COVID-19
អន្តរជាតិ
គ្រូពេទ្យហ្វីលីពីន៩នាក់ ស្លាប់ដោយសារ COVID-19 ខណៈបរិក្ខារពេទ្យខ្វះខាត គ្រូពេទ្យម្នាក់ពាក់ម៉ាស់ ហើយកាន់ក្រដាសមួយសន្លឹកសរសេរថា «ប្រយុទ្ធប្រឆាំង COVID-19» ដោយការធានាសុវត្ថិភាពបុគ្គលិកសុខាភិបាល នៅមន្ទីរពេទ្យមួយ នាក្រុង ម៉ានីល ហ្វីលីពីន(AFP)
× វេជ្ជបណ្ឌិតហ្វីលីពីន៩នាក់ បានបាត់បង់ជីវិតដោយសារជំងឺផ្លូវដង្ហើម COVID-19 ។ សមាគមវេជ្ជសាស្ត្រហ្វីលីពីន បញ្ជាក់បែបនេះនៅថ្ងៃព្រហស្បតិ៍ ២៦ ខែមីនា ខណៈមន្ទីរពេទ្យជាច្រើនកន្លែងទទួលអ្នកជំងឺច្រើនសន្ធឹកសន្ធាប់ ហើយក្រុមគ្រូពេទ្យត្អូញត្អែររឿងខ្វះខាតបរិក្ខារពេទ្យសម្រាប់ការពារនៅជួរមុខ។
នៅថ្ងៃព្រហស្បតិ៍នេះ សមាគមវេជ្ជសាស្ត្រហ្វីលីពីន បានប្រកាសថា គ្រូពេទ្យ៩នាក់បានស្លាប់ដោយសារ COVID-19 ហើយបុគ្គលិកសុខាភិបាលកំពុងខ្វះខាតសម្ភារការពារ។ យ៉ាងណាមិញ សមាគមនេះ ពុំបានបញ្ជាក់ពីអាយុ ភេទឬអត្តសញ្ញាណច្បាស់លាស់របស់គ្រូពេទ្យដែលស្លាប់ទាំង៩នាក់នេះឡើយ។
ប្រាប់ទីភ្នាក់ងារព័ត៌មាន AFP អនុប្រធានសមាគមនេះ លោក Benito Atienza អះអាងដូច្នេះថា៖«ប្រសិនបើខ្ញុំជាអ្នកសម្រេចចិត្តមែននោះ ខ្ញុំនឹងធ្វើតេស្តគ្រូពេទ្យជួរមុខ មុនគេ និងធ្វើតេស្តពួកគេម្ដងទៀត ៧ថ្ងៃបន្ទាប់។ គ្រូពេទ្យ អាចជាអ្នកមានផ្ទុកវីរុសតែម្ដង»។
ម្យ៉ាងវិញទៀត មន្ទីរពេទ្យធំៗចំនួន ៣ ក្នុងរដ្ឋធានី ម៉ានីល បានប្រកាស កាលពីថ្ងៃពុធ ២៥ ខែមីនាថា មន្ទីរពេទ្យពួកគេបានឈានដល់ចំណុះពេញ ហើយលែងអាចទទួលយកអ្នកជំងឺ COVID-19 ថ្មីទៀតផងដែរ។ បើតាម AFP មន្ទីរពេទ្យទាំងនោះ សង្កត់ធ្ងន់ថា បុគ្គលិកសុខាភិបាលរាប់រយនាក់ លែងអាចទទួលមើលថែ និងព្យាបាលអ្នកជំងឺតទៅទៀតហើយ ព្រោះថា ពួកគេកំពុងធ្វើចត្តាឡីស័កខ្លួនឯង១៤ថ្ងៃ ក្រោយសង្ស័យថាឆ្លងវីរុសនេះ។
ការប្រកាសករណីស្លាប់របស់គ្រូពេទ្យនេះ បានបង្កើនភាពភ័យខ្លាចថា វិសាលភាពនៃវិបត្តិសុខាភិបាលក្នុងប្រទេសហ្វីលីពីន គឺអាក្រក់ខ្លាំងជាងអ្វីដែលត្រូវបានប្រកាសជាផ្លូវការ។ គិតត្រឹមថ្ងៃព្រហស្បតិ៍ ទី២៦ ខែមីនា ប្រទេស ហ្វីលីពីន មានករណីឆ្លង COVID-19 ៧០៧ នាក់ ក្នុងនោះករណីថ្មី ៧១នាក់។ អ្នកស្លាប់ឡើងដល់៤៥នាក់ ហើយជាសះស្បើយមាន ២៨នាក់៕
Tag:
ហ្វីលីពីន
COVID-19
គ្រូពេទ្យ
មន្ទីរពេទ្យ
© រក្សាសិទ្ធិដោយ thmeythmey.com