ថៃ បន្តរកឃើញអ្នកឆ្លង COVID-19 ១២៧នាក់ ឯអ្នកស្លាប់មានម្នាក់ទៀត

COVID-19

អន្តរជាតិ

ថៃ បន្តរកឃើញអ្នកឆ្លង COVID-19 ១២៧នាក់ ឯអ្នកស្លាប់មានម្នាក់ទៀត

31, Mar 2020 , 5:03 pm

រូបភាព

រូបភាព៖ Anadolu Agency

ដោយ: ធៀន ភារិន្ទ

ថៃ នៅតែបន្តរកឃើញអ្នកឆ្លងជំងឺរលាកសួត ដែលបង្កដោយកូរ៉ូណាវីរុស (COVID-19) ជាបន្តបន្ទាប់។ នៅថ្ងៃទី៣១ ខែមីនា អាជ្ញាធរសុខាភិបាលថៃ បានរកឃើញអ្នកឆ្លង ១២៧ករណីបន្ថែមទៀត និងអ្នកស្លាប់ ១ករណី។ មួយរយៈចុងក្រោយនេះ ថៃរកឃើញអ្នកឆ្លងច្រើនជាង ១០០ករណីជារៀងរាល់ថ្ងៃ។

គិតត្រឹមថ្ងៃទី៣១ ខែមីនានេះ ថៃបានរកឃើញអ្នកឆ្លងCOVID-19 សរុបរហូតដល់ ១៦៥១ករណី និង អ្នកស្លាប់ករណី។ តួលេខដ៏ច្រើនបែបនេះ បានកើនឡើងបន្ទាប់ពីថៃបានរកឃើញអ្នកឆ្លងជាង ១០០ករណីជារៀងរាល់ថ្ងៃ។ តួលេខចុងក្រោយ ថៃបានរកឃើញអ្នកឆ្លង ១២៧ករណី និងអ្នកសា្លប់ ១ករណី។

បើតាមការអះអាងរបស់អាជ្ញាធរសុខាភិបាលថៃ ករណីទាំង ១២៧ករណីនេះ ត្រូវបែងចែកជា ៣ក្រុមដូចជា អ្នកជំងឺដែលមានពាក់ព័ន្ធនឹងករណីចាស់ៗ(កន្លែងប្រដាល់, កន្លែងកម្សាន្ត) អ្នកជំងឺមកពីបរទេស និងអ្នកជំងឺ ដែលគេកំពុងតែស៊ើបអង្កេត។ នេះបើតាមការចុះផ្សាយរបស់សារព័ត៌មាន The Nation។

យ៉ាងណាក៏ដោយ ថៃក៏បានព្យាបាលអ្នកជំងឺ ២១៥ករណីឲ្យជាសះស្បើយផងដែរ។

សូមបញ្ជាក់ថា ដើម្បីទប់ស្កាត់ការរីកសាយភាយនៃ COVID-19 នៅក្នុងប្រទេស ថៃបានបិទទីក្រុងបាងកក ហាមបរទេសចូលក្នុងប្រទេស លើកថ្ងៃចូលឆ្នាំ រឹតត្បិតការធ្វើដំណើរ និងបិទព្រំដែនជាដើម៕