COVID-19
ពីនេះ ពីនោះ
រូបត្លុក
×![]()
ដោយ: ថ្មីៗ
បើទោះបីជា សុធីរ និងសំណាង មិនជួបគ្នានៅក្នុងហាងកាហ្វេដូចសព្វដងទៀតក៏ដោយ។ តែក្លើទាំងពីរនៅបន្តទាក់ទងគ្នាតាមបណ្តាញសង្គម។ មេរោគ កូវីដ១៩ នេះ បានបង្ខាំងមិត្តភក្តិទាំងពីរឲ្យនៅឆ្ងាយពីគ្នាបន្តិច និងកាត់ផ្តាច់កាហ្វេពេលព្រឹកជាមួយគ្នារយៈធំ។ និយាយពីរឿងកូវីដ១៩ សុធីរ និងសំណាង បារម្ភរឿងការសាយភាយនៅអំឡុពេលចូលឆ្នាំខ្មែរ ព្រោះវាជាពេលវេលាដែលពលរដ្ឋខ្មែរធ្វើដំណើរច្រើន និងជួបជុំគ្នាច្រើន។ 
សុធីរ៖ អា សំណាង! តួលេខអ្នកឆ្លងនាពេលនេះមើលទៅនៅអាចទប់ស្កាត់ និងគ្រប់គ្រងបាន។ តែអញបារម្ភនៅពេលចូលឆ្នាំខ្មែរខាងមុខនេះ។ ចុះអ្ហែងគិតម៉េចដែរ?
សំណាង៖ អញក៏បារម្ភដែរ ព្រោះ ចូលឆ្នាំខ្មែរ វាជាពេលវេលាដែលក្រុមគ្រួសារត្រូវធ្វើដំណើរទៅជួបជុំគ្នា។ អ្នកភ្នំពេញត្រូវទៅខេត្តរៀងៗខ្លួន ជាលក្ខណៈគ្រួសារ។ កម្មករពីក្រៅប្រទេសត្រូវត្រឡប់ចូលស្រុកវិញ។ អ្នកចូលចិត្តដើរកម្សាន្តទប់ចិត្តមិនបាន អាចនៅបន្តដើរលេងដោយមិនខ្វល់ពីមេរោគកូវីដ១៩។ រឿងមួយទៀត ដែលគួរគិតដែរនោះ គឺថា«ចូរកុំគិតថា សាច់ញាតិខ្លួនឯងមិនចម្លងមេរោគ។ គ្រួសារតែមួយ ក៏អាចចម្លងគ្នាដែរ។ ទប់ចរន្តទាំងអស់នេះ ពិតជាពិបាកណាស់ណា៎ បើអញគិតមើលទៅ!។
សុធីរ៖ អ៊ីចឹងធ្វើម៉េចទៅ?
សំណាង៖ មិនមែនស្រួលទេ។ បើគ្រាន់តែអំពាវនាវកុំឲ្យធ្វើដំណើរ ប្រហែលជាគ្មានប្រសិទ្ធិភាពទេ។
សុធីរ៖ អ៊ីចឹងឲ្យរដ្ឋាភិបាលធ្វើម៉េចចុះ?
សំណាង៖ អញមិនអាចឆ្លើយជំនួសរដ្ឋាភិបាលបានទេ។ តែបើជាគំនិតអញ ប្រសិនបើរដ្ឋាភិបាលអាចធ្វើបាន គឺថា ហាមពលរដ្ឋធ្វើដំណើរឆ្លងខេត្តនីមួយៗ។ ហាមធ្វើដំណើរឆ្លងខេត្តរាជធានីលើកលែងតែករណីពិសេស ឬចាំបាច់។ និយាយជារួម នរណាស្ថិតនៅទីណា គឺត្រូវស្ថិតនៅទីនោះសិនក្នុងអំឡុងចូលឆ្នាំនេះឯង។ ហាមរាល់ការធ្វើដំណើរចល័ត បើមិនមានការចាំបាច់។ ការធ្វើដំណើរចល័តដោយរថយន្តរួមគ្នា, ការជួបជុំគ្នាក្នុងទម្រង់ច្រើននាក់, ផឹកស៊ីច្រើននាក់… សុទ្ធសឹងជាការជំរុញឲ្យមានការឆ្លងបន្ថែមដោយចៃដន្យទាំងអស់។ បើផ្អាកបាន សូមផ្អាកសិនទៅ!។
សុធីរ៖ អ៊ីចឹង ចូលឆ្នាំខ្មែរឆ្នាំហ្នឹងមិនឆាចោលទៅហើយ អា សម្លាញ់ សំណាង?
សំណាង៖ អានេះ នៅគិតរឿងចូលឆ្នាំអីទៀតអ្ហា! គេវឹកវរពេញពិភពលោកហើយហ្នឹង រឿងមេរោគកូវីដ១៩ហ្នឹង។ បើយើងទប់បានពេលចូលឆ្នាំខ្មែរហ្នឹង។ កម្ពុជាយើងពិតជាអាចឆ្លងរួចផុតគ្រាដ៏ប្រឈមមួយនេះ។ អា សុធីរ ទ្រាំទៅ ឆ្នាំនេះ ឆាចោលទៅ។ ចាំឆ្នាំក្រោយចាំសប្បាយឲ្យអស់ដៃតែម្តង៕
© រក្សាសិទ្ធិដោយ thmeythmey.com
