មីយ៉ាន់ម៉ា មានករណីស្លាប់ដំបូងដោយសារ COVID-19

COVID-19

អន្តរជាតិ

មីយ៉ាន់ម៉ា មានករណីស្លាប់ដំបូងដោយសារ COVID-19

31, Mar 2020 , 11:29 am

រូបភាព

ដោយ: តន ចាន់រិទ្ធារ៉ា

មីយ៉ាន់ម៉ា នៅថ្ងៃទី៣១ ខែមីនា បានប្រកាសពីករណីស្លាប់ទីមួយរបស់ខ្លួនដោយសារ COVID-19 ។ អ្នកនាំពាក្យក្រសួងសុខាភិបាលមីយ៉ាន់ម៉ាប្រកាសថា ជនរងគ្រោះ គឺបុរសជនជាតិមីយ៉ាន់ម៉ាដែលធ្វើដំណើរពីអូស្ត្រាលី ហើយធ្លាប់ចូលទឹកដីសិង្ហបុរី។

លោក Khin Khin Gyi អ្នកនាំពាក្យក្រសួងសុខាភិបាល និងកីឡាមីយ៉ាន់ម៉ាបញ្ជាក់ថា ជនរងគ្រោះមានវ័យ៦៩ឆ្នាំ បានស្លាប់ដោយសារ COVID-19 នៅព្រឹកថ្ងៃទី៣១ ខែមីនាក្នុងមន្ទីរពេទ្យ Way Bar Gyi ក្នុងទីក្រុងយ៉ាំងហ្គោន។

បុរសរូបនេះ ទៅដល់មីយ៉ាន់ម៉ានៅថ្ងៃទី១៤ ខែមីនា ដោយធ្វើដំណើរពីអូស្ត្រាលី ជាទីដែលលោកព្យាបាលជំងឺមហារីកច្រមុះ។ មុនទៅដល់មីយ៉ាន់ម៉ា លោកក៏ស្នាក់នៅសិង្ហបុរីបួនថ្ងៃផងដែរ។ នេះបើតាមការផ្សាយរបស់ទូរទស្សន៍ Channel NewsAsia។ នៅថ្ងៃទី១៨ បុរសនេះ ចេញរោគសញ្ញា និងបញ្ជូនទៅកាន់បន្ទប់សង្គ្រោះបន្ទាន់នៃមន្ទីរទូទៅយ៉ាំងហ្គោននៅថ្ងៃទី២៥ ខែមីនា។ មួយថ្ងៃបន្ទាប់ លោកក៏ត្រូវប្រកាសថា មានផ្ទុកវីរុសកូរ៉ូណា។

សូមបញ្ជាក់ថា មីយ៉ាន់ម៉ា មានករណីឆ្លងសរុប១៤ និងស្លាប់មួយនៅពេលនេះ៕