COVID-19
អន្តរជាតិ
ទារកអាយុ៦សប្តាហ៍ម្នាក់នៅអាមេរិក ស្លាប់ដោយសារ COVID-19
× ទារកអាមេរិកអាយុ៦សប្តាហ៍ម្នាក់ បាត់បង់ជីវិតដោយសារ COVID-19 ។ អភិបាលរដ្ឋ Connecticut បញ្ជាក់បែបនេះ នៅថ្ងៃពុធ ទី១ ខែមេសា។ ក្មេងតូចទើបកើតរូបនេះ គឺជាករណីស្លាប់ក្មេងបំផុតក្នុងសហរដ្ឋអាមេរិក ដោយសារវីរុសដែលផ្ទុះរាលដាលដំបូងក្នុងប្រទេសចិន។
អភិបាលរដ្ឋ Connecticut លោក Ned Lamont បានសរសេរលើបណ្ដាញសង្គម Twitter ថា ទារករូបនេះ ត្រូវបានបញ្ជូនទៅកាន់មន្ទីរពេទ្យ កាលពីចុងសប្តាហ៍មុន ហើយពុំអាចជួយសង្គ្រោះបាន។ លោក បន្តទៀតថា៖«លទ្ធផលតេស្ត បញ្ជាក់ថា កាលពីយប់មិញថា ក្មេងទើបកើតរូបនេះ មានផ្ទុក COVID-19»។
ទាក់ទិនការស្លាប់របស់ទារកអាមេរិកអាយុ៦សប្តាហ៍នេះ លោកអភិបាល Lamont អះអាងថា នេះគឺជារឿងគួរឲ្យក្រៀមក្រំបំផុត ហើយលោកជឿជាក់ថា នេះគឺជាករណីស្លាប់វ័យក្មេងបំផុតមួយ ដោយសារជំងឺ COVID-19 ។
ករណីស្លាប់លើទារកដោយសារ COVID-19 បែបនេះ ពុំមែនជាលើកទីមួយឡើយនៅសហរដ្ឋអាមេរិក។ កាលពីសប្តាហ៍មុន អាជ្ញាធររដ្ឋ Illinois បញ្ជាក់ថា ពួកគេកំពុងស៊ើបអង្កេតលើករណីស្លាប់ក្មេងតូចម្នាក់មានអាយុតិចជាងមួយឆ្នាំ ដែលមានលទ្ធផលតេស្ត COVID-19 វិជ្ជមាន។ យោងតាមប្រព័ន្ធផ្សព្វផ្សាយក្នុងស្រុកអាមេរិក ដែលដកស្រង់ចុះផ្សាយដោយ AFP ទារករូបនេះ មានអាយុ៩ខែ។
សូមបញ្ជាក់ថា គិតត្រឹមថ្ងៃពុធ ទី១ ខែមេសា ករណីឆ្លង COVID-19 សរុប កើនលើស ២០ម៉ឺនករណីហើយ ខណៈមនុស្សយ៉ាងហោចណាស់ ៤៤៧៦នាក់ បាត់បង់ជីវិត។ នេះបើតាមការតាមដានរបស់សាកលវិទ្យាល័យ Johns Hopkins។ រដ្ឋញូវយ៉ក ដែលមានព្រំដែនជាប់រដ្ឋ Conneticut ជាតំបន់ដែលរងគ្រោះបំផុតរបស់ COVID-19 ដែលមានករណីស្លាប់ជិត២០០០នាក់៕
Tag:
សហអាមេរិក
COVID-19
© រក្សាសិទ្ធិដោយ thmeythmey.com