COVID-19
កីឡាជាតិ
ជាតិ
COVID-19៖ NOCC ជំរុញឲ្យគ្រូបង្វឹករៀបចំផែនការឲ្យកីឡាករហ្វឹកហាត់តាមផ្ទះ
× គណៈកម្មាធិការជាតិអូឡាំពិកកម្ពុជា(NOCC)ជំរុញគ្រូបង្វឹកសហការជាមួយគ្រូជំនួយរៀបចំផែនការឲ្យកីឡាករជម្រើសជាតិហ្វឹកហាត់តាមផ្ទះខ្លួនឯង ស្របពេលកម្ពុជាកំពុងប្រឈមបញ្ហានៃការរាតត្បាតនៃជំងឺផ្លូវដង្ហើមបង្កឡើងដោយកូរ៉ូណាវីរុសប្រភេទថ្មីកូវីដ-១៩។ NOCC ក៏បានដាក់ចេញគោលការណ៍មួយចំនួនឲ្យកីឡាករអនុវត្ត ដើម្បីបង្ការនិងទប់ស្កាត់ការឆ្លងកូវីដ-១៩ ផងដែរ។
ដោយមើលឃើញភាពអសកម្មរបស់កីឡាករកីឡាការិនីជម្រើសជាតិក្នុងអំឡុងពេលឈប់សម្រាកដោយសារកម្ពុជាប្រឈមបញ្ហាការរាតត្បាតនៃកូវីដ-១៩ NOCC នៅថ្ងៃទី២៧ មីនា បានចេញសេចក្តីប្រកាសព័ត៌មានមួយ ដោយជំរុញឲ្យគ្រូបង្វឹកគ្រប់ប្រភេទកីឡាទាំងអស់ រៀបចំកម្មវិធីឲ្យកីឡាករហ្វឹកហាត់នៅតាមផ្ទះ។ ការជំរុញរបស់ NOCC ធ្វើឡើងក្នុងគោលបំណងចង់រក្សានិរន្តរភាព និងតុល្យភាពកម្លាំងកាយ និងបច្ចេកទេសក្នុងអំឡុងពេលឈប់សម្រាករបស់កីឡាករ។
«គោលដៅផែនការហ្វឹកហាត់ខ្លួនឯង របស់កីឡាករកីឡាការិនីកម្រិតខ្ពស់នៅផ្ទះ គឺដើម្បីរក្សានិរន្តរភាពនៃគុណភាពកម្លាំងកាយ និងរក្សាការបន្សាំបច្ចេកទេសជំនាញ ពិសេសរក្សាតុល្យភាពផ្លូវកាយ និងផ្លូវចិត្តក្នុងការហាត់ហ្វឹកហ្វឺនកីឡា ដើម្បីងាយស្រួលក្នុងការរក្សាសមត្ថភាពការងារកីឡា រហូតដល់ការប្រមូលផ្តុំក្រុមជម្រើសជាតិហ្វឹកហាត់ឡើងវិញ»។ នេះជាការបញ្ជាក់របស់ NOCC ក្នុងសេចក្តីប្រកាសព័ន្ធខាងលើ។
សម្រាប់ NOCC ការឈប់សម្រាកក្នុងសភាពជាអសកម្ម នឹងធ្វើឲ្យមានផលប៉ះពាល់ធ្ងន់ធ្ងរដល់គុណផលរបស់កីឡាករ។ «កីឡាករជម្រើសជាតិភាគច្រើឈប់សម្រាកក្នុងសភាពអសកម្ម ដែលនាំឲ្យប៉ះពាល់ធ្ងន់ធ្ងរដល់គុណផលកីឡា ឬធ្លាក់ចុះយ៉ាងគំហុគនូវសមត្ថភាពផ្លូវកាយនិងប្រព័ន្ធធាតុផ្សាំចលនាសកម្មនៃការហ្វឹកហាត់កន្លងមក ដែលអាចឈានទៅរកភាពលំបាកក្នុងពេលស្តារគុណភាពកម្លាំងកាយ និងបច្ចេកទេសឡើងវិញ»។ នេះជាការបង្ហាញក្តីកង្វល់របស់ NOCC ពេលកីឡាករឈប់សម្រាកដោយគ្មានការហ្វឹកហាត់។
ជាមួយគ្នានេះ NOCC ក៏បានដាក់ចេញនូវគោលការណ៍មួយចំនួនឲ្យកីឡាករអនុវត្ត ដើម្បីបង្ការនិងទប់ស្កាត់ការឆ្លងជំងឺរលាកផ្លូវដង្ហើមបង្កឡើងដោយកូរ៉ូណាវីរុសប្រភេទថ្មីកូវីដ-១៩ផងដែរ។ គោលការណ៍ទាំងនោះ រួមមានជៀសវាងទម្លាប់អាក្រក់បំផ្លាញសុខភាព, ជៀសវាងរស់នៅក្នុងបរិយាកាសអាប់អួរ ភាពកខ្វក់ឬក្លិនអាក្រក់ និងរក្សាអនាម័យខ្លួនប្រាណ និងឥរិយាបថថែទាំសុខភាពជាដើម។
នៅព្រឹកថ្ងៃទី៣១ មីនា នេះ ក្រសួងសុខាភិបាលកម្ពុជា បានប្រកាសរកឃើញអ្នកផ្ទុកជំងឺរលាកផ្លូវដង្ហើមបង្កឡើងដោយកូវីដ-១៩ចំនួនពីរករណីបន្ថែមទៀតលើម្តាយនិងកូននៅខេត្តសៀមរាប ដែលឆ្លងពីស្វាមីដែលទៅចូលរួមកម្មវិធីសាសនានៅប្រទេសម៉ាឡេស៊ី។ ចំនួនអ្នកឆ្លងកូវីដ-១៩នៅកម្ពុជាកើនឡើងដល់១០៩នាក់ ក្នុងនោះព្យាបាលជាសះស្បើយចំនួន២៣នាក់៕
© រក្សាសិទ្ធិដោយ thmeythmey.com