ក្មេងប្រុសអង់គ្លេស១៣ឆ្នាំម្នាក់ ស្លាប់ក្រោយឆ្លង COVID-19

COVID-19

អន្តរជាតិ

ក្មេងប្រុសអង់គ្លេស១៣ឆ្នាំម្នាក់ ស្លាប់ក្រោយឆ្លង COVID-19

01, Apr 2020 , 10:02 am

រូបភាព

ដោយ:

ក្មេងប្រុសអង់គ្លេសអាយុ ១៣ឆ្នាំម្នាក់ បានបាត់បង់ជីវិត កាលពីថ្ងៃ៣១ មីនា ក្រោយមានលទ្ធផលតេស្តវិជ្ជមានសម្រាប់ COVID-19 ។ ម្យ៉ាងទៀត ក្មេងប្រុសរូបនេះ ក៏ត្រូវបានគ្រួសារអះអាងថាគ្មានជំងឺប្រចាំកាយអ្វីឡើយ ។

គ្រួសាររបស់ក្មេងប្រុសរូបនេះ បញ្ជាក់ប្រាប់ទីភ្នាក់ងារព័ត៌មាន AFP ថា រូបគេ បានផ្ដើមមានរោគសញញ្ញា និងពិបាកដកដង្ហើម មុនពេលបញ្ជូនទៅកាន់មន្ទីរពេទ្យ។ ពួកគេ បន្តទៀតថា Ismail Mohamed Abdulwahab ដែលជាឈ្មោះរបស់ក្មេងប្រុសរងគ្រោះ ត្រូវបានបំពាក់ឧបករណ៍ជំនួយដង្ហើម និងដាក់ឲ្យសម្រាក ក៏ប៉ុន្តែគួរឲ្យសោកស្ដាយ ក្មេងប្រុស Ismail ទទួលមរណភាព កាលពីព្រឹកថ្ងៃ ៣១ ខែមីនា ។

ក្មេងប្រុសដែលស្លាប់នៅមន្ទីរពេទ្យ King's College Hospital ក្នុងទីក្រុង ឡុងដ៍នេះ ត្រូវបានជឿថា គឺជាករណីស្លាប់ក្មេងបំផុតប្រចាំចក្រភពអង់គ្លេស ដោយសារជំងឺរាតត្បាតសាកល COVID-19 នេះ។ ដោយឡែក នៅបែលហ្សិកឯណោះវិញ ក្មេងស្រីអាយុ ១២ឆ្នាំម្នាក់ ដែលបញ្ជាក់ថាស្លាប់កាលពីព្រឹកថ្ងៃអង្គារដែរនោះ គឺជាជនរងគ្រោះ COVID-19 ដែលក្មេងបំផុតប្រចាំតំបន់អឺរ៉ុប។

ទាក់ទិនករណីស្លាប់ក្មេងប្រុសអង់គ្លេសនេះ សាស្ត្រាចារ្យម្នាក់ប្រចាំសាលាពេទ្យ King's College អ្នកស្រី Nathalie MacDermott លើកឡើងថា ខណៈមនុស្សគ្រប់គ្នា យល់ឃើញថា ក្មេងទំនងរងគ្រោះតិចតួចដោយសារ COVID-19 ជាងមនុស្សចាស់ ករណីស្លាប់នេះឆ្លុះបង្ហាញពីសារសំខាន់ថា មនុស្សគ្រប់ស្រទាប់ក្នុងសង្គមទាំងក្មេងទាំងចាស់ ត្រូវចាត់វិធានការបង្ការទុកជាមុន ដោយពុំគួរធ្វេសប្រហែសឡើយ។ អ្នកស្រី សង្កត់ធ្ងន់ថា ទង្វើបែបនេះទើបអាចបញ្ឈប់ការឆ្លងនៅចក្រភពអង់គ្លេស និងទូទាំងពិភពលោកបាន។

សូមបញ្ជាក់ថា គិតត្រឹមព្រឹកថ្ងៃពុធ ០១ ខែមេសា ចក្រភពអង់គ្លេស រកឃើញករណីឆ្លង COVID-19 សរុប ២៥១៥០ករណី ខណៈជាសះស្បើយមាន ១៣៥នាក់។ ចំណែក អ្នកស្លាប់សរុប មានដល់ ១៧៨៩នាក់ហើយ ក្នុងនោះ ៣៨១នាក់ ស្លាប់ក្នុងពេល ២៤ម៉ោងចុងក្រោយ។ នេះបើតាមការប្រកាសរបស់ក្រសួងសុខាភិបាលអង់គ្លេស នៅថ្ងៃអង្គារ ៣១ មីនា៕