COVID-19
អន្តរជាតិ
COVID-19៖ សម្ភារវេជ្ជសាស្ត្ររបស់ចិន បានទៅដល់អាមេរិក សម្ភារវេជ្ជសាស្ត្ររបស់ចិន បានទៅដល់អាមេរិក។ រូបថត Reuters
× យន្តហោះដឹកសម្ភារពេទ្យមកពីទីក្រុងសៀងហៃ ប្រទេសចិន បានទៅដល់ទីក្រុងញូវយ៉ក អាមេរិក នាថ្ងៃទី២៩ ខែមីនា ជាលើកដំបូងបង្អស់ចាប់តាំងពីផ្ទុក COVID-19 ។ វិធានការដឹកតាមយន្តហោះនេះ ធ្វើឡើងបន្ទាប់ពីអាមេរិក កំពុងមានតម្រូវការខ្លាំង លើសម្ភារវេជ្ជសាស្ត្រ ដើម្បីប្រយុទ្ធប្រឆាំងជាមួយ ជំងឺរលាកសួតដែលបង្កដោយកូរ៉ូណាវីរុស (COVID-19)។
ដើម្បីប្រយុទ្ធប្រឆាំងជាមួយ COVID-19 និងឆ្លើយតបទៅនឹងសំណើរបស់បុគ្គលិកពេទ្យ អាមេរិកបានបញ្ជាទិញសម្ភារវេជ្ជសាស្ត្រដូចជា ម៉ាស់ ស្រោមដៃ សំលៀកបំពាក់ពេទ្យ ទឹកលាងដៃ និងទែម៉ូម៉ែត្រពីចិន ម៉ាឡេស៊ី និងវៀតណាម។ សម្ភារវេជ្ជសាស្ត្រជើងដំបូង ទៅដល់អាកាសយានដ្ឋាន Jonh F. Kennedy នាទីក្រុងញូវយ៉ក ដើម្បីយកទៅផ្គត់ផ្គង់រដ្ឋចំនួនបីដូចជា ញូវយ៉ក, រដ្ឋ New Jorsey និងរដ្ឋ Connecticut។
ការដឹកជញ្ជូនតាមផ្លូវអាកាសបែបនេះ គឺជាផ្នែកមួយ ដើម្បីផ្គត់ផ្គង់សម្ភារវេជ្ជសាស្ត្រតាមតម្រូវការ និងក្នុងភាពអាសន្ន។ បើតាមការចុះផ្សាយរបស់ទីភ្នាក់ងារព័ត៌មានReuters ការដឹកជញ្ជូនតាមផ្លូវអាកាសនេះ គឺធ្វើឡើងតាមរយៈ «គម្រោងស្ពានអាកាស» ដែលអាចកាត់បន្ថយពេលវេលាជាច្រើន បើធៀបទៅនឹងការដឹកជញ្ជូនតាមនាវា។ គម្រោងនេះ ត្រូវបានដឹកនាំដោយ ទីប្រឹក្សាជាន់ខ្ពស់របស់សេតវិមាន លោក Jared Kushner ដែលមានដៃគូជាមួយក្រុមហ៊ុនឯកជនផ្សេងទៀត។
សម្ភារវេជ្ជសាស្ត្រលើកដំបូងនេះ ត្រូវបានបរិច្ឆាគដោយទីភ្នាក់ងារគ្រប់គ្រងបញ្ហាអាសន្នរបស់រដ្ឋសហព័ន្ធ (FEMA) ។ ក្នុងសម្ភារ ដែលដឹកមកដល់អាមេរិកលើកដំបូងនេះមាន ម៉ាស់ N95 ១៣ម៉ឺនម៉ាស់ ម៉ាស់ពេទ្យប្រមាណ១,៨លាន សំលៀកបំពាក់ពេទ្យ៥ម៉ឺន ស្រោមដៃមាន ១២លានគូ ទឹកលានដៃ១៣ម៉ឺនដប និងទែម៉ូម៉ែត្រមាន៣៦០០០គ្រឿង។
មន្ត្រីរបស់សេតវិមានអាមេរិក បានបញ្ជាក់យ៉ាងដូច្នេះថា៖ «សម្ភារវេជ្ជសាស្ត្រទាំងនេះ នឹងបែងចែកទៅតាមតម្រូវការរបស់រដ្ឋ»។
សូមបញ្ជាក់ថា គិតត្រឹមថ្ងៃទី៣០ ខែមីនានេះ អាមេរិក គឺជាប្រទេសមានតួលេខ COVID-19 សរុបច្រើនជាងគេបង្អស់នៅលើពិភពលោក ពោលគឺរហូតដល់ជាង ១៤ម៉ឺនករណី។ ក្នុងអត្រាដ៏ខ្ពស់បែបនេះ អាមេរិកមានអ្នកស្លាប់សរុបប្រមាណ ២៤០០ករណី និងអ្នកជាសះស្បើយជាង ៤៥០០ករណី៕
© រក្សាសិទ្ធិដោយ thmeythmey.com