COVID-19
អន្តរជាតិ
ប្រមុខកងទ័ពហ្វីលីពីន ឆ្លងCOVID-19 នាយសេនាធិការយោធា លោក Felimon Santos Jr , រូបភាព៖ UNTV
× នាយសេនាធិការយោធាហ្វីលីពីន លោកឧត្តមសេនីយ៍ Felimon Santos Jr ត្រូវបានគេធ្វើតេស្តរកឃើញថាមានផ្ទុក ជំងឺរលាកសួត ដែលបង្កដោយកូរ៉ូណាវីរុស (COVID-19)។ នាថ្ងៃទី២៧ ខែមីនា មេបញ្ជាការរូបនេះ ត្រូវបានគេដាក់ចត្តាឡីស័ក ដើម្បីព្យាបាលជំងឺ។
តាមរយៈសេចក្តីថ្លែងការណ៍កងកម្លាំងយោធាហ្វីលីពីន នាយសេនាធិការយោធា លោក Felimon Santos Jr ដែលធ្វើតេស្តនាថ្ងៃទី២៣ ខែមីនា ត្រូវបានគេរកឃើញថាមានផ្ទុកCOVID-19 នាថ្ងៃទី២៧ ខែមីនា។ ការរកឃើញនេះ ធ្វើឡើងបន្ទាប់ពីលោកSantos បានចូលរួមធ្វើជាអធិបតី ក្នុងពិធីបំពាក់សក្តិឲ្យមន្ត្រីយោធាជនខ្ពស់ម្នាក់ ដែលក្រោយមករកឃើញថាមានផ្ទុក COVID-19។ នេះបើតាមការចុះផ្សាយរបស់សារព័ត៌មាន CNN Philippines។
យ៉ាងណាក៏ដោយ ពេលនេះ លោកSantos កំពុងមានស្ថានភាពសុខភាពល្អប្រសើរនៅឡើយទេ។ បើទោះបីជាមានផ្ទុកCOVID-19មែន លោក Santos នឹងបន្តធ្វើការពីកន្លែងបន្ទាយទាហានរបស់ខ្លួន។ ចំណែកការងារលើវ័ស័យកងទ័ព លោកនៅតែមានតួនាទី និងទទួលបន្ទុកដដែល។
បន្ទាប់ពីតេស្តរកឃើញសញ្ញាវិជ្ជមានលើនាយសេនាធិការយោធាហ្វីលីពីនរូបនេះ មន្ត្រីយោធាជាន់ខ្ពស់ហ្វីលីពីន និងមនុស្សផ្សេងទៀត ដែលធ្លាប់មានទំនាក់ទំនងជាមួយគ្នា ក៏បានដាក់ចត្តាឡីស័កខ្លួនឯងដែរ ដើម្បីការពារករណីឆ្លង។
សូមបញ្ជាក់ថា គិតត្រឹមថ្ងៃទី២៧ ខែមីនា ហ្វីលីពីន មានករណីCOVID-19 សរុបចំនួន ៧០៧ករណី។ ក្នុងចំនួននេះ មានអ្នកស្លាប់ ៤៥ករណី និង ២៨ករណីជាសះស្បើយ៕
Tag:
ហ្វីលីពីន
COVID-19
© រក្សាសិទ្ធិដោយ thmeythmey.com