្តសៀមរាបឱ្យបុរសខ្មែរ២នាក់ ដែលទើបមកពីម៉ាឡេស៊ីទៅផ្ទះវិញ ក្រោយតេស្ដអវិជ្ជមាន២លើក រូបពីមន្ទីរពេទ្យបង្អែកខេត្តសៀមរាប
× សៀមរាប៖ បុរសជនជាតិខ្មែរ២នាក់ ដែលមានប្រវត្តិទៅចូលរួមពិធីបុណ្យសាសនានៅប្រទេសម៉ាឡេស៊ី ត្រូវបានអនុញ្ញាតឱ្យវិលត្រឡប់ទៅផ្ទះវិញហើយ ក្រោយតាមដានសុខភាព និងធ្វើតេស្ដអវិជ្ជមានចំនួន២លើក។ យ៉ាងណា អ្នកទាំង២ត្រូវបានផ្តល់ប្រឹក្សាឱ្យបន្តតាមដានសុខភាពនៅផ្ទះរៀងៗខ្លួន។
ប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ ប្រាប់សារព័ត៌មាននៅរសៀលថ្ងៃទី២៥ មីនាថា បុរសជនជាតិខ្មែរដែលមានការសង្ស័យឆ្លងជំងឺកូវីដ១៩ពីប្រទេសម៉ាឡេស៊ី ត្រូវបានអនុញ្ញាតឱ្យត្រឡប់ទៅផ្ទះវិញនៅព្រឹកថ្ងៃទី២៥នេះ។ លោក ក្រុស សារ៉ាត់ ពន្យល់ថា បុរសទាំង២មានសុខភាពធម្មតា ហើយបើរាប់ចាប់ពីថ្ងៃទី៣ ពេលត្រឡប់ពីប្រទេសម៉ាឡេស៊ី គឺមានរយៈពេល២១ថ្ងៃហើយ ដូច្នេះអ្នកទាំង២ពិតជាគ្មានជំងឺកូវីដ១៩ឡើយ។
លោកប្រធានមន្ទីរសុខាភិបាលបញ្ជាក់ថា៖« ក្រុមគ្រូពេទ្យបានផ្តល់ប្រឹក្សាយោបល់ និងឱ្យធ្វើអ្វីទៅតាមការណែនាំពីគ្រូពេទ្យ ជាលក្ខណៈពិសេសគឺការធ្វើតេស្ដត្រួតពិនិត្យ២លើក លទ្ធផលអវិជ្ជមាន ចឹងមានន័យថា ពួកគាត់អត់មានមេរោគទេ។ តាមពិត យើងគួរតែឱ្យគាត់ត្រឡប់ទៅផ្ទះតាំងពីថ្ងៃដំបូង (លទ្ធផលតេស្ដ) តែខ្ញុំចេះតែខ្លាច បារម្ភ ដូច្នេះរយៈពេលមួយសប្ដាហ៍នេះគឺយើងធ្វើការយ៉ាងហ្មត់ចត់បំផុត»។
គួរបញ្ជាក់ថា បុរសជនជាតិខ្មែរខាងលើ ត្រូវបានយកទៅធ្វើតេស្ដរកជំងឺកូវីដ១៩ នៅថ្ងៃទី១៦ មីនា បន្ទាប់ពីពួកគេវិលត្រឡប់ពីចូលរួមបុណ្យសាសនាដ៏ធំមួយនៅប្រទេសម៉ាឡេស៊ីកាលពីថ្ងៃទី៣ មីនា៕
© រក្សាសិទ្ធិដោយ thmeythmey.com