ព្រះកេសទេវតា និងអសុរា ត្រូវបានរកឃើញក្នុងប្រឡាយទឹកនៃខ្លោងទ្វារខ្មោច

ជាតិ

ព្រះកេសទេវតា និងអសុរា ត្រូវបានរកឃើញក្នុងប្រឡាយទឹកនៃខ្លោងទ្វារខ្មោច

01, Apr 2020 , 6:29 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ព្រះកេសទេវតា និងអសុរា នៃចម្លាក់ទាញព្រ័ត្រនៃខ្លោងទ្វារខ្មោច ត្រូវបានរកឃើញកប់នៅក្នុងប្រឡាយទឹក នៅព្រឹកថ្ងៃទី១ មេសានេះ។ បច្ចុប្បន្ន បដិមាទាំង២នេះ ត្រូវបាននាំទៅរក្សាទុកនៅអាជ្ញាធរជាតិអប្សរា ដើម្បីសម្អាត និងចុះបញ្ជីសារពើភ័ណ្ឌ។

ក្រុមការងារនៃអាជ្ញាធរជាតិអប្សរា បានប្រទះឃើញនូវរូបព្រះកេស ឬព្រះសីសៈ ទេវតា និងអសុរា (យក្ស) នៅក្នុងប្រឡាយទឹកខាងកើត នៃខ្លោងទ្វារខ្មោច។ តាមពិតកន្លងមកក្រុមការងារផ្នែកបេតិកភណ្ឌ តែងរកឃើញរូបបដិមា និងចម្លាក់ផ្សេងៗ ក្នុងតំបន់រមណីយដ្ឋានអង្គរ។ ហើយនៅចំណុចខ្លោងទ្វារខ្មោច ដែលជាខ្លោងទ្វារខាងកើតនៃក្រុងអង្គរធំនេះគឺ ចម្លាក់ទាញព្រ័ត្រដែលសង់បណ្ដោយខ្លោងទ្វារមានសភាពចាស់ទ្រុធទ្រោម និងជ្រុះធ្លាក់រាយប៉ាយមកក្រោម ដែលកន្លងមកមិនទាន់មានការធ្វើកំណាយសិក្សាស្រាវជ្រាវ ឬជួសជុលនោះទេ។

លោក ឈូក សុម៉ាឡា មន្ត្រីជំនាញផ្នែកចុះបញ្ជីសារពើភណ្ឌវត្ថុសិល្បៈ នៃនាយកដ្ឋានអភិរក្សប្រាសាទ ក្នុងឧទ្យានអង្គរនិងបុរាណវិទ្យាបង្ការ ប្រាប់សារព័ត៌មានថ្មីៗថា រូបព្រះកេសទាំង២ មានសភាពបាក់បែកច្រើន ដោយរូបទេវតាឃើញត្រឹមបបូរមាត់ និងបែកផ្នែកថ្ពាល់ និងត្រចៀក។ ចំណែករូបយក្ស ឃើញតែផ្នែកខាងខ្នង តែប៉ុណ្ណោះ។ បន្ទាប់ពីរកឃើញ ក្រុមអ្នកជំនាញបានដឹករូបទាំង២នេះ ទៅរក្សាទុកនៅស្នាក់ការអាជ្ញាធរជាតិអប្សរា ដើម្បីសម្អាត និងចុះបញ្ជី៕