COVID-19
អន្តរជាតិ
ករណីស្លាប់ដោយសារ COVID-19 នៅថៃឡើងដល់១៥នាក់ ក្នុងនោះម្នាក់ស្លាប់លើរថភ្លើង ប្រភពរូប៖ បាងកកប៉ុស្តិ៍
× រដ្ឋាភិបាលថៃ នៅថ្ងៃទី២ ខែមេសា បានរាយការណ៍ករណីស្លាប់ដោយសារជំងឺ COVID-19 ចំនួន ៣នាក់បន្ថែមទៀត ដែលធ្វើឲ្យតួលេខស្លាប់សរុបក្នុងប្រទេសនេះឡើងដល់ ១៥នាក់ហើយ។ ទន្ទឹមនេះ ករណីឆ្លងថ្មី១០៤នាក់ទៀត ក៏ត្រូវបានរកឃើញផងដែរ ដែលបង្កើនករណីឆ្លងសរុបដល់ ១៨១៥នាក់។
អ្នកនាំពាក្យមជ្ឈមណ្ឌលរដ្ឋបាលទទួលបន្ទុក COVID-19 របស់រដ្ឋាភិបាលថៃ លោកវេជ្ជបណ្ឌិត Taweesin Visanuyothin គូសបញ្ជាក់ថា ក្នុងចំណោមអ្នកស្លាប់ទាំងបីនាក់ថ្មី ជនរងគ្រោះម្នាក់គឺជាជនជាតិថៃ អាយុ ៥៧ឆ្នាំ ដែលបានត្រលប់មកពីប្រទេសប៉ាគីស្ថាន ហើយស្លាប់លើរថភ្លើងកាលពីថ្ងៃទី៣០ ខែមីនា។
បើតាមការចុះផ្សាយរបស់កាសែតបាងកកប៉ុស្តិ៍ បុរសរូបនេះ បានធ្វើដំណើរទៅកាន់ប៉ាគីស្ថានកាលពីថ្ងៃ២២ ខែកុម្ភៈ ហើយត្រលប់មវិញតាមព្រលានយន្តហោះអន្តរជាតិសុវណ្ណភូមិ កាលពីថ្ងៃទី២៩ ខែមីនា។ ក្រោយមក លោកបានជិះរថភ្លើងនៅម៉ោង៣រសៀលថ្ងៃចន្ទដើមសប្ដាហ៍នេះ។
បើតាមលោក Taweesin បុរសដែលដួលស្លាប់លើរថភ្លើងរូបនេះ ក៏មានជំងឺទឹកនោមផ្អែម និងសម្ពាធឈាមឡើងខ្ពស់។ ការស្លាប់របស់លោកបានធ្វើឲ្យមន្ត្រីបម្រើការលើរថភ្លើង១៥នាក់ដែលប៉ះពាល់ជាមួយលោកធ្វើចត្តាឡីស័កខ្លួនឯង។
ករណីស្លាប់មួយទៀត គឺជាបុរសថៃអាយុ៧៧ឆ្នាំម្នាក់ដែលមានជំងឺទឺកនោមផ្អែម និងផ្លូវដង្ហើម។ បុរសរងគ្រោះរូបនេះ ធ្លាប់ប៉ះពាល់ជាមួយអ្នកជំងឺ COVID-19 ពីមុនមក។ ចំណែកករណីស្លាប់ទី៣វិញគឺបុរសថៃអាយុ៥៥ឆ្នាំម្នាក់ ដែលជាអ្នកបើកបររថយន្តសាធារណៈនៅព្រលានយន្តហោះសុវណ្ណភូមិ ក្នុងខេត្ត Samut Prakan ៕
© រក្សាសិទ្ធិដោយ thmeythmey.com