G20 សន្យាចាក់បញ្ចូលលុយ៥ទ្រីលានដុល្លារទៅក្នុងសេដ្ឋកិច្ចសាកលទប់ទល់វិបត្តិ COVID-19

COVID-19

អន្តរជាតិ

នយោបាយអន្តរជាតិ

G20 សន្យាចាក់បញ្ចូលលុយ៥ទ្រីលានដុល្លារទៅក្នុងសេដ្ឋកិច្ចសាកលទប់ទល់វិបត្តិ COVID-19

28, Mar 2020 , 8:30 am

រូបភាព

រូបភាព៖ Gary Ramage—Pool, Getty Images

ដោយ: ធៀន ភារិន្ទ

ក្រុមប្រទេសសេដ្ឋកិច្ចនាំមុនទាំង ២០ (G20) នាថ្ងៃទី២៦ ខែមីនា សន្យាចាក់បញ្ចូលទឹកប្រាក់ជាង ៥ពាន់លានដុល្លារ ចូលទៅក្នុងសេដ្ឋកិច្ចពិភពលោក ដើម្បីជួយដោះស្រាយបញ្ហាសេដ្ឋកិច្ចសកល ដែលកំពុងតែប្រឈមជាមួយជំងឺរលាកសួត ដែលបង្កដោយកូរ៉ូណាវីរុស (COVID-19) ។ ក្រុមប្រទេសមួយនេះ ក៏បានសន្យារួមគ្នាប្រយុទ្ធប្រឆាំងជាមួយ COVID-19 ផងដែរ។

គិតត្រឹមថ្ងៃទី២៦ ខែមីនា COVID-19 បានរីកសាយភាយ ទៅប្រទេស និងតំបន់ជាច្រើនលើពិភពលោក និងមានមនុស្សជាច្រើនម៉ឺននាក់បានឆ្លង និងស្លាប់ដោយសារកូរ៉ូណាវីរុស។ ដើម្បីទប់ស្កាត់ជំងឺឆ្លងមួយនេះរដ្ឋាភិបាលជាច្រើន បានចាប់ផ្តើមចាត់វិធានការជាបន្តបន្ទាប់ ។ វិធានការបិទប្រទេសទាំងស្រុង ឬមួយផ្នែក ត្រូវបានរដ្ឋាភិបាលប្រទេសមួយចំនួនអនុវត្តជាបន្តបន្ទាប់។ បញ្ហានេះ បានបង្កឲ្យមនុស្សជា១ ភាគ៣ នៃប្រជាជនសកល ត្រូវស្នាក់នៅផ្ទះបណ្តោះអាសន្ន បូករួមទាំងអត្រាអត់ការធ្វើកាន់តែកើនខ្ពស់ កន្លែងការងារមួយចំនួន ត្រូវបិទ ឬផ្អាកជាដើម។

តាមរយៈកិច្ចប្រជុំជា Video Conference ប្រមុខរដ្ឋាភិបាល ប្រមុខរដ្ឋ នៃក្រុមប្រទេស G20 បានជួបគ្នា ដើម្បីពិភាក្សាពីបញ្ហាសេដ្ឋកិច្ចសកល ដែលកំពុងប្រឈម ដោយសារ COVID-19។ តាមរយៈសេចក្តីថ្លែងការណ៍រួម ក្រុមប្រទេស G20 បានសន្យាចាក់បញ្ចូលទឹកប្រាក់ជាង ៥ទ្រីលានដុល្លារ ទៅក្នុងសេដ្ឋកិច្ចសកល ដើម្បីបញ្ចៀសវិបត្តិផ្សេងៗ។ ទឹកប្រាក់ដ៏ច្រើនបែបនេះ គឺជាផ្នែកមួយនៃគោលនយោបាយសារពើពន្ធ វិធានការសេដ្ឋកិច្ច និងការធានាលើការប៉ះពាល់សេដ្ឋកិច្ចដោយសារ COVID-19។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។

បន្ថែមពីលើនេះ មេដឹកនាំ G20 ក៏បានសន្យារួមគ្នាជាធ្លុងមួយ ដើម្បីប្រយុទ្ធប្រឆាំងCOVID-19 និងជួយសង្គ្រោះប្រទេសកំពុងអភិវឌ្ឍផងដែរ ក្នុងការប្រយុទ្ធជាមួយវីរុសថ្មីនេះ។ តាមរយៈកិច្ចសន្ទនារយៈពេល ៩០នាទី មេដឹកនាំទាំងអស់ បានយល់ព្រមថា៖ « យើងប្តេជ្ញារួមគ្នាជាធ្លុងមួយ ប្រយុទ្ធប្រឆាំងនឹងការគំរាមកំហែងរួមគ្នា (COVID-19) មួយនេះ»។

ជាមួយគ្នានេះដែរ ក្រុមប្រទេសសេដ្ឋកិច្ចនាំមុខទាំង២០ ក៏មានបញ្ហាព្រួយបារម្ភលើតំបន់មួយចំនួនផងដែរ ដែលកំពុងតែមានបញ្ហា ប្រព័ន្ធសុខាភិបាលចុះខ្សោយ មានប្រពន្ធនយោបាយ និងសេដ្ឋកិច្ចមិនរឹងមាំ ដូចជាបណ្តាប្រទេសមួយចំនួន នៅទ្វីបអាហ្វ្រិកជាដើម។

កិច្ចប្រជុំ G20 ដែលមានអារ៉ាប៊ី សាអូឌីតជាម្ចាស់ផ្ទះ ធ្វើឡើងក្នុងអំឡុងពេលមតិសាធារណៈ បានរិះគន់ថា ក្រុមប្រទេស G20 មានការឆ្លើយតបយឺត ជុំវិញការរាតត្បាត COVID-19 នៅជុំវិញពិភពលោក។

សូមបញ្ជាក់ថា អគ្គនាយកអង្គការសុខភាពពិភពលោក Tedros Adhanom Ghebreyesus បានព្រមានក្រុមប្រទេសG20 ថា COVID-19 កំពុងមានល្បឿនរីកសាយភាយយ៉ាងលឿន ដែលនេះទាមទារឲ្យប្រទេសនាំមុខទាំងអស់ ពន្លឿនការផលិតសម្ភារវេជ្ជសាស្ត្រ សម្ភារការពារមួយចំនួន និងហាមរឹតត្បិតការនាំចេញសម្ភារទាំងនេះទៅបរទេស៕