COVID-19
ជាតិ
លោក ឈុំ សុជាតិ អ្នកនាំពាក្យក្រសួងការពាតិ ថ្លែងនៅក្នុងសន្និសីទកាសែត ស្តីពីបច្ចុប្បន្នភាព និងទិសដៅបន្តរបស់ក្រសួងការពារជាតិ នៅថ្ងៃទី២ មេសា នាទីស្តីការគណៈរដ្ឋមន្រ្តី (រូបពីក្រុមអ្នកនាំពាក្យរដ្ឋាភិបាល)
×![]()
ដោយ: ធឿន បញ្ញាឬទិ្ធ
ភ្នំពេញ៖ កងកម្លាំងរក្សាសន្តិសុខអង្គការសហប្រជាជាតិរបស់កម្ពុជា ដែលកំពុងបម្រើការងារនៅក្រៅប្រទេស មិនទាន់មានអ្នកឆ្លងជំងឺCOVID-19 ឡើយ។ នេះជាការបញ្ជាក់របស់លោក ឈុំ សុជាតិ អ្នកនាំពាក្យក្រសួងការពារជាតិ នៅក្នុងសន្និសីទកាសែត ស្ដីពីវឌ្ឍនភាព និងទិសដៅបន្ដរបស់ក្រសួង នៅថ្ងៃទី២ ខែមេសា ។
លោក ឈុំ សុជាតិ បានបញ្ជាក់ថា ស្ថានភាពបំពេញការងាររបស់កងទ័ពមួកខៀវកម្ពុជា ជាង៧០០នាក់នោះ នៅប្រក្រតីធម្មតា ដោយមិនទាន់មានដំណឹងអវិជ្ជមានអ្វីលើពួកគេ ទាក់ទងនឹងការឆ្លងCOVID-19 នៅឡើយទេ។ «ចំពោះបញ្ហាកូវីដ ទាក់ទងនឹងកម្លាំងនៅក្រៅប្រទេស គឺអត់ទាន់មានដំណឹងអ្វីទេ »។ នេះជាការបញ្ជាក់របស់លោក ឈុំ សុជាតិ ដែលបានបន្ថែមថា វាជាព័ត៌មានល្អសម្រាប់កងទ័ពកម្ពុជា។
បើតាមអ្នកនាំពាក្យក្រសួងការពារជាតិរូបនេះ កងកម្លាំងកម្ពុជា កំពុងបម្រើការងារនៅក្នុងប្រទេសចំនួន៨ ក្នុងនោះរួមមាន ស៊ូដង់ ស៊ូដង់ខាងត្បូង លីបង់ ស៊ីប ស៊ីរី ឆាដ ម៉ាលី និងសាធារណរដ្ឋអាហ្វ្រិកកណ្តាល។
ចំពោះគម្រោងបញ្ជូនកងទ័ពមួកខៀវទៅក្រៅប្រទេស នាពេលខាងមុខនេះវិញ មិនទាន់មានការលុបចោលនោះទេ ពោលគឺរង់ចាំមើលសភាពការណ៍នៃការរាតត្បាតជំងឺឆ្លងCOVID-19 នេះសិន។ នេះជាការបញ្ជាក់របស់លោក ឈុំ សុជាតិ។
កម្ពុជា បានបញ្ជូនកងកម្លាំងរក្សាសន្តិភាពក្រោមឆ័ត្រអង្គការសហប្រជាជាតិ ទៅក្រៅប្រទេសជាង៦ពាន់នាក់ហើយ គិតចាប់តាំងពីឆ្នាំ២០០៦មក។ បេសកកម្មកងទ័ពមួកខៀវកម្ពុជា ភាគច្រើនគឺបម្រើការងារជាកងវិស្វកម្មបោសសម្អាតយុទ្ធភ័ណ្ឌមិនទាន់ផ្ទុះ ការសាងផ្លូវ ,ជួយបោះបង្គោលព្រំដែន និងផ្នែកសុខាភិបាលជាដើម ៕
Tag:
ឈុំ សុជាតិ
COVID-19
© រក្សាសិទ្ធិដោយ thmeythmey.com
