COVID-19
កីឡាអន្តរជាតិ
អន្តរជាតិ
COVID-19៖ FA បញ្ចប់លីគចំនួន៣ នារដូវកាលនេះ ដោយគ្មានការកាត់ចោលក្រុម
× សហព័ន្ធកីឡាបាល់ទាត់អង់គ្លេស (FA) បានបញ្ជាក់ថា រាល់ការប្រកួតបាល់ទាត់នៅអង់គ្លេសដែលស្ថិតក្រោមការគ្រប់របស់លីគអង់គ្លេសចំនួន៣កម្រិតនឹងត្រូវបញ្ចប់ ហើយរាល់លទ្ធផលទាំងអស់នឹងត្រូវទុកជាអសារបង់។ ដោយឡែក ពានរង្វាន់ FA Cup រដូវកាលនេះក៏កំពុងពិភាក្សាដើម្បីបញ្ចប់ការប្រកួតផងដែរ ដោយសារការរាតត្បាតរបស់ COVID-19។
ការសម្រេចលុបចោលនេះ មានន័យថានឹងមិនមានក្រុមណានៅលីគក្រោមឈានទៅលីគបន្ទាប់ ឬការកាត់ចោលទៅលីគក្រោមនោះឡើយ។ សម្រាប់ការប្រកួតរបស់ក្រុមស្ត្រីក្រោមកម្រិត Super League និង Championship ត្រូវលុបចោលដូចគ្នា។
លើសពីនេះ FA លើកឡើងថាស្ថាប័នខ្លួនក៏កំបុងពិនិត្យឡើងវិញនូវជម្រើសណាមួយ ក្នុងការបញ្ចប់ការប្រកួត FA Cup របស់ក្រុមបុរសដែលបានឈានដល់វគ្គ ១/៤ ផ្តាច់ព្រ័ត្រ និងការប្រកួតពានកម្រិតផ្សេងៗទៀត។
សម្រាប់ការប្រកួតលីគកំពូល Premier League និង Championship ស្ថិតក្នុងការផ្អាកបណ្តោះអាសន្ននៅឡើយ ពោលគឺត្រូវពន្យារពេលរហូតដល់ចុងខែមេសា។ ប្រសិនបើ COVID-19 នៅតែបន្តឥទ្ធិពលលីគធំៗនៅអឺរ៉ុបទំនងជាត្រូវបង្ខំចិត្តលុបចោលដូចគ្នា។
ការសម្រេចរបស់ FA បែបនេះ កើតឡើងបន្ទាប់ពីជំងឺឆ្លង COVID-19 បង្កើនការចម្លង និងសម្លាប់មនុស្សកាន់តែច្រើនឡើងជុំវិញពិភពលោក។ មិនត្រឹមតែកីឡាបាល់ទាត់ទេដែលរងគ្រោះដោយសារវិបត្តិជំងឺនេះ ព្រឹត្តិការណ៍កីឡាលំដាប់ពិភពលោកផ្សេងៗទៀត រួមទាំងអូឡាំពិកក្រុងតូក្យូឆ្នាំ២០២០ផង សុទ្ធតែប៉ះពាល់ទាំងអស់។
FA បន្ថែមថា នេះជាកាលៈទេសៈដែលត្រូវគិតគូពីផលប៉ះពាល់ហិរញ្ញវត្ថុសម្រាប់បាល់ទាត់អង់គ្លេស ហើយរាល់ការសម្រេចចិត្តទាំងអស់ គឺស្ថិតក្នុងផលប្រយោជន៍រួមទាំងអស់គ្នា៕
© រក្សាសិទ្ធិដោយ thmeythmey.com