COVID-19
អន្តរជាតិ
ចិនផ្អាកជនបរទេសចូលបណ្ដោះអាសន្ន ខណៈករណីឆ្លង COVID-19 ពីខាងក្រៅកើនឡើង
× រដ្ឋាភិបាលចិន នឹងផ្អាកជាបណ្តោះអាសន្ននូវការចូលមកដល់របស់ជនបរទេសដែលកាន់ទិដ្ឋការចិន ឬលិខិតអនុញ្ញាតឲ្យរស់នៅក្នុងប្រទេសខ្លួន ដែលនៅមានសុពលភាពគិតត្រឹមថ្ងៃប្រកាសនេះ។ ចំណាត់ការនេះ នឹងចូលជាធរមាន ចាប់ពីថ្ងៃទី២៨ ខែមីនា តទៅ។
ក្រសួងការបរទេសចិន បានបញ្ជាក់ពីវិធានការនេះក្នុងសេចក្តីថ្លែងការណ៍ដែលចុះផ្សាយថ្ងៃទី២៦ ខែមីនា ដោយបានកត់សម្គាល់ពីការរីករាលដាលយ៉ាងឆាប់រហ័សនៃជំងឺផ្លូវដង្ហើម COVID-19 នៅជុំវិញពិភពលោក។ ត្រង់ចំណុចនេះ ក្រសួងការបរទេសចិន អះអាងដូច្នេះថា៖«ការផ្អាកនេះ គឺជាចំណាត់ការបណ្ដោះអាសន្នមួយ ដែលចិនត្រូវបង្ខំចិនធ្វើនៅចំពោះមុខស្ថានការណ៍នៃការរាតត្បាតវីរុស»។
យ៉ាងណាមិញ មន្ត្រីការទូត និងបុគ្គលិកអាកាសចរណ៍អន្តរជាតិនិងនាវា ត្រូវបានលើកលែង ដោយពួកគេនៅតែត្រូវបានអនុញ្ញាតឲ្យចូលក្នុងប្រទេសចិន។ នេះបើតាមសេចក្តីថ្លែងការណ៍ដដែល។ ដោយឡែក ជនបរទេសដែលចូលមកក្នុងប្រទេសចិនសម្រាប់សកម្មភាពសេដ្ឋកិច្ច ឬពាណិជ្ជកម្មចាំបាច់, សកម្មភាពស្រាវជ្រាវ ឬបច្ចេកវិទ្យា, និងតម្រូវការមនុស្សធម៌ ជាដើម នឹងត្រូវដាក់ពាក្យសុំទិដ្ឋការនៅស្ថានទូត ឬស្ថានកុងស៊ុលចិន។
ម្យ៉ាងវិញទៀត ជើងហោះហើរចេញពីប្រទេសចិន នឹងត្រូវកំណត់មកត្រឹមមួយជើងប៉ុណ្ណោះក្នុងសប្តាហ៍ទៅកាន់ប្រទេសនីមួយៗ ខណៈក្រុមហ៊ុនអាកាសចរណ៍អន្តរជាតិ ក៏ត្រូវបានអនុញ្ញាតឲ្យហោះហើរត្រឹមមួយផ្លូវប៉ុណ្ណោះ។ នេះបើតាមសេចក្តីថ្លែងការណ៍ដដែល ដោយបន្ថែមថា ការកំណត់នេះ នឹងចូលជាធរមាននាថ្ងៃ២៩ ខែមីនាខាងមុខ។
តាមការចុះផ្សាយរបស់ទីភ្នាក់ងារព័ត៌មាន AFP រដ្ឋបាលអាកាសចរណ៍ស៊ីវិលចិន ក៏បានបញ្ជាក់ដែរថា អ្នកដំណើរលើជើងហោះហើរចូល-ចេញពីប្រទេសចិន នឹងមិនត្រូវឲ្យលើស៧៥ភាគរយឡើយ ខណៈជើងហោះហើរអន្តរជាតិដែលឆ្ពោះទៅកាន់រដ្ឋធានី ប៉េកាំង នឹងត្រូវបង្វែរទិសទៅទៅកាន់មជ្ឈមណ្ឌលប្រជុំជនផ្សេងដទៃទៀត។
បច្ចុប្បន្ន ទីក្រុងចិន ជាច្រើន ដូចជា ប៉េកាំង និងសៀងហៃ បានដាក់ឲ្យអ្នកដំណើរពីបរទេសទាំងអស់ធ្វើចត្តាឡីស័ករយៈពេល១៤ថ្ងៃ។ ក្នុងសប្តាហ៍នេះ មានជើងហោះហើរអន្តរជាតិជិត១១០០ជើងដែលគ្រោងហោះឆ្ពោះមកកាន់ប្រទេសចិន។
សូមបញ្ជាក់ថា ប្រទេសចិន ពុំបានរាយការណ៍ករណីឆ្លង COVID-19 ក្នុងស្រុកថ្មី ពីរថ្ងៃជាប់គ្នាហើយ ក៏ប៉ុន្តែមន្ត្រីសុខាភិបាលចិន បានលើកឡើងជាកង្វល់ជុំវិញករណីឆ្លងដែលនាំចូលពីក្រៅប្រទេស ដែលគិតត្រឹមពេលនេះ លើស ៥០០ករណីហើយ៕
Tag:
ចិន
ក្រសួងការបរទេស
ជនបរទេស
© រក្សាសិទ្ធិដោយ thmeythmey.com