អត្ថបទពាណិជ្ជកម្ម
ក្រុមគ្រូពេទ្យចិនបានមកដល់ទីក្រុងភ្នំពេញ ដើម្បីជួយកម្ពុជាប្រយុទ្ធប្រឆាំងនឹងការរីករាលដាលនៃជំងឺកូវីដ-១៩
×![]()
ដោយ: ថ្មីៗ
នៅព្រឹកថ្ងៃទី២៣ នេះ ក្រុមអ្នកជំនាញផ្នែកវេជ្ជសាស្ត្រជនជាតិចិនប្រឆាំង នឹងការឆ្លងរាត ត្បាតនៃជំងឺកូវីដ១៩ ចំនួន៧នាក់ បានមកដល់អាកាសយានដ្ឋានអន្តរជាតិភ្នំពេញ និងបាននាំមកជាមួយនូវជំនួយចំនួន ៨,១តោន រួមមានជា ម៉ាសវេជ្ជសាស្ត្រ, ម៉ាស N95, សម្លៀកបំពាក់ការពារវីរុស, ទែម៉ូម៉ែត្រ និងសម្ភារផ្សេងៗទៀតយ៉ាងច្រើន ជូនដល់ភាគីកម្ពុជា។
នាព្រឹកនោះផងដែរ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា និងលោក Wang Wentian ឯកអគ្គរដ្ឋទូតចិនប្រចាំកម្ពុជា បានអញ្ជើញមកទទួលដំណើរអ្នកជំនាញវេជ្ជសាស្ត្រ ដែលអញ្ជើញមកពីប្រទេសចិន ។ លោករដ្ឋមន្ត្រី បានមានប្រសាសន៍ថា៖«នេះគឺជាការបង្ហាញឱ្យឃើញ នូវចំណងមិត្តភាពរវាងកម្ពុជា និងចិន ដោយសាមគ្គីភាព និងភាតរភាព។ ប្រទេសចិន មានបទពិសោធន៍ក្នុងការប្រយុទ្ធប្រឆាំង នឹងការរាតត្បាតជំងឺរលាកសួតប្រភេទថ្មីនេះ ដូចនេះបុគ្គលិកពេទ្យរបស់យើង នឹងរៀនសូត្រពីអ្នកជំនាញចិន។ ក្នុងនាមជារាជរដ្ឋាភិបាលកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅ ចំពោះក្រុមអ្នកជំនាញវេជ្ជសាស្ត្រចិន ដែលបានអញ្ជើញមកកម្ពុជា»។
នេះគឺជាក្រុមគ្រូពេទ្យប្រឆាំង នឹងការឆ្លងរាលដាលដំបូងគេ ដែលចិនបានបញ្ជូនមកកាន់ប្រទេសអាស៊ាន។ ក្រុមអ្នកជំនាញទាំងអស់នេះ ត្រូវបានបង្កើតឡើង ដោយគណៈកម្មាធិការជាតិ និងសុខភាពចិន នឹងត្រូវបានជ្រើសរើសដោយគណៈកម្មាធិការសុខាភិបាល និងសុខភាពនៃតំបន់ស្វយ័តក្វាងស៊ី ដែលគ្របដណ្តប់លើជំនាញរួមមាន៖ ការការពារនឹងការរាតត្បាត ការធ្វើរោគវិនិច្ឆ័យ និងការធ្វើតេស្ត ក្នុងមន្ទីរពិសោធន៍ជាដើម។
លោក Ai Xiang ប្រធានក្រុមជំនាញ បានប្រាប់អ្នកសារព័ត៌មានថា ភារកិច្ចចម្បងរបស់ក្រុមគ្រូពេទ្យយើង គឺដើម្បីចែករំលែក និងផ្លាស់ប្តូរបទពិសោធន៍ ក៏ដូចជាការណែនាំដល់ការការពារ និងការត្រួតពិនិត្យការរាតត្បាត ការព្យាបាលអ្នកជំងឺកម្រិតស្រាល និងមធ្យម និងការងារមន្ទីរពិសោធន៍ផងដែរ ព្រមទាំងផ្តល់ជាការណែនាំ និងជំនួយផ្នែកវេជ្ជសាស្ត្រផ្សេងៗទៀត ដល់ស្ថានទូតចិន សហគ្រាស និស្សិត និងជនជាតិចិនទាំងអស់ប្រចាំនៅកម្ពុជា។
លើសពីនេះទៅទៀត លោក Ai Xiang ប្រធានក្រុមជំនួយវេជ្ជសាស្ត្រចិននៅកម្ពុជា បានមានប្រសាសន៍ថា៖«តាមរយៈការប្រើប្រាស់ប្រព័ន្ធ Huawei Cloud Welink ពិតជាបានជួយដល់ក្រុមគ្រូពេទ្យចិននៅកម្ពុជា ដោយការភ្ជាប់ទំនាក់ទំនងគ្នា តាមរយៈសន្និសីទវីដេអូជាមួយនឹងគណៈកម្មាការសុខាភិបាល និងអ្នកជំនាញនៃមន្ទីរពេទ្យក្នុងប្រទេសចិន ក្នុងការចែករំលែកព័ត៌មាន ការបែងចែកការងារ ជាពិសេសចំណេញពេលវេលា ក្នុងការងារបង្ការការរីករាលដាលនេះ ដើម្បីជួយសម្រួលដល់ដំណើរការ ការងារប្រយុទ្ធប្រឆាំងឱ្យកាន់តែមានប្រសិទ្ធភាពជាងមុន»។
លោក Wang Wentian បានប្រាប់ទីភ្នាក់ងារសារព័ត៌មានចិនស៊ីងហួថា៖«ប្រទេសចិន និងកម្ពុជា គឺជាសហគមន៍ដែលរួមជោគវាសនាតែមួយ នៅក្នុងគ្រាលំបាកបំផុត នៃការតស៊ូប្រយុទ្ធប្រឆាំង នឹងការរីករាលដាលរបស់ប្រទេសចិន ប្រទេសកម្ពុជា ក៏បានប្រកាន់ជំហរដ៏រឹងមាំជាមួយយើង និងជម្នះរាល់ការលំបាកជាមួយគ្នា។ ដូចនេះ ស្ថានទូតចិនប្រចាំកម្ពុជា នឹងតាមដានយ៉ាងដិតដល់ និងរក្សាទំនាក់ទំនងយ៉ាងជិតស្និទ្ធ ជាមួយមន្ទីរសុខាភិបាលកម្ពុជាដើម្បីរួមគ្នាប្រយុទ្ធប្រឆាំង នឹងការរីករាលដាលនៃជំងឺរាតត្បាតនៅកម្ពុជា។ យោងតាមតម្រូវការនៃការការពារ ការរាតត្បាតនៅកម្ពុជា ប្រទេសចិន នឹងបន្តផ្តល់ជំនួយជាសម្ភារចាំបាច់និងការគាំទ្រខាងវេជ្ជសាស្ត្រនាពេលអនាគត ហើយវិធានការទាំងអស់នេះ នឹងជួយលើកកម្ពស់សមត្ថភាពរបស់ប្រទេសកម្ពុជា ក្នុងការការពារ និងគ្រប់គ្រងការរាតត្បាតនៃជំងឺនេះ»។
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
