ពីនេះ ពីនោះ
ឃ្លីបសំឡេងជាព័ត៌មានលេងសើច, ក្លែងក្លាយ តែមន្ត្រីក៏ចែកផ្សាយក្នុងក្រុមបន្តគ្នាដែរ
× អ្នកណា នៅកន្លែងណា ក៏គេនិយាយពីរឿងកូវីដដែរ។ សុធីរ និងសំណាង ពេលនេះលែងហ៊ានអង្គុយក្នុងតុកាហ្វេដូចសព្វដងហើយ។ ពួកគេឈរនិយាយគ្នាម្តង ក្នុងគម្លាតជាង១ម៉ែត្រ។ កាន់កំប៉ុងកាហ្វេម្នាក់មួយ ក្លើទាំងពីរនិយាយខឹង មន្ត្រីខ្លះដែលបន្តចែកចាយសារជាសំឡេង ដែលពេលខ្លះ គេអាចយល់បានថា ជាដំណឹងក្លែងក្លាយ នៅតាមក្រុមបណ្តាញសង្គមនានា។
សុធីរ៖ ឥឡូវនេះ ព័ត៌មានរឿងកូវីដ កូវ៉ល់ពេញហ្វេសប៊ុក សម្បូរអារឿងក្លែងក្លាយច្រើនណាស់។ បារម្ភពីចាស់ៗតាមខេត្ត តាមជនបទ អត់យល់ ហើយចេះតែជឿ ផ្សាយបន្តគ្នា។
សំណាង៖ អារឿងចែកចាយមានពីរ។ ទីមួយ ចែករំលែកបន្តនៅលើហ្វេសប៊ុក។ ទីពីរ គឺចែករំលែកតាមក្រុមTelegram, Messenger, WhatsApp ជាដើម។ ចែកតាមនេះ សាយភាយលឿនណាស់។ ហើយអ្វីដែលអញខឹង គឺអ្នកចែករំលែក ពេលខ្លះជាមន្ត្រីធំៗ ជាបញ្ញវន្ត ជាមនុស្សមានឥទ្ធិពលក្នុងសង្គមទៀត។ ពេលខ្លះពួកគេក៏ដឹងថា វាជាព័ត៌មានដែលមិនទំនង ហើយគេថតសំឡេងលេងសើចដែរ ប៉ុន្តែពួកគេនៅតែចែករំលែកបន្តដើម្បីលេងសើច។
សុធីរ៖ ទីបំផុត អាសារជាសំឡេងលេងសើចហ្នឹង វាទៅដល់ប្រជាជនតាមភូមិ ដែលដឹងតែពីជឿតែម្តង។ មនុស្សខ្មែរយើង ជឿលោកធំណាស់។ កាលបើឃើញលោកធំចែករំលែកហើយ គិតថាជារឿងពិតហើយ។ អារឿងគ្រូពេទ្យចិនស្នើរឱ្យបិទផ្សារនេះមួយ, អារឿងដុសធ្មេញនឹងអំបិលសម្លាប់មេរោគកូវីដនេះពីរ, មានព័ត៌មានដែលគេថតសំឡេងនិយាយលេងសើចច្រើនទៀត ដែលគេចែករំលែកតាមប្រអប់សារជាក្រុមៗ។
សំណាង៖ ដល់អ៊ីចឹងទៅ ក្រុមការងារប៉ុន្មានក្រុម ក៏ទប់មិនឈ្នះដែរ។ សរុបមកវិញ បើយើងដឹងថា មិនពិតហើយ យើងអត់ផ្ញើបន្តទៅណាទៀតទេ។ ទោះក្នុងន័យឱ្យស្តាប់លេងក៏ដោយ៕
© រក្សាសិទ្ធិដោយ thmeythmey.com