COVID-19៖ ម៉ាឡេស៊ី ពន្យារពេលបិទប្រទេសដល់ថ្ងៃទី១៤ ខែមេសា

COVID-19

អន្តរជាតិ

COVID-19៖ ម៉ាឡេស៊ី ពន្យារពេលបិទប្រទេសដល់ថ្ងៃទី១៤ ខែមេសា

25, Mar 2020 , 10:39 pm

រូបភាព

នាយករដ្ឋមន្រ្តីម៉ាឡេស៊ី លោក Muhyiddin Yassin។ រូបភាព៖ the Star

ដោយ: ធៀន ភារិន្ទ

នាយករដ្ឋមន្ត្រី លោក Muhyiddin Yassin នាថ្ងៃទី២៥ ខែមីនា បានប្រកាសថា ម៉ាឡេស៊ី នឹងពន្យារពេលបិទប្រទេសរយៈពេល ១៤ថ្ងៃបន្ថែមទៀត ដើម្បីទប់ស្កាត់ការរីកសាយភាយ ជំងឺរលាកសួត ដែលបង្កដោយកូរ៉ូណាវីរុស (COVID-19) កំពុងតែកើនឡើងយ៉ាងគំហុកនៅក្នុងប្រទេស។ ការពន្យារពេលបិទប្រទេសលើកទីពីរនេះ ធ្វើឡើងបន្ទាប់ពីម៉ាឡេស៊ីមាន COVID-19 សរុបចំនួន ១៧៩៦ករណី និងអ្នកស្លាប់ ១៧ករណី។

កន្លងមក ម៉ាឡេស៊ី បានបិទប្រទេសម្តងរួចមកហើយ ចាប់ពីថ្ងៃទី១៨ ដល់ថ្ងៃទី៣១ ខែមីនា ដើម្បីទប់ស្កាត់ការរាតត្បាត COVID-19 នៅក្នុងប្រទេស។ តាមរយៈវិធានការបិទប្រទេសនេះ ម៉ាឡេស៊ីហាមប្រជាជនរបស់ខ្លួនទៅក្រៅប្រទេស និងហាមជនបរទេសទាំងអស់ចូលក្នុងម៉ាឡេស៊ី ការធ្វើដំណើរត្រូវរឹតត្បិត កន្លែងសាធារណៈមួយចំនួនត្រូវបិទ និងវិធានការរឹតត្បិតជាច្រើនទៀត។

ដើម្បីចាប់បង្ខំឲ្យប្រជាជនទាំងអស់អនុវត្តបទបញ្ជានេះ ម៉ាឡេស៊ីបានពង្រាយកម្លាំងយោធានៅក្នុងប្រទេសជាច្រើន។ លើសពីនេះ អាជ្ញាធរម៉ាឡេស៊ី ក៏ប្រកាសពីការដាក់ពិន័យលើជនជាតិម៉ាឡេស៊ីណា ដែលមិនគោរពបទបញ្ជានេះថែមទៀត ពោលគឺបើនរណាល្មើសបទបញ្ជា អ្នកទាំងនោះអាចនឹងពិន័យទឹកប្រាក់រហូតដល់ប្រមាណ ២២៥ដុល្លារ និងអាចជាប់ពន្ធនាគារហូតដល់ ៦ខែថែមទៀត។

ដោយមើលឃើញថាស្ថានភាពCOVID-19 នៅម៉ាឡេស៊ីមិនទាន់ធូរស្បើយ និងជិតផុតថ្ងៃកំណត់ លោក Muhyiddin Yassin នាយករដ្ឋមន្ត្រីម៉ាឡេស៊ី បានចេញមុនម្តងទៀត ដើម្បីប្រកាសពន្យារពេលបិទប្រទេសរហូតដល់ថ្ងៃទី១៤ ខែមេសា។ ក្នុងសេចក្តីប្រកាសលើកទី២នេះ ប្រមុខរដ្ឋាភិបាល បានសូមទោស និងឲ្យប្រជាពលរដ្ឋម៉ាឡេស៊ីទាំងអស់អត់ទ្រាំ ដើម្បីឲ្យករណីឆ្លងនៅម៉ាឡេស៊ីបានធូរស្បើយបន្តិចសិន។ ក្នុងមួយរយៈចុងក្រោយនេះ ម៉ាឡេស៊ី បានរកឃើញអ្នកឆ្លង COVID-19 លើសពី ១០០ករណីជារៀងរាលថ្ងៃ ហើយភាគច្រើនគឺមានពាក់ព័ន្ធនឹងពិធីសាសនាឥស្លាមមួយ នាទីក្រុងគូឡាឡាំពួ។

ថ្លែងនៅមុខកញ្ចក់ទូរទស្សន៍ លោក Muhyiddin បានបញ្ជាក់ថា ការពន្យារពេលបិទប្រទេសនេះ គឺជាវិធីតែមួយគត់ អាចទប់ស្កាត់ COVID-19 ដែលធ្វើឲ្យស្ថានភាពម៉ាឡេស៊ី កាន់តែរងភាពអាក្រក់ទៅៗ ហើយវាក៏ជាវិធីឈប់ស្កាត់ការភ័យខ្លាចរបស់ប្រជាជនផងដែរ។ បើតាមលោក Yuhyiddin ការពន្យារពេលបិទប្រទេសនេះ គឺមានការផ្តល់យោបល់ពី ក្រសួងសុខាភិបាល និងក្រុមប្រឹក្សាសន្តិសុខជាតិម៉ាឡេស៊ី។

ជាមួយគ្នានេះ លោកនាយករដ្ឋមន្ត្រីបានបន្ថែមទៀតថា បើទោះបីជា មួយរយៈនេះ តួលេខអ្នកឆ្លងCOVID-19 មានការធ្លាក់ចុះបន្តិចមែន ប៉ុន្តែក្នុងពេលឆាប់ៗខាងមុខ វានឹងកើនឡើងកើនតែច្រើន។ ក្នុងន័យនេះ ការបិទប្រទេស គឺជាវិធីផ្តាច់ការចម្លងCOVID-19 ទៅប្រជាជនផ្សេងទៀត។

សូមបញ្ជាក់ថា គិតត្រឹមរសៀលថ្ងៃទី២៥ ខែមីនា ម៉ាឡេស៊ីរកឃើញCOVID-19 សរុបចំនួន ១៧៩៦ករណី និងអ្នកស្លាប់ ១៧ករណី។ ចំណែកអ្នកជាសះស្បើយនៅម៉ាឡេស៊ីមានចំនួន ១៨៣ករណី៕