COVID-19
កីឡាអន្តរជាតិ
អន្តរជាតិ
សហព័ន្ធកីឡាបាល់ទាត់អេស្ប៉ាញ ត្រៀម៥៦០លានដុល្លារ ជួយក្លិបជួបវិបត្តិព្រោះ COVID-19
× សហព័ន្ធកីឡាបាល់ទាត់អេស្ប៉ាញ (RFEF) នឹងបញ្ចេញប្រាក់បរិច្ចាគរបស់ខ្លួនចំនួន ៥០០ លានអឺរ៉ូ (៥៦០លានដុល្លារអាមេរិក) ដើម្បីជួយក្លិបដែលជួបការលំបាកផ្នែកហិរញ្ញវត្ថុ ដោយសារការរាតត្បាតនៃជំងឺ COVID-19។
ប្រាក់ដ៏ច្រើនសន្ធឹកនេះ នឹងជួយដល់ក្លិបណាដែលមិនអាចទទួលបានថ្លៃពីការទទួលបានសិទ្ធិផ្សាយតាមទូរទស្សន៍នានា អំឡុងពេលផ្អាកការប្រកួតដែលនៅសេសសល់រដូវកាលនេះ។ យ៉ាងណាក៏ដោយ ក្លិបទាំងអស់នោះនឹងត្រូវសងទៅឲ្យសហព័ន្ធវិញក្នុងរយៈពេលប្រាំឆ្នាំ។
ក្រៅពីប្រាក់ជំនួយសម្រាប់ក្រុមអាជីព RFEF ក៏បានសន្យាផ្តល់ប្រាក់កម្ចីចំនួន ៤ លានអឺរ៉ូ (៤,៥៤លានដុល្លារអាមេរិក) ដល់ក្រុមកីឡាករ និងកីឡាការិនីបាល់ទាត់មិនអាជីពផងដែរ។
«យើងចង់អង្គុយពិភាក្សាជាមួយ La Liga អំពីបញ្ហាដែលក្លិបមួយចំនួនអាចនឹងជួបក្នុងពេលមានវិបត្តិនេះ។ សាររបស់ខ្ញុំនេះគឺជាក្តីសង្ឃឹមនិងវិន័យ។ ក្នុងវិស័យបាល់ទាត់គ្រប់កម្រិតទាំងអស់គួរតែមានសាមគ្គីភាពជាមួយគ្នា ហើយយើងនឹងបញ្ឈប់វីរុសនេះ»។ លោក Luis Rubiales ប្រធាន RFEF លើកឡើងដូច្នេះ។
ចំនួនអ្នកស្លាប់នៅអេស្ប៉ាញដោយសារ COVID-19 បានវ៉ាដាច់ចិនដែលជាប្រភពជំងឺក្នុងចំនួន ៤៣៦៥នាក់ គិតត្រឹមថ្ងៃទី២៧ ខែមីនានេះ។ ដោយឡែកអ្នកឆ្លងមាន ៥៧៧៨៦ករណី និងសះស្បើយ ៧០១៥ករណី។ អេស្ប៉ាញជាប្រទេសទី២នៅអឺរ៉ុប ដែលមានអ្នកឆ្លង និងស្លាប់ច្រើនជាងគេបន្ទាប់ពីអ៊ីតាលី។
ប្រធាន RFEF អះអាងទៀតថា នឹងផ្តល់ការប្រើប្រាស់សណ្ឋាគារ និងបុគ្គលិករបស់ក្រុមជម្រើសជាតិរួមទាំងគ្រូពេទ្យព្យាបាលរោគជូនដល់សេវាសុខភាពរបស់ប្រទេសអេស្ប៉ាញផងដែរ៕
លោក Luis Rubiales ប្រធានសហព័ន្ធកីឡាបាល់ទាត់អេស្ប៉ាញ (RFEF)
Tag:
COVID-19
RFEF
Luis Rubiales
© រក្សាសិទ្ធិដោយ thmeythmey.com