លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយកក្រុមហ៊ុន Westline Education Group បានបង្ហាញក្តីព្រួយបារម្ភខ្លាំង ចំពោះវិនិយោគិនលើវិស័យអប់រំឯកជន ដែលកំពុងមានកាតព្វកិច្ចដោះស្រាយបញ្ហាប្រឈមជាច្រើន នៅក្នុងពេលនេះ។ តាមរយៈលិខិតដែលត្រូវបានផ្ញើមកសារព័ត៌មានថ្មីៗ លោក ប៉ិច បូឡែន បានស្នើសុំឱ្យរដ្ឋាភិបាល ចាត់ទុកវិស័យអប់រំឯកជនជាអាទិភាពមួយផងដែរ នៅក្នុងកញ្ចប់នៃដំណោះស្រាយ ដោយលោកបានស្នើសុំយន្តការមួយចំនួន ដើម្បីដាក់ជូនរដ្ឋាភិបាល។
នៅអំឡុងពេលសម្រាកវិស្សមកាលតូចនេះ គ្រឹះស្ថានអប់រំឯកជនទាំងអស់បាន និងកំពុងប្រឹងប្រែងបន្តការបង្រៀនពីចម្ងាយជូនសិស្ស និងនិស្សិតទាំងអស់ទៅតាមលទ្ធភាព ដែលខ្លួនមាន។ គ្រឹះស្ថានអប់រំស្ទើរទាំងអស់ ជាពិសេសគ្រឹះស្ថានដែលទទួលថ្លៃសិក្សាប្រចាំខែ និងត្រីមាស កំពុងជួបបញ្ហាប្រឈមជាច្រើន លើការបើកប្រាក់ឈ្នួលជូនបុគ្គលិក គ្រូបង្រៀន ថ្លៃឈ្នួលអគារ និងកាតព្វកិច្ចចំណាយផ្សេងៗទៀត។
សូមអរគុណដល់រដ្ឋាភិបាល ដែលបានអំពាវនាវអោយមានការយល់យោគពីម្ចាស់អគារ និងបានអន្តរាគមន៍គោលនយោបាយជាច្រើន ដល់ធុរជនកម្ពុជា។ ពោលគឺ សម្តេចតេជោនាយករដ្ឋមន្ត្រីបានស្នើសុំឱ្យម្ចាស់អគារ ទម្លាក់តម្លៃជួល៥០ភាគរយ ឬពន្យារការបង់ថ្លៃ ក្នុងបរិបទនៃវិបត្តិដែលបង្កឡើងដោយការឆ្លងរាលដាលនៃជំងឺកូវីដ-19នេះ។
សូមអរគុណដល់ក្រសួងសុខាភិបាល ដែលបាន និងកំពុងដឹកនាំការងារប្រយុទ្ធប្រឆាំងការរាលដាលនៃជំងឺកូវីដ-១៩ និងសូមអរគុណដល់ក្រសួងអប់រំ ដែលបានផ្តួចផ្តើមដំណើរការ ការគាំទ្ររៀនពីចម្ងាយ ជូនសិស្សចំណេះទូទៅខ្មែរ។
ដើម្បីនិរន្តរភាពសាលារៀន ក៏ដូចជាស្ថិរភាពការងារបុគ្គលិក គ្រូបង្រៀនតាមគ្រឹះស្ថានអប់រំឯកជន សូមស្នើសុំស្ថាប័នពាក់ព័ន្ធ មេត្តាពិចារណាចាត់វិស័យអប់រំឯកជន ដែលកំពុងផ្តល់ការងាររាប់ម៉ឺននាក់ និងផ្តល់ការសិក្សាដល់សិស្ស និស្សិតរាប់សែននេះ ជាវិស័យអាទិភាពមួយផង និងសូមពិចារណាផ្តល់ជូន យន្តការពិសេសមួយចំនួន ដូចខាងក្រោមជូនគ្រឹះស្ថានអប់រំឯកជន៖
១. រៀបចំឥណទានឡើងវិញ ឬការផ្តល់ឥណទានបន្ថែម ដែលមានភាពបត់បែន និងយល់យោគមួយ។
២. លើកលែងការបង់ប្រាក់របបបេឡាសន្តិសុខសង្គម រហូតដល់ស្ថានភាពប្រសើរជាថ្មី។
៣. ផ្តល់ប្រាក់ឧបត្ថម្ភបន្ថែម ២០% នៃប្រាក់ខែអប្បបរមា ១៩០ដុល្លារ ដល់បុគ្គលិកអប់រំ និងគ្រូបង្រៀន ដែលអាចនឹងទទួលរងផលប៉ះពាល់ ពីការកាត់បន្ថយបៀវត្ស ការព្យួរការងារ ឬការផ្អាកសកម្មភាពអាជីវកម្ម។
៤. ពន្យារពេលការរៀបចំសៀវភៅការងារបុគ្គលិកបរទេស ក្នុងអំឡុងពេលនេះ។
៥. ផ្តល់ជូនកញ្ចប់ថវិកាសមរម្យណាមួយ សម្រាប់គ្រឹះស្ថានអប់រំ ដែលរងផលប៉ះពាល់ខ្លាំង ដោយសារកូវីដ-១៩ សម្រាប់ដំណើរការគ្រឹះស្ថានឡើងវិញ។
៦. សូមម្ចាស់អគារទាំងអស់ ដាក់ចិត្តយល់ និងស្វែករកដំណោះស្រាយឈ្នះ-ឈ្នះមួយ ជាមួយម្ចាស់អាជីវកម្មក្នុងអំឡុងពេលនេះ។
ខ្ញុំជឿថា យើងទាំងអស់គ្នា រដ្ឋាភិបាល និងប្រជាជន វិស័យរដ្ឋ និងឯកជន សិស្សានុសិស្ស មាតាបិតា អ្នកអាណាព្យាបាល និងគ្រឹះស្ថានអប់រំ យើងទាំងអស់គ្នា ជាប្រជាជនខ្មែរពិតជាអាចយកជ័យជម្នះ ក្នុងការទប់ស្កាត់ការរាលដាលនៃកូវីដ-១៩នេះ ហើយនិងអាចបន្តការអភិវឌ្ឍធនធានមនុស្ស និងសេដ្ឋកិច្ចប្រទេសយើង អោយរីកចម្រើនបន្តដូចចិត្តយើងចង់បានទាំងអស់គ្នា។
សហព័ន្ធសេវាអប់រំនៃកម្ពុជា បានចូលរួម១ម៉ឺនដុល្លារ និង Westline Education Group ក៏បានចូលរួម១ម៉ឺនដុល្លារ ជាមួយសម្តេចនាយករដ្ឋមន្ត្ រីក្នុងយុទ្ធនាការបង្ការ ទប់ស្កាត់ការរាលដាលជំងឺកូវីដ-១៩៕