COVID-19៖ Bill Gates រិះគន់លោកត្រាំរឿងចង់បើកប្រទេសឡើងវិញ

COVID-19

សេដ្ឋកិច្ច

អន្តរជាតិ

COVID-19៖ Bill Gates រិះគន់លោកត្រាំរឿងចង់បើកប្រទេសឡើងវិញ

26, Mar 2020 , 9:39 pm

រូបភាព

សហស្ថាបនិក Microsoft លោក Bill Gates និងប្រធានាធិបតីអាមេរិក លោក ដូណាល់ ត្រាំ

ដោយ:

សហស្ថាបនិកក្រុមហ៊ុនអាមេរិក Microsoft លោក Bill Gates បានរិះគន់ចំពោះគម្រោងបើកប្រទេសឡើងវិញរបស់ប្រធានាធិបតី ដូណាល់ ត្រាំ ដើម្បីជួយបន្ធូរបន្ថយផលប៉ះពាល់សេដ្ឋកិច្ច ទោះបីជាការជំងឺ COVID-19 បន្តរាតត្បាតកាន់តែខ្លាំងក្នុងសហរដ្ឋអាមេរិក។ ត្រង់ចំណុចនេះ មហាសេដ្ឋីរូបនេះ ចាត់ទុក គំនិតធ្វើបែបនេះ «ជាទង្វើគ្មានទំនួសខុសត្រូវ»។

លោក Bill Gates ពុំបាននិយាយឈ្មោះលោក ត្រាំ ចំៗនោះឡើយ ក៏ប៉ុន្តែប្រធានាធិបតីអាមេរិករូបនេះ កាលពីថ្មីៗនេះ បានលើកឡើងថា លោកមានបំណងឲ្យបណ្ដាអាជីវកម្មក្នុងសហរដ្ឋអាមេរិកបើកដំណើរការឡើងវិញ ត្រឹមថ្ងៃទី១២ ខែមេសាខាងមុខ។

ក្នុងបទសម្ភាសន៍មួយ កាលពីថ្ងៃអង្គារ ទី២៤ ខែមីនា លោក Gates លើកឡើងថា៖«វាពិតជាគ្មានមូលដ្ឋានច្បាស់លាស់ ហើយវាពិតជាពិបាកក្នុងការនិយាយទៅកាន់ប្រជាជនថា អ្នកអាចបន្តទៅភោជនីយដ្ឋាន, ទៅទិញផ្ទះថ្មី ដោយមិនខ្វល់ខ្វាយពីគំនរសាកសពនៅពាសពេញហ្នឹង»។

លោកបន្តថា៖«យើងចង់ឲ្យអ្នកបន្តចាយវាយ ព្រោះថាវាប្រហែលមាន អ្នកនយោបាយម្នាក់ដែលយល់ឃើញថា កំណើនសេដ្ឋកិច្ច គឺសំខាន់ផុតលេខ»។ ត្រង់ចំណុចនេះ មហាសេដ្ឋីអាមេរិកវ័យ៦៤ឆ្នាំរូបនេះ សង្កត់ធ្ងន់ថា វាពិតជាទង្វើគ្មានទំនួសខុសត្រូវសោះ សម្រាប់នរណាម្នាក់លើកឡើងបែបនេះ។

សាកសួរថា លោកនឹងធ្វើបែបណា ប្រសិនបើលោកក្លាយជាប្រធានាធិបតីនោះ លោក Bill Gates បានត្រលប់ទៅបកស្រាយបន្ថែមជុំវិញកង្វល់របស់លោកអំពីការបើកសេដ្ឋកិច្ចឡើងវិញ។ លោកនិយាយដូច្នេះថា៖«ផលប៉ះពាល់លើសេដ្ឋកិច្ច ពិតជារឿងគួរឲ្យកត់សម្គាល់»។ ក៏ប៉ុន្តែ លោក សង្កត់ធ្ងន់ថា ការបើកសេដ្ឋកិច្ចឡើងវិញ វានឹងប៉ះពាល់ដល់អាយុជីវិតប្រជាជនអាមេរិក។

«ម្ល៉េះហើយ យើងនឹងព្រមទទួលយកការឈឺចាប់ក្នុងក្របខណ្ឌសេដ្ឋកិច្ច ក្នុងគោលដៅបន្ធូរបន្ថយការឈឺចាប់ក្នុងក្របខណ្ឌសុខភាពនិងការស្លាប់»។ លោកមហាសេដ្ឋី Bill Gates អះអាងបែបនេះ ដោយបន្ថែមថា គោលដៅចម្បងរបស់លោកគឺរក្សាពលរដ្ឋនៅជុំវិញសហរដ្ឋអាមេរិកក្នុងភាពដាច់ដោយឡែកដើម្បីបន្ថយការរាលដាល COVID-19 ។

សហស្ថាបនិក Microsoft រូបនេះ ពន្យល់ថា៖«ប្រសិនបើអ្នកធ្វើរឿងដាក់នៅដាច់ដោយឡែកនេះ ត្រឹមត្រូវ នៅទូទាំងប្រទេសនោះ ក្នុងអំឡុងពេល២០ថ្ងៃ អ្នកនឹងមើលឃើញតួលេខករណីឆ្លង ពិតជាផ្លាស់ប្តូរ។ វានឹងធ្លាលើចុះ ហើយនេះគឺជាសញ្ញាមួយដែលអ្នកឈានទៅរកភាពជោគជ័យប្រឆាំង COVID-19 »។

អត្ថបទទាក់ទង

មួយថ្ងៃ ស្លាប់ជាង២០០នាក់ដោយសារ COVID-19 ជាតួលេខខ្ពស់បំផុតនៅអាមេរិក

សូមបញ្ជាក់ថា បច្ចុប្បន្ន មនុស្សយ៉ាងហោចណាស់ ១៧៩លាននាក់ក្នុងរដ្ឋ១៨, តំបន់ ៣១ និងក្រុង ១២ របស់សហរដ្ឋអាមេរិក កំពុងត្រូវបានទទូចឲ្យស្នាក់នៅផ្ទះ។ នេះបើតាមការចុះផ្សាយរបស់កាសែតអាមេរិក New York Times ។ គិតមកត្រឹមថ្ងៃព្រហស្បតិ៍ ២៦ ខែមីនា ករណីស្លាប់ដោយសារ COVID-19 ក្នុងសហរដ្ឋអាមេរិក មានលើសមួយពាន់នាក់ ខណៈករណីឆ្លងសរុបមានជាង ៦៥០០០នាក់។ អ្នកជាសះស្បើយមានជិត៤រយនាក់៕

សូមទស្សនាបទសម្ភាសន៍របស់លោក Bill Gates ជាមួយ TED ៖