អន្តរជាតិ
កូរ៉េខាងជើង ប្រកាសទទួលជោគជ័យលើការបាញ់សាកល្បងជើងទម្រធុនយក្ស ជើងទម្របាញ់គ្រាប់រ៉ុក្កែតចម្រុះធុនយកុ្សរបស់កូរ៉េខាងជើង។ រូបភាព៖ KCNA
× កូរ៉េខាងជើង បានប្រកាសទទួលជោគជ័យយ៉ាងធំធេង លើការសាកល្បងជើងទម្របាញ់គ្រាប់រ៉ុក្កែតចម្រុះធុនយក្ស (Super-large multiple rocket launchers) ដែលបានបាញ់មីស៊ីលបាលីស្ទិកចម្ងាយខ្លីពីរគ្រាប់ ធ្លាក់ចូលទៅក្នុងសមុទ្រខាងកើត(ដែនទឹករបស់ជប៉ុន)។ នេះបើតាមការចុះផ្សាយរបស់ទីភ្នាក់ងារព័ត៌មាន KCNA នាថ្ងៃទី៣០ ខែមីនា។ ការបាញ់សាកល្បងនេះ ធ្វើឡើងខណៈពេលពិភពលោក កំពុងតែប្រយុទ្ធប្រឆាំងជាមួយ ជំងឺរលាកសួត ដែលបង្កដោយកូរ៉ូណាវីរុសប្រភេទថ្មី (COVID-19)។
ខណៈពេលCOVID-19 កំពុងតែអុកឡុកនៅជុំវិញពិភពលោក កូរ៉េខាងជើង បានបាញ់សាកល្បងមីស៊ីលចម្ងាយខ្លីចំនួនពីរគ្រាប់ សំដៅទៅសមុទ្រខាងត្បូង នាថ្ងៃទី២៩ ខែមីនា។ បើតាមការអះអាងរបស់នាយសេនាធិការចម្រុះរបស់កូរ៉េខាងត្បូង មីស៊ីលពីរគ្រាប់នេះ បានបាញ់ចេញពីក្រុង Wonsan ដោយហោះបានចម្ងាយ ២៣០គីឡូម៉ែត្រ និងរយៈកម្ពស់ ៣០គីឡូម៉ែត្រ មុនធ្លាក់ចូលក្នុងសមុទ្រជប៉ុន។
ទាក់ទងទៅនឹងការសាកល្បងមីស៊ីលទាំងពីរគ្រាប់នេះ ទីក្រុងព្យុងយ៉ាង អះអាងថា ការសាកល្បង ជើងទម្របាញ់គ្រាប់រ៉ុក្កែតចម្រុះធុនយក្សលើកនេះ គឺដើម្បីត្រួតពិនិត្យបញ្ហាបច្ចេកទេស និងយុទ្ធសាស្ត្រ។ ការសាកល្បងលើកនេះ ដឹកនាំដោយលោក Ri Pyong Chol អនុប្រធានបក្សពលករកូរ៉េខាងជើង នៅបណ្ឌិតសភាវិទ្យាសាស្ត្រការពារជាតិ។
ទីភ្នាក់ងារព័ត៌មាន KCNA បានស្រង់សម្ដីលោក Ri ថា៖«ការបាញ់សាកល្បង គឺទទួលបានជោគជ័យយ៉ាងធំធេង»។ ម្យ៉ាងវិញទៀត ការសាកល្បងជើងទម្រង់បាញ់គ្រាប់រ៉ុក្កែតលើកនេះ គឺជាកិច្ចការដ៏សំខាន់ ក្នុងការពង្រឹងយុទ្ធសាស្ត្រថ្មី និងប្រព័ន្ធការពារជាតិរបស់ប្រទេស។
មួយរយៈចុងក្រោយនេះ កូរ៉េខាងជើង បានបាញ់មីស៊ីលចម្ងាយខ្លីជាបន្តបន្ទាប់ ស្របពេលពិភពលោក កំពុងជាប់ដៃប្រយុទ្ធប្រឆាំងជាមួយកូរ៉ូណាវីរុស។ សរុបទាំងការសាកល្បងពេលនេះ កូរ៉េខាងជើង បានបាញ់សាកល្បងមីស៊ីលចំនួន ៤លើកហើយ ចាប់តាំងពីថ្ងៃទី២ ខែមីនា ហើយវាក៏ជាការបាញ់លើកទី៤ដែរ ក្នុងឆ្នាំ ២០២០នេះ។
សូមបញ្ជាក់ថា មកទល់ពេលនេះ ទីក្រុងវ៉ាស៊ីនតោន និងទីក្រុងព្យុងយ៉ាង មិនទាន់បានឃើញកិច្ចព្រមព្រៀងរំសាយកម្មវិធីនុយក្លេអ៊ែរកូរ៉េខាងជើង ជាមួយគ្នានៅឡើយទេ បន្ទាប់ពីអាក់ខានជួបចរចាគ្នា អស់រយៈពេលជាយូរខែកន្លងមក ៕
© រក្សាសិទ្ធិដោយ thmeythmey.com