COVID-19
អន្តរជាតិ
អង់តាកទិច ជាទ្វីបដែល COVID-19 មិនបានទៅដល់ អ្នកទេសចរ ជិះកម្សាន្តលើទឹកនៅទ្វីបអង់តាកទិច (AFP)
× ទោះបីជាព័ត៌មានអំពីករណីឆ្លងជុំវិញជំងឺផ្លូវដង្ហើម COVID-19 កំពុងរីករាលដាលទូទាំងពិភពលោកយ៉ាងរហ័សក៏ពិតមែន នៅមានទ្វីបមួយដែលមិនទាន់បានប្រកាសករណីនៃការឆ្លងវីរុសប្រភេទនេះនៅឡើយទេ។ វាគឺជាទ្វីបមួយដែលគ្របដណ្តប់ដោយទឹកកក ភាពរងា និងងងឹតសឹងតែពេញកន្លះឆ្នាំ។ នេះគឺជាទ្វីបអង់តាកទិចដែលជាដែនដីចុងក្រោយនៃទិសខាងត្បូង។
ក្នុងរយៈពេលប្រមាណខែចុងក្រោយនេះ មនុស្សប្រមាណ៤០០០នាក់ កំពុងតាមដានព័ត៌មានអំពីការឆ្លងនៃវីរុស COVID-19 ពីចំងាយនៅឯទ្វីបអង់តាកទិច។ ការឆ្លងដែលចាប់ផ្តើមឡើងនៅក្នុងទីក្រុងវូហាន បានធ្វើដំណើររហូតទៅដល់គ្រប់ទិសទី លើកលែងតែទ្វីបអង់តាកទិចមួយប៉ុណ្ណោះ។
កាសែតអាមេរិក The Washington Post ចុះផ្សាយកាលពីថ្ងៃទី២៤ ខែមីនានេះ បាននិយាយថា ទោះបីជាក្នុងកាលៈទេសៈធម្មតាក្តី ការចេញចូលទ្វីបមួយនេះគឺជារឿងដែលតឹងតែងបំផុត ជាមួយនឹងការពិនិត្យសុខភាពយ៉ាងច្បាស់លាស់ពីសំណាក់អ្នកជំនាញ។ ត្រង់ចំណុចនេះ លោក Della Rovere ដែលជាអ្នកដឹកនាំក្រុមស្រាវជ្រាវជនជាតិអ៊ីតាលប្រចាំទ្វីបអង់តាកទិចបាននិយាយថា៖«ក្នុងពេលនេះ អង់តាកទិចគឺជាកន្លែងដែលមានសុវត្ថិភាពជាងគេនៅក្នុងពិភពលោក»។
ជាទូទៅ អ្នកធ្វើដំណើរទៅទ្វីបអង់តាកទិចគឺជាក្រុមអ្នកជំនាញ ឬអ្នកស្រាវជ្រាវដែលធ្វើការស្នាក់នៅក្នុងស្ថានីយពិសោធន៍ធំៗក្នុងនោះមានដូចជា McMurdo Station និង Amundsen-Scott South Pole Station ។ អ្នករស់នៅក្នុងទ្វីបនេះប្រហែលជាមិនងាយទទួលការចម្លងពីវីរុសមួយនេះទេ។ ប៉ុន្តែប្រសិនបើវីរុសនេះបានឆ្លង នោះពួកគេនឹងមានភាពប្រឈមខ្លាំង។ អ្នកជំនាញទាំងនោះអាចគ្រប់គ្រងជំងឺផ្សេងៗបាន តែចំពោះ COVID-19 វាមិនមែនជារឿងដែលងាយស្រួលប៉ុន្មាននោះទេ។
ទ្វីបអង់តាកទិចគឺជាទ្វីបដែលពិបាករស់នៅខ្លាំងណាស់ជាពិសេសនារដូវរងាខ្លាំង និងអ្នកស្រាវជ្រាវភាគច្រើនបានត្រលប់ទៅកាន់ប្រទេសកំណើតមុនពេលដែលរដូវក្តៅឈានចូលមកដល់វិញមកវិញ។ បើតាម កាសែតអាមេរិកដដែលនេះ លោក Mike Brian ដែលជាអ្នកស្រាវជ្រាវម្នាក់នៅឯស្ថានីយ Rothera របស់ប្រទេសអង់គ្លេសបានបញ្ជាក់ថា ការងារត្រូវបានគេអនុវត្តឡើងជាធម្មតា បើទោះបីជាវីរុសនេះបាននឹងកំពុងបង្កភាពចលាចលនៅតាមតំបន់ផ្សេងៗទៀតក៏ដោយ។ ជីវិតនៅទីនេះពិតជាមានភាពឯកោខ្លាំងណាស់ ឆ្ងាយពីទីប្រជុំជនធំៗរបស់មនុស្ស ហើយវេជ្ជបណ្ទិតដែលប្រចាំការនៅទីនោះក៏មិនមានច្រើននោះដែរ ជាមួយនឹងការចេញចូលមានកំណត់តាមរយៈយន្តហោះ ឬនាវាក្នុងមួយឆ្នាំៗ។
ទ្វីបអង់តាកទិចមិនមានចំនួនពលរដ្ឋច្បាស់លាស់ឡើយ ប៉ុន្តែមានវត្តមានអ្នកលេងពី១០០០ទៅ៥០០០នាក់ទៅតាមរដូវកាល។ ទោះបីជាយ៉ាងណាក៏ដោយ ទ្វីបនេះ មានការបែងចែកដែនដី ដែលគ្រប់គ្រងដោយ អាហ្សង់ទីន អូស្ត្រាលី ស៊ីលី បារាំង នូវែលសេឡង់ ន័រវេស និងចក្រភពអង់គ្លេស ជាដើម៕
© រក្សាសិទ្ធិដោយ thmeythmey.com