COVID-19
កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ព្រឹត្តិការណ៍កីឡាវាយកូនបាល់កម្រិតពិភពលោក Wimbledon ត្រូវលុបចោលដោយសារការរាតត្បាតយ៉ាងខ្លាំងក្លារបស់ COVID-19។ នេះជាការលុបចោលលើកដំបូងហើយចាប់តាំងពីសង្គ្រាមលោកលើកទីពីរមក។
Wimbledon ឆ្នាំ២០២០ គ្រោងនឹងធ្វើឡើងនៅចន្លោះថ្ងៃទី២៩ ខែមិថុនា ដល់ថ្ងៃទី១២ ខែកក្កដា។ ដោយសារវិបត្តិជំងឺនេះ កីឡាវាយកូនបាល់កម្រិតអាជីពលើវាលស្មៅនៅជុំវិញពិភពលោកនឹងត្រូវផ្អាករហូតដល់ថ្ងៃទី១៣ ខែកក្កដា។
ព្រឹត្តិការណ៍កីឡាវាយកូនបាល់កម្រិត Grand Slam នៅទឹកដីអង់គ្លេសនេះ ជាកម្មវិធីកីឡារដូវក្តៅដ៏ធំចុងក្រោយបង្អស់ដែលត្រូវលុបចោល បន្ទាប់ពីការប្រកួតពានរង្វាន់ Euro 2020 និងកីឡាអូឡាំពិកទីក្រុងតូក្យូ ដែលត្រូវពន្យារពេលរហូតដល់១២ខែក្រោយ។
«នេះជាការសម្រេចចិត្តដោយផ្អែកលើកការយកចិត្តទុកដាក់ខ្ពស់បំផុតចំពោះសុខភាពសាធារណៈ និងសុខុមាលភាពរបស់កីឡាករ រួមទាំងអ្នកពាក់ព័ន្ធទាំងអស់»។ លោក Ian Hewitt ប្រធានកីឡាវាយកូនបាល់អង់គ្លេសលើកឡើងដូច្នេះ។
Wimbledon បង្កើតធ្វើឡើងដំបូងក្នុងឆ្នាំ ១៨៧៧ ហើយបានបន្តការប្រកួតជារៀងរាល់ឆ្នាំ ដោយលើកលែងតែពីរដំណាក់កាលប៉ុណ្ណោះ។ Wimbledon បានផ្អាកចាប់ពីឆ្នាំ ១៩១៥-១៨ ដោយសារសង្គ្រាមលោកលើកទី១ និងពីឆ្នាំ ១៩៤០-៤៥ សង្គ្រាមលោកលើកទី២។ ៧៥ឆ្នាំក្រោយមក ពោលគឺឆ្នាំ២០២០ ព្រឹត្តិការណ៍កីឡាវាយកូនបាល់មួយនេះត្រូវសម្រេចលុបចោលតែម្តង ប៉ុន្តែដោយសារសង្គ្រាមជំងឺសកល COVID-19។
ដោយឡែក French Open ដែលគ្រោងនឹងចាប់ផ្តើមនៅខែឧសភា ត្រូវលើកទៅធ្វើនៅថ្ងៃទី ២០ ខែកញ្ញា រហូតដល់ថ្ងៃទី៤ ខែតុលាវិញ។ យ៉ាងណា ប្រសិនបើ COVID-19 នៅតែមិនថមថយទេនោះ ព្រឹត្តិការណ៍កីឡាវាយកូនបាល់នៅទឹកដីបារាំងនេះ អាចនឹងត្រូវពន្យារជាបន្តទៀត៕
Tag:
Wimbledon
COVID-19
© រក្សាសិទ្ធិដោយ thmeythmey.com
