COVID-19
កីឡាអន្តរជាតិ
អន្តរជាតិ
Newcastle ក្លិបនៅ EPL ដំបូងគេដែលបញ្ឈប់បុគ្គលិក ដោយសារវិបត្តិ COVID-19
× Newcastle United បានក្លាយជាក្លិបដំបូងគេនៅ Premier League ដែលឲ្យបុគ្គលិកឈប់សម្រាកបណ្តោះអាសន្នដោយសារវិបត្តិនៃជំងឺរាតត្បាត COVID-19។ បញ្ហាហិរញ្ញវត្ថុរបស់ក្លិប ជារឿងចម្បងនាំឲ្យមានការបញ្ឈប់បុគ្គលិកបែបនេះ។
នាយកគ្រប់គ្រងក្លិបលោក Lee Charnley បានផ្ញើសារតាមរយៈអ៊ីមែលទៅកាន់បុគ្គលិកទាំងអស់នៅថ្ងៃទី៣០ ខែមីនា ដោយរៀបរាប់ពីការសម្រេចចិត្តនេះថាធ្វើឡើងដើម្បីការពារអនាគតក្លិបប៉ុណ្ណោះ។ ក្រុមការងារ និងបុគ្គលិកតាមផ្នែកផ្សេងៗរបស់ក្លិបរហស្សនាមសារិកាព្រៃ ត្រូវបានណែនាំឲ្យសរសេពាក្យ សុំរក្សាការងាររបស់ខ្លួនដើម្បីចូលមកកាន់ការងារនៅពេលក្រោយ។
យ៉ាងណាក៏ដោយ បុគ្គលិករបស់ Newcastle នឹងទទួលបានប្រាក់ខែ ១០០ភាគរយដដែលរហូតដល់ចុងខែមេសា ពោលគឺរហូតដល់មានសេចក្តីសម្រេចផ្សេងទៀតដែលនឹងត្រូវពិនិត្យឡើងវិញជុំវិញការបញ្ឈប់បុគ្គលិកនេះ។
គ្មានឡើយការប្រកួតគ្រប់កម្មវិធីសម្រាប់រដូវកាលដែលនៅសេះសល់ ក្រោយសហព័ន្ធកីឡាបាល់ទាត់អង់គ្លេស (FA) ប្រកាសឲ្យមានការពន្យារបណ្តោះអាសន្នរហូតដល់ចុងខែមេសា ឬបញ្ចប់តែម្តង ប្រសិនបើជំងឺឆ្លងដ៏កាចសាហាវមិនធ្លាប់មានដែលបានសម្លាប់មនុស្សយ៉ាងច្រើនជុំវិញពិភពលោកនេះនៅតែមិនថមថយ។
គ្មានការប្រកួត គឺគ្មានចំណូលបន្ថែមឡើយ។ ដូច្នេះ ក្លិបនៅអង់គ្លេស និងជាក្លិបក្នុងលីគកំពូលដំបូងគេដែលត្រូវបង្ខំចិត្តផ្អាកការងារបុគ្គលិកបណ្តោះអាសន្ន ដើម្បីរក្សាលំនឹងហិរញ្ញវត្ថុ អំឡុងវិបត្តិ COVID-19 នេះ។ ដោយឡែក ខាងក្របខណ្ឌកំពូលអង់គ្លេស Premier League មិនមានយោបល់អ្វីត្រូវលើកឡើងដែរ ជុំវិញការបញ្ឈប់បុគ្គលិកបណ្តោះអាសន្ននេះ។
កាលពីខែមករា Newcastle ធ្លាប់មានការពិភាក្សាមួយអំពីការលក់ក្លិបក្នុងតម្លៃ ៣៤០ លានផោន (៤១៨លានដុល្លារអាមេរិក) ទៅឲ្យក្រុមហ៊ុនមួយរបស់អារ៉ាប៊ីសាអូឌីត។ ប៉ុន្តែព័ត៌មានជុំវិញរឿងនេះបានស្ងាត់ទៅវិញ រហូតដល់មានការផ្អាកការប្រកួតក្នុងលីគនេះ។
ម្ចាស់ក្លិប Newcastle លោក Mike Ashley ក៏ត្រូវបានគេរិះគន់ផងដែរកាលពីសប្តាហ៍មុន បន្ទាប់ពីលោកនៅតែគិតប្រាក់អ្នកគាំទ្រសម្រាប់ការទិញសំបុត្រប្រចាំរដូវកាល ២០២០-២១ បើទោះបីក្របខណ្ឌលីគត្រូវពន្យារពេលប្រកួតក៏ដោយ៕
Tag:
COVID-19
Premier League
Newcastle United
© រក្សាសិទ្ធិដោយ thmeythmey.com