COVID-19
អន្តរជាតិ
COVID-19៖ ឥណ្ឌូណេស៊ី ដាក់ប្រទេសក្នុងភាពអាសន្ន តែមិនទាន់បិទប្រទេស ប្រធានាធិបតីឥណ្ឌូណេស៊ី ចូកូ វីដូដូ ។ រូបភាព AFP
× ប្រធានាធិបតីឥណ្ឌូណេស៊ី ចូកូ វីដូដូ នៅថ្ងៃទី៣១ ខែមីនា បានប្រកាសភាពអាសន្នក្នុងប្រទេស ខណៈដែលករណីឆ្លង និងការស្លាប់ដោយសារ COVID-19 នៅប្រទេសនេះ បានបន្តកើនឡើង។ យ៉ាងណាមិញ លោក វីដូដូ នៅតែរុញរារឿងបិទប្រទេស ទោះរងការរិះគន់ខ្លាំងក្ដី។
ឥណ្ឌូណេស៊ី ជាប្រទេសមានអត្រាអ្នកស្លាប់ដោយសារ COVID-19 ខ្ពស់ជាងគេមួយ។ ក្នុងចំណោមអ្នកឆ្លងទូទាំងប្រទេស១៥២៨នាក់ ឥណ្ឌូណេស៊ីបានរាយការណ៍ពីករណីស្លាប់ដល់ទៅ១៣៦នាក់ទៅហើយ។ លោក ចូកូ វីដូដូ ប្រធានាធិបតីឥណ្ឌូណេស៊ី នៅថ្ងៃទី៣១ ខែមីនា ក៏ប្រកាសដាក់ប្រទេសក្នុងស្ថានភាពអាសន្ន សំដៅទប់ស្កាត់ការរាលដាលកាន់តែខ្លាំង ប៉ុន្តែវិធានការបិទប្រទេស មិនទាន់អនុវត្តនៅឡើយទេ។
លោក វីដូដូ រងការរិះគន់ខ្លាំងចំពោះចំណាត់ការរបស់រដ្ឋាភិបាលដែលឆ្លើយតបមិនទាន់សមស្របនឹងស្ថានការណ៍ក្នុងប្រទេស។ ការមិនព្រមបិទទីក្រុងសំខាន់ៗ ពិសេសរដ្ឋធានីហ្សាការតាដែលមានប្រជាជនជាង៣០លាននាក់ ធ្វើឲ្យលោកក្លាយជាមុខសញ្ញារិះគន់កាន់តែខ្លាំងថែមទៀត។
ទាក់ទងរឿងប្រកាសអាសន្ននេះវិញ លោក វីដូដូ ដែលត្រូវបានស្គាល់ជាទូទៅថា ចូកូវី មិនបានផ្ដល់ព័ត៌មានលម្អិតច្រើនឡើយ។ លោកបានត្រឹមបង្ហើមពីវិធានការគម្លាតសង្គម និងការបញ្ចេញលុយចំនួន១,៥ពាន់លានដុល្លារដើម្បីជួយសង្គម និងឧបត្ថម្ភកម្មករដែលមានប្រាក់ខែទាប។ នៅឥណ្ឌូណេស៊ី កម្មករប្រាក់ខែទាប មានចំនួនរាប់លាននាក់ ហើយដែលជីវភាពគ្រួសារពឹងពាក់ស្ទើរទាំងស្រុងលើចំណូលដ៏ស្ដួចស្ដើងនេះ។
«ដើម្បីជម្នះផលប៉ះពាល់ដោយសារ COVID-19 យើងបានជ្រើសរើសការអនុវត្តគម្លាតសង្គមទ្រង់ទ្រាយធំ។ យើងត្រូវតែរៀនពីបទពិសោធប្រទេសផ្សេង ប៉ុន្តែមិនអាចធ្វើតាមប្រទេសផ្សេងទាំងស្រុងឡើយ ព្រោះប្រទេសនីមួយៗមានលក្ខខណ្ឌខុសគ្នា។» នេះជាការបញ្ជាក់របស់លោក ចូកូវី ។
តួលេខឆ្លងទូទាំងប្រទេសមានត្រឹមជាង១៥០០នាក់បែបនេះ ក៏ជាក្ដីបារម្ភដែរ ព្រោះនេះជាចំនួនទាបបើប្រៀបធៀបនឹងចំនួនប្រជាជនឥណ្ឌូណេស៊ីសរុបនោះ។ សមាគមគ្រូពេទ្យឥណ្ឌូណេស៊ី ព្រមានថា វិបត្តិ COVID-19 គឺអាក្រក់ខ្លាំងជាងរបាយការណ៍រដ្ឋាភិបាលទៅទៀត ហើយករណីសង្ស័យជាច្រើន មិនទាន់ត្រូវបានបញ្ជាក់ឡើយ៕
Tag:
COVID-19
ឥណ្ឌូណេស៊ី
© រក្សាសិទ្ធិដោយ thmeythmey.com