មន្ត្រីជាន់ខ្ពស់ឥណ្ឌូណេស៊ី៥នាក់ឆ្លងCOVID-19 ខណៈ២នាក់ស្លាប់មុនធ្វើតេស្ត

COVID-19

អន្តរជាតិ

មន្ត្រីជាន់ខ្ពស់ឥណ្ឌូណេស៊ី៥នាក់ឆ្លងCOVID-19 ខណៈ២នាក់ស្លាប់មុនធ្វើតេស្ត

25, Mar 2020 , 4:52 pm

រូបភាព

ពីឆ្វេងទៅស្ដាំ៖ រដ្ឋមន្ត្រីដឹកជញ្ជូន, អគ្គនាយកផ្លូវដែក និង អភិបាលក្រុង Bogor

ដោយ:

យ៉ាងហោចណាស់ មន្ត្រីជាន់ខ្ពស់នៃរដ្ឋាភិបាលកណ្ដាលនិងតំបន់របស់ប្រទេសឥណ្ឌូណេស៊ីចំនួន៥នាក់ហើយ មានលទ្ធផលតេស្តវិជ្ជមានសម្រាប់ជំងឺផ្លូវដង្ហើម COVID-19 គិតត្រឹមថ្ងៃអង្គារ ២៤ ខែមីនា។ ទន្ទឹមនេះ មន្ត្រីឥណ្ឌូណេស៊ី ២នាក់ផ្សេងទៀត បានស្លាប់កាលពីថ្ងៃដើមសប្តាហ៍នេះ មុនពេលធ្វើតេស្តរក COVID-19 ក្រោយត្រូវបានរាយការណ៍ថា ពួកគេមានចេញរោគសញ្ញានៃជំងឺនេះ។

ទាក់ទិនអ្នកស្លាប់ទាំងពីរនាក់ ម្នាក់ក្នុងចំណោមនោះគឺជា អគ្គនាយកម្នាក់នៃក្រសួងឧស្សាហកម្មឥណ្ឌូណេស៊ី ឈ្មោះថា Harjanto ។ បើតាមការបញ្ជាក់របស់អ្នកនាំពាក្យក្រសួងឧស្សាហកម្មឥណ្ឌូណេស៊ី នៅថ្ងៃអង្គារ លោកអគ្គនាយក Harjanto ស្លាប់នៅមន្ទីរពេទ្យមួយក្នុងរដ្ឋធានី ហ្សាការតា នៅថ្ងៃចន្ទ វេលាម៉ោង៩៖៣០យប់។

បើតាមការចុះផ្សាយរបស់កាសែត Jakarta Post អ្នកស្លាប់ម្នាក់ទៀត គឺជាមន្ត្រីជំនាញម្នាក់របស់ក្រសួងឧស្សាហកម្ម ឈ្មោះថា Amir Sambodo។ បើតាមប្រភពព័ត៌មានដដែល លោក Amir អាយុ ៦០ឆ្នាំ បានស្លាប់នៅថ្ងៃអង្គារ វេលាម៉ោង៨ព្រឹក។

ដោយឡែក មន្ត្រីជាន់ខ្ពស់ឥណ្ឌូណេស៊ី ៥នាក់ ដែលបានឆ្លងជំងឺ COVID-19 គឺរួមមាន រដ្ឋមន្ត្រីដឹកជញ្ជូនឥណ្ឌូណេស៊ី លោក Budi Karya Sumadi ដែលបានតេស្តវិជ្ជមានកាលពីថ្ងៃ១៤ ខែមីនា។ លោក ជាមន្ត្រីជាន់ខ្ពស់ឥណ្ឌូណេស៊ីទី១ដែលឆ្លងជំងឺផ្លូវដង្ហើមនេះ។ បច្ចុប្បន្នលោក មានសុខភាពល្អប្រសើរ។

មុនពេលចូលមន្ទីរពេទ្យ លោករដ្ឋមន្ត្រី Budi បានចូលរួមជំនួបគណៈរដ្ឋមន្ត្រីមួយ ដែលដឹកនាំដោយលោកប្រធានាធិបតី ចូកូ វីដូដូ កាលពីថ្ងៃ១១ ខែមីនា។ ក្រោយពីការប្រកាសថា លោកឆ្លង COVID-19 ប្រធានាធិបតី វីដូដូ និងសមាជិកគណៈរដ្ឋមន្ត្រីទាំងអស់ ក៏បានធ្វើតេស្តរកវីរុសនេះ។ បន្ទាប់មក នាដើមសប្តាហ៍នេះ លោក ចូកូវី បានប្រកាសថា លោកនិងភរិយា មានលទ្ធផលតេស្តអវិជ្ជមាន។ យ៉ាងណាមិញ លទ្ធផលតេស្តបណ្ដារដ្ឋមន្ត្រីដទៃទៀត ពុំទាន់បានប្រកាសនៅឡើយទេ។

អភិបាលរងក្រុង Bandung (ឆ្វេង) និងសមាជិកប្រឹក្សាភិបាលម្នាក់ អ្នកស្រី Cellica Nurrachadiana

បើតាម Jakarta Post អ្នកនាំពាក្យក្រសួងដឹកជញ្ជូនឥណ្ឌូណេស៊ី Adita Irawati នៅថ្ងៃអង្គារ បានប្រកាសថា មន្ត្រីជាន់ខ្ពស់ម្នាក់ទៀតក៏បានឆ្លងជំងឺ COVID-19 ។ លោក បញ្ជាក់ថា អ្នកជំងឺរូបនោះ គឺជាអគ្គនាយកផ្លូវដែករបស់ក្រសួងដឹកជញ្ជូន លោក Zulfikri ហើយបច្ចុប្បន្ន លោកមានសុខភាពធម្មតា ហើយកំពុងធ្វើចត្ដាឡីស័កនៅផ្ទះ។

នៅថ្ងៃដដែល អភិបាលខេត្តកោះជ្វាខាងលិច (West Java) លោក Ridwan Kamil បានប្រកាសថា សមាជិកប្រឹក្សាភិបាលម្នាក់ អ្នកស្រី Cellica Nurrachadiana បានឆ្លង COVID-19 ។ បន្ថែមពីអ្នកស្រី មន្ត្រីជាន់ខ្ពស់២នាក់ទៀតរបស់ឥណ្ឌូណេស៊ី រួមមាន អភិបាលក្រុង Bogor និងអភិបាលរងក្រុង Bandung ក៏បានឆ្លង COVID-19 ផងដែរ។

សូមបញ្ជាក់ថា ខេត្តកោះជ្វាខាងលិច ស្ថិតក្នុងចំណោមតំបន់ដែលរងគ្រោះបំផុតដោយសារជំងឺ COVID-19 ក្នុងប្រទេសឥណ្ឌូណេស៊ី។ ខេត្តនេះ បានរាយការណ៍ករណីឆ្លងសរុប ៦០ករណីហើយ កាលពីថ្ងៃអង្គារ ខណៈមានអ្នកស្លាប់១០នាក់។ រដ្ឋធានី ហ្សាការតា រកឃើញករណីឆ្លងសរុប ៤២៤ករណី និងស្លាប់ ៣១នាក់។ ជារួម ឥណ្ឌូណេស៊ី មានករណីឆ្លង ៦៨៦ករណី និងស្លាប់ ៥៥នាក់៕