COVID-19
ជាតិ
សង្គមជាតិ
ថ្នាក់ដឹកនាំសង្ឃ អំពាវនាវឲ្យវត្តសម្បូរធនធាន ជួយចែកស្បៀងដល់ពលរដ្ឋខ្វះខាត ពីឆ្វេងទៅស្តាំ៖ សម្តេច អំ លឹមហេង សម្តេចសង្ឃនាយករង១, សម្តេច នន្ទ ង៉ែត សម្តេចសង្ឃនាយក, សម្តេច ណយ ច្រឹក សម្តេចសង្ឃនាយករងទី២ (រូបពីអគ្គាធិការដ្ឋានពុទ្ធិកសិក្សាជាតិ)
× គណៈសង្ឃនាយក ជាស្ថាប័នគ្រប់គ្រងព្រះសង្ឃនៅកម្ពុជា បានស្នើឲ្យព្រះមេគណទាំង២៥រាជធានី-ខេត្ត សហការជាមួយមន្ទីរធម្មការ ព្រមទាំងអង្គការពាក់ព័ន្ធ រួមគ្នាអំពាវនាវឲ្យវត្តអារាម ដែលសម្បូរធនធានច្រើន ចុះចែករំលែកថវិកា ស្បៀងអាហារ និង គ្រឿងឧបរិភោគចាំបាច់នានា ដល់វត្តអារាមដទៃ និង ប្រជាពលរដ្ឋ នៅតាមជនបទដាច់ស្រយាល ដែលកំពុងជួបការលំបាក និង ខ្វះខាត។
ការស្នើនេះ ធ្វើឡើងតាមរយៈលិខិត ដែលសម្តេច អំ លឹមហេង សម្តេចសង្ឃនាយករងទី១ សរសេរជួសសម្តេច នន្ទ ង៉ែត ជាសម្តេចសង្ឃនាយក ប្រគេនទៅព្រះមេគណនិងសហការី នៅតាមរាជធានី-ខេត្តទាំង២៥។ ក្នុងលិខិតចុះថ្ងៃទី៣០ ខែមីនា ឆ្នាំ២០២០ សម្តេច អំ លឹមហេង ពិតថេរដីកាទៅកាន់ព្រះមេគណថា ការចាប់ផ្តើមធ្វើចលនាមនុស្សធម៌នេះ គឺជាការចូលរួមចំណែកជាមួយនឹងប្រមុខរដ្ឋាភិបាល ក្នុងការសម្រាលទុក្ខលំបាករបស់ប្រជាពលរដ្ឋ ដោយសារការជះឥទ្ធិពលនៃការរាលដាលវីរុសកូវីដ-១៩។
ក្នុងពិធីជួបសំណេះសំណាលជាមួយក្រុមគ្រូពេទ្យប្រមាណ៤០០នាក់ ដែលស្ម័គ្រចិត្តចូលរួមប្រយុទ្ធប្រឆាំងនឹងវីរុសកូវីដ-១៩ កាលពីថ្ងៃទី២៥ ខែមីនា ឆ្នាំ២០២០ សម្តេចនាយករដ្ឋមន្ត្រី បានបញ្ជាឲ្យមន្ត្រី ចុះដើរចែកស្បៀង ដូចជា អង្ករ និង ត្រីខ ជាដើម រួមទាំងក្រមា ទៅដល់ផ្ទះប្រជាពលរដ្ឋដែលខ្វះខាត។ សម្តេចនាយករដ្ឋមន្ត្រី ទទូចឲ្យប្រជាជន កុំចេញពីផ្ទះ បើគ្មានភាពចាំបាច់ ដើម្បីជៀសវាងការឆ្លងកូវីដ-១៩។
តាមរយៈលិខិតនោះដដែល សម្តេច អំ លឹមហេង បានស្នើឲ្យព្រះមេគណ ណែនាំព្រះសង្ឃនិងប្រជាពលរដ្ឋក្នុងមូលដ្ឋាន ឲ្យអនុវត្តតាមវិធានការការពាររបស់ក្រសួងសុខាភិបាល។ លើសពីនេះ សម្តេចសង្ឃនាយករងទី១ សុំឲ្យព្រះមេគណ ធ្វើរបាយការណ៍ទៅគណៈសង្ឃនាយក ចំពោះការអនុវត្តសកម្មភាព ដែលប្រគេននិងការស្នើសុំខាងលើ។
កាលពីថ្ងៃ១៦ ខែមីនា ឆ្នាំ២០២០ សម្តេច នន្ទ ង៉ែត សម្តេចសង្ឃនាយក បានចេញសេចក្តីប្រកាសម្តងរួចហើយ ស្តីពីការចូលរួមទប់ស្កាត់ការរាលដាលវីរុសកូវីដ-១៩។ ក្នុងសេចក្តីប្រកាសនោះ សម្តេច នន្ទ ង៉ែត អំពាវនាវឲ្យព្រះសង្ឃ បន្តផ្សព្វផ្សាយតាមគ្រប់រូបភាព ទាំងតាមរយៈការទេសនា និងតាមរយៈការចែកចាយឯកសារអប់រំ ដែលផលិតដោយស្ថាប័នសុខាភិបាលជាតិ-អន្តរជាតិ ដល់ប្រជាពុទ្ធបរិស័ទ។
សូមរម្លឹកថា គិតត្រឹមព្រឹកថ្ងៃទី៣១ ខែមីនា ឆ្នាំ២០២០ កម្ពុជា រកឃើញមនុស្ស១០៩នាក់ហើយ ដែលឆ្លងកូវីដ-១៩ ដោយក្នុងនោះ បានជាវិញ២៣នាក់។ ទន្ទឹមនឹងនេះ មនុស្សជាង៣៥០នាក់ ប៉ះពាល់ដោយផ្ទាល់ និងជាង១,៣ពាន់នាក់ទៀត ប៉ះពាល់ដោយប្រយោលជាមួយនឹងអ្នកឆ្លងវីរុសកូវីដ-១៩ នៅកម្ពុជា៕
Tag:
គណៈសង្ឃនាយក
COVID-19
© រក្សាសិទ្ធិដោយ thmeythmey.com