លោក ត្រាំ ស្នើកូរ៉េខាងត្បូងផ្ដល់ជំនួយគ្រឿងបរិក្ខារពេទ្យដើម្បីទប់ទល់ COVID-19

COVID-19

អន្តរជាតិ

លោក ត្រាំ ស្នើកូរ៉េខាងត្បូងផ្ដល់ជំនួយគ្រឿងបរិក្ខារពេទ្យដើម្បីទប់ទល់ COVID-19

25, Mar 2020 , 5:59 pm

រូបភាព

ប្រធានាធិបតីអាមេរិក ដូណាល់ ត្រាំ ចាប់ដៃប្រធានាធិបតីកូរ៉េខាងត្បូង មូន ចេអ៊ីន នាជំនួបកន្លងមក។ រូបភាព Xinhua

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី២៤ ខែមីនា បានស្នើសុំត្រង់ៗឲ្យកូរ៉េខាងត្បូងផ្ដល់ជំនួយគ្រឿងបរិក្ខារពេទ្យសម្រាប់អាមេរិកក្នុងការប្រយុទ្ធប្រឆាំងជំងឺផ្លូវដង្ហើមបង្កដោយកូរ៉ូណាវីរុសថ្មី (COVID-19) ។ សំណើនេះធ្វើឡើងក្នុងកិច្ចសន្ទនាតាមទូរសព្ទជាមួយប្រធានាធិបតីកូរ៉េខាងត្បូង មូន ចេអ៊ីន ។ លោក ត្រាំ ក៏ឆ្លៀតពោលសរសើរកូរ៉េខាងត្បូងដែលកំពុងមាននិន្នាការឆ្លង COVID-19 ធ្លាក់ចុះជាបន្តបន្ទាប់។

ប្រធានាធិបតីអាមេរិក ដូណាល់ ត្រាំ បានជជែកតាមទូរសព្ទជាមួយសមភាគីកូរ៉េខាងត្បូង មូន ចេអ៊ីន ដោយផ្ដោតលើកិច្ចសហប្រតិបត្តការទ្វេភាគីលើការប្រយុទ្ធប្រឆាំងជំងឺ COVID-19 ដែលកំពុងអុកឡុកប្រទេសទាំងពីរ ក៏ដូចជាពិភពលោក។ បើតាមវិមានប្រធានាធិបតីកូរ៉េខាងត្បូង កិច្ចសន្ទនាតាមទូរសព្ទរយៈពេល២៣នាទីនេះ ធ្វើឡើងក្រោយមានសំណើបន្ទាន់ពីលោក ត្រាំ ។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។

វិមាន Cheong Wa Dae របស់លោក មូន បានប្រកាសថា ក្នុងការជជែកគ្នានេះ លោក ត្រាំ បានបង្ហាញក្ដីសង្ឃឹមដែលកូរ៉េខាងត្បូងអាចផ្ដល់ការគាំទ្រដល់ជាសម្ភារពេទ្យឲ្យអាមេរិកដើម្បីដោះស្រាយវិបត្តិ COVID-19 ។ អ្នកនាំពាក្យវិមានប្រធានាធិបតីកូរ៉េខាងត្បូង លោក Kang Min-seok បញ្ជាក់ថា ជាការឆ្លើយតប លោក មូន ប្រាប់លោក ត្រាំ ថា កូរ៉េខាងត្បូង នឹងគាំទ្រអាមេរិកតាមលទ្ធភាពរបស់ខ្លួន ហើយជំនួយនេះ អាចត្រូវការការយល់ព្រមពីស្ថាប័នមានសមត្ថភាពរបស់អាមេរិកជាមុនដែរ។

ទាក់ទងនឹងការសុំភ្លើងបៃតងពីរដ្ឋបាលចំណីអាហារ និងឱសថ (FDA) ដែលគ្រប់គ្រងថ្នាំពេទ្យ លោក ត្រាំ អះអាងថា នឹងចាត់វិធានការភា្លមៗតែម្ដង។ អ្នកនាំពាក្យប្រធានាធិបតីកូរ៉េខាងត្បូងបន្តថា លោក ត្រាំ បានបង្ហាញចំណាប់អារម្មណ៍លើការធ្លាក់ចុះការឆ្លង COVID-19 គូរឲ្យកត់សម្គាល់នៅកូរ៉េខាងត្បូង និងនិយាយថា កូរ៉េខាងត្បូងកំពុងធ្វើបានល្អ។

តាមពិតទៅ កូរ៉េខាងត្បូង ទទួលបានការកោតសរសើរច្រើនពីសហគមន៍អន្តរជាតិចំពោះវិធានការមានប្រសិទ្ធភាពរបស់ខ្លួនក្នុងការទប់ស្កាត់ការឆ្លងបន្ថែម។ វិធានការលឿន មានប្រសិទ្ធភាព គួបផ្សំនឹងការទាញយកប្រយោជន៍ពីបច្ចេកវិទ្យាជឿនលឿនរបស់ខ្លួន និងការចូលរួមយ៉ាងសកម្មរបស់ប្រជាជន ជាកត្តាដែលកូរ៉េខាងត្បូងដែលធ្លាប់ជាប្រទេសរងគ្រោះខ្លាំង ប្រែទៅប្រទេសរងផលប៉ះពាល់មធ្យម ជាមួយនឹងករណីស្លាប់តិចតួច បើប្រៀបធៀបនឹងប្រទេសឯទៀត។

បើតាមវេបសាយ Worldometers ដែលផ្សាយពីទិន្នន័យឆ្លង COVID-19 អាមេរិកមានករណីឆ្លងសរុបជិត៥៥០០០ និងមានអ្នកស្លាប់៧៧៥នាក់ គិតត្រឹមថ្ងៃទី២៤ ខែមីនា។ នេះជាតួលេខឆ្លងដ៏ខ្ពស់មួយ បន្ទាប់ពីចិន និងអ៊ីតាលី។ ចំណែកកូរ៉េខាងត្បូងវិញ មានករណីឆ្លងទាំងអស់ជាង៩ពាន់ករណី និងករណីស្លាប់ចំនួន១២០នាក់ប៉ុណ្ណោះ។

ក្រៅពីអាមេរិក មន្ត្រីក្រសួងការបរទេសកូរ៉េខាងត្បូងអះអាងថា ប្រទេសចំនួន៤៧ បានស្នើសុំនាំចូលសម្ភារធ្វើតេស្ត ខណៈប្រទេស៣៩ទៀត សុំជាជំនួយតែម្ដង៕