COVID-19
អន្តរជាតិ
នយោបាយអន្តរជាតិ
Covid-19៖ ទីម័រខាងកើត សម្រេចដាក់ប្រទេសក្នុងភាពអាសន្ន ខណៈករណីឆ្លងមានត្រឹម១ករណី ប្រធានាធិបតីទីម័រខាងកើតលោក Francisco Guterres Lú Olo (រូបភាព៖ហ្វេសប៊ុកផ្លូវការរបស់ប្រធានាធិបតីទីំ័រខាងកើត)
×
រដ្ឋាភិបាលទីម័រខាងកើត នៅយប់ថ្ងៃ២៨ មីនា បានសម្រេចដាក់ប្រទេសក្នុងភាពអាសន្នជាផ្លូវការ ដើម្បីផ្តល់លទ្ធភាពដល់រដ្ឋាភិបាលចាត់វិធានការតាមការចាំបាច់ក្នុងកិច្ចការទប់ស្កាត់ និងការពារការរីករាលដាលជំងឺផ្លូវដង្ហើម Covid-19។ សេចក្តីសម្រេចនេះ ធ្វើឡើងបន្ទាប់ពីទីម័រខាងកើត រកឃើញមានករណីឆ្លង Covid-19 តែមួយករណីប៉ុណ្ណោះ។
តាមសំណើរបស់លោកប្រធានាធិបតី Francisco Guterres Lú-Olo ដែលទើបតែអនុម័តដោយឯកច្ឆន្ទពីសភាទីម័រខាងកើត ការដាក់ប្រទេសក្រីក្រជាងគេក្នុងតំបន់អាស៊ីអាគ្នេយ៍ក្នុងភាពអាសន្នដើម្បីជាផ្នែកមួយនៃការទប់ស្កាត់ និងការពាររីករាលដាលរបស់ជំងឺ Covid-19 នឹងត្រូវអនុវត្តរហូតដល់ថ្ងៃទី២៦ ខែមេសា ។ នេះបើយោងតាមការចុះផ្សាយរបស់សារព័ត៌មាន Asia Pacific Report។
គួរជម្រាបបន្តិចថា គិតត្រឹមថ្ងៃ២៨ មីនា ទីម័រខាងកើត បានរកឃើញករណីឆ្លងជំងឺ Covid-19 តែមួយករណីប៉ុណ្ណោះ ហើយករណីដំបូងនេះ គឺជាពលរដ្ឋបរទេសនោះទេ។
យ៉ាងណាក៏ដោយ ការណ៍ដែលទីម័រខាងកើត ត្រូវសម្រេចដាក់ប្រទេសក្នុងភាពអាសន្នក្នុងពេលដែលប្រទេស មិនទាន់មានករណីឆ្លងច្រើន ធៀបនឹងបណ្តាប្រទេសក្នុងតំបន់ក៏ដោយ ក៏ព្រោះតែ នេះ ជាវិធានការទប់ស្កាត់ការរីករាលខ្លាំង ខណៈប្រជាជនទីម័រខាងកើត ក៏ចាប់ផ្តើមវិលត្រលប់ពីបរទេស ដែលមានករណីឆ្លងច្រើន។
តាមអះអាងរបស់រដ្ឋមន្ត្រីសុខាភិបាលស្តីទីទីម័រខាងកើត អាជ្ញាធរ នឹងប្រឹងប្រែងគ្រប់បែបយ៉ាងដើម្បីជំរុញឲ្យអនុវត្ត ការនៅឆ្ងាយពីគ្នា ជាពិសេសក្នុងកន្លែងសម្រាប់ដាក់អ្នកដែលឆ្លង ឬអ្នកសង្ស័យឆ្លង Covid-19។ ក៏ប៉ុន្តែរដ្ឋមន្ត្រីស្តីទីរូបនេះ ក៏បានសារភាពផងដែរថា បច្ចុប្បន្នរដ្ឋាភិបាល កំពុងតែខ្វះគ្រែ និងបន្ទប់ សម្រាប់អ្នកដែលត្រូវដាក់ឲ្យនៅដាច់ដោយឡែករយៈពេល១៤ថ្ងៃ ខណៈចំនួនប្រជាជន ដែលកំពុងវិលត្រលប់ចូលស្រុកវិញកាន់តែច្រើន។
កន្លងមកក្នុងពេលដែលវិបត្តិ Covid-19 ទើបតែផ្ទុះឡើង នាយករដ្ឋមន្ត្រីទីម័រខាងកើត ក៏ធ្លាប់សារភាព និងទទួលស្គាល់ថា ប្រទេសរបស់ខ្លួន មិនទាន់មានប្រព័ន្ធសុខាភិបាលរឹងមាំនៅឡើយនោះទេ ដែលពេលនោះ ទីម័រខាងកើត ក៏បានស្នើជំនួយពីឥណ្ឌូណេស៊ី ដើម្បីជួយគាំពារ ដល់ពលរដ្ឋរបស់ខ្លួន ដែលទើបត្រលប់ពីចិនផងដែរ៕
Tag:
ទីម័រខាងកើត
Covid19
© រក្សាសិទ្ធិដោយ thmeythmey.com