អាជ្ញាធរ អះអាងថា គ្មានអ្នកស្លាប់ដោយសារកូវីដ-១៩ និងបិទផ្សារជម្ពូវ័នឡើយ

COVID-19

ជាតិ

សង្គមជាតិ

អាជ្ញាធរ អះអាងថា គ្មានអ្នកស្លាប់ដោយសារកូវីដ-១៩ និងបិទផ្សារជម្ពូវ័នឡើយ

27, Mar 2020 , 10:19 pm

រូបភាព

កម្មភាពលក់និងទិញរបស់អាជីវករនិងប្រជាពលរដ្ឋក្នុងផ្សារជម្ពូវ័ន, រូបភាពពីប្រធានគណៈកម្មការផ្សារជម្ពូវ័ន

ដោយ:

លោក ហែម ដារិទ្ធិ អភិបាលខណ្ឌពោធិ៍សែនជ័យ អះអាងថា គ្មានករណីស្លាប់ ដោយសារជំងឺកូវីដ-១៩ ក្នុងផ្សារជម្ពូវ័ននោះទេ ហើយក៏គ្មានការបិទផ្សារនេះដែរ។ ការចេញមកអះអាងរបស់អភិបាលខណ្ឌរូបនេះ ធ្វើឡើងក្រោយមានជនអនាមិក បានផ្ញើសារជាសំឡេងដោយនិយាយថា មានអ្នកលក់ទូរសព្ទម្នាក់ស្លាប់ដោយសារកូវីដ-១៩ នៅផ្សារជម្ពូវ័ន។

អភិបាលខណ្ឌពោធិ៍សែនជ័យ លោក ហែម ដារិទ្ធិ នៅយប់ថ្ងៃទី២៦ ខែមីនា ឆ្នាំ២០២០ បានចេញមកផ្សាយផ្ទាល់លើហ្វេសប៊ុកថា ហើយច្រានចោលព័ត៌មាននេះ។ លោក បញ្ជាក់ថា៖«មានជនអគតិមួយចំនួនបានដើរនិយាយនិងបង្ហោះសារតាមបណ្តាញសង្គមនានា បំពុលព័ត៌មានថា នៅខណ្ឌពោធិ៍សែនជ័យ នៅផ្សារជម្ពូវ័នមានករណីអ្នកលក់ទូរសព្ទម្នាក់ស្លាប់ដោយសារកូវីដ-១៩ ហើយបងប្អូន៤-៥នាក់ ត្រូវបានដឹកយកទៅដោយស្ងាត់ៗ។ ចំពោះករណីនេះ ខ្ញុំសុំបញ្ជាក់ថា គ្មានករណីបែបនេះឡើយ ហើយផ្សារជម្ពូវ័នរបស់យើងនៅបើកដំណើរការដូចធម្មតា»។

ជាមួយគ្នានេះ គណនីហ្វេសប៊ុកឈ្មោះ ប្រធានគណៈកម្មការផ្សារជម្ពូវ័ន ក៏បានបង្ហោះសារច្រានចោលពាក្យចចាមអារ៉ាមនេះផងដែរ។ គណនីនេះ បានរៀបរាប់ដូច្នេះថា៖«ខ្ញុំបាទ ប្រធានគណៈកម្មការផ្សារជម្ពូវ័ន សូមច្រានចោលពាក្យចចាមអារ៉ាមថា នៅផ្សារជម្ពូវ័នមានករណីអ្នកលក់ទូរស័ព្ទស្លាប់ដោយជំងឺកូវីដ-១៩ ហើយផ្សារបិទទាំងស្រុង នេះគឺជាព័ត៌មានមិនពិត មិនមានករណីស្លាប់ដោយការឆ្លងជំងឺកូវីដ-១៩ នោះទេ ហើយផ្សារនៅបើកលក់ជាធម្មតា»។

សូមបញ្ជាក់ថា គិតត្រឹមយប់ថ្ងៃទី២៦ ខែមីនា ឆ្នាំ២០២០ កម្ពុជា ធ្វើតេស្តវិជ្ជមានវីរុសកូវីដ-១៩ លើមនុស្ស៩៨នាក់ហើយ តែមាន១១នាក់ បានជាសះស្បើយវិញ៕