ចម្លើយដែលខ្លីគឺថា មកទល់ពេលបច្ចុប្បន្ននេះ មិនទាន់មានការសិក្សាស្រាវជ្រាវមួយណាអាចបញ្ជាក់ថា COVID-19 ពិតជាកាត់បន្ថយឥទ្ធិពលរបស់ខ្លួនក្នុងតំបន់ដែលមានអាកាសធាតុក្តៅនោះទេ។ នេះគឺដោយសារតែវីរុសមួយចំនួនមិនមានលក្ខណៈចម្លងដូចគ្នាទៅនឹងជំងឺដែលឧស្សាហ៍កើតឡើងតាមរដូវកាលនោះឡើយ។
COVID-19 បានចាប់ផ្តើមខ្លាំងនៅក្នុងអំឡុងខែធ្នូ ដែលជារដូវរងា ហើយទីតាំងធំៗដែលវីរុសបានឆ្លងគឺភាគច្រើនកើតមាននៅតាមតំបន់ត្រជាក់បង្គួរ។ ដោយហេតុនេះ មនុស្សមួយចំនួនបានសន្និដ្ឋានថា COVID-19 នឹងមានភាពធូរស្បើយឡើងវិញនារដូវក្តៅខាងមុខនេះ។
ការបកស្រាយរបស់ទូរទស្សន៍អង់គ្លេស BBC បានបញ្ជាក់ថា ទោះបីជាមានមតិលើកឡើងយ៉ាងដូចច្នេះមែន អ្នកជំនាញនៅតែមិនអាចទុកចិត្តទាំងស្រុងលើការសន្មត់ខាងលើតែមួយនោះទេ។ នេះគឺដោយសារតែពួកគេមិនមានទិន្នន័យស្រង់ច្បាស់លាស់អំពីការចុះខ្សោយនៃវីរុសនេះនារដូវក្តៅ ឬក្នុងតំបន់ដែលមានអាកាសធាតុក្តៅ។
វីរុស SARS (ស្រដៀងគ្នានឹង COVID-19) ដែលបានរីករាលដាលក្នុងឆ្នាំ២០០៣ ត្រូវបានគេទប់ស្កាត់ទាន់ពេលវេលាមុនពេលដែលអ្នកជំនាញអាចសិក្សាពីលក្ខណៈឆ្លងរបស់វានារដូវផ្សេងៗ។ ការសិក្សារបស់អ្នកជំនាញមួយទៅលើប្រភេទស្រដៀងគ្នាផ្សេងៗទាំង៣ទៀតនៃវីរុសកូរ៉ូណាបានបញ្ជាក់ថា វីរុសទាំងនោះពិតជាមានឥទ្ធិពលក្នុងរដូវត្រជាក់ ជាពិសេសរវាងខែធ្នូ និងមេសា។
ក៏ប៉ុន្តែ ចំណែកឯប្រភេទខ្លះទៀតមិនបានគោរពតាមលក្ខណៈចម្លងបែបនោះទេ។ នេះមានន័យថា ប្រភេទខ្លះអាចចម្លងក្នុងពេលវេលាមិនច្បាស់លាស់។ បន្ថែមជាមួយនឹងអាកាសធាតុក្តៅ កត្តាផ្សេងៗទៀតក៏បានចូលរួមចំណែកផងដែរ មានដូចជា ល្បឿនខ្យល់បក ឬសំណើមអាកាសដែលមាននៅក្នុងខ្យល់។ ប៉ុន្តែទាំងអស់នេះគឺគ្រាន់តែជាការសន្មត់តែប៉ុណ្ណោះ ដោយសារតែទិន្នន័យអំពីការឆ្លងវីរុសនៅក្នុងរដូវផ្សេងៗមិនទាន់អាចត្រូវបានគេស្រង់ជាលក្ខណៈជាក់លាក់នៅឡើយនោះទេ។
ដោយឡែក ការស្រាវជ្រាវផ្សេងៗទៀតបានពន្យល់ថា ដោយសារតែវីរុសត្រូវបានគ្របដណ្តប់ដោយស្រទាប់«លីពីត»ឬស្រទាប់ខ្លាញ់ ជាមួយនឹងម៉ូលេគុលប្រូតេអ៊ីនលើខ្លួនប្រាណរបស់វា នោះវានឹងអាចរស់នៅបានយូរជាមួយនឹងអាកាសធាតុត្រជាក់ ហាក់បីដូចជាដុំខ្លាញ់ក្នុងអាហារមានសភាពរឹងជាប់ល្អនៅក្នុងទូរទឹកកកដែរ។ ចំណែក ស្រទាប់ខ្លាញ់នៃវីរុសនេះមានសភាពទន់ខ្សោយជាងមុននៅក្នុងតំបន់ក្តៅ។
ទោះជាបែបនេះក្តី ការសិក្សាផ្សេងៗទៀតមិនបានយល់ស្របជាមួយនឹងគំនិតនេះទេ។ ការឆ្លងអាចបង្កឡើងពីមូលហេតុផ្សេងៗជាច្រើនទៀតដូចជា ការផ្លាស់ប្តូរនៃទម្លាប់ធ្វើដំណើររបស់មនុស្ស ជាពិសេសទៅកាន់ទីតាំងឆ្ងាយៗតាមរយៈជើងហោះហើរ ការរស់នៅរបស់មនុស្សនៅតាមទីប្រជុំជនមានលក្ខណៈខុសប្លែកជាងពីមុន និងលក្ខខណ្ខពិសេសៗជាច្រើនទៀត។
បើទោះបីជាចំនួនករណីឆ្លងអាចនឹងថយចុះក្នុងរយៈប៉ុន្មានខែខាងមុខនេះ ដែលជារដូវក្តៅ គេក៏ពិបាកនិយាយដែរថា ការថយចុះនេះកើតឡើងដោយសារអាកាសធាតុក្តៅ។ ម្យ៉ាង វាក៏អាចថយចុះដោយសារការអន្តរាគមន៍ពីរដ្ឋាភិបាល និងអ្នកជំនាញនានាក្នុងពិភពលោក និងការមិនសូវចេញទៅក្រៅផ្ទះដោយប្រជាជនទូទៅ។ សរុបសេចក្តីមកវិញ គេមិនទាន់អាចនិយាយឲ្យច្បាស់លាស់បានទេថា COVID-19 នឹងបន្ថយឥទ្ធឹពលរបស់ខ្លួននៅក្នុងតំបន់ដែលមានអាកាសធាតុក្តៅបាននៅឡើយទេ៕