ជាតិ
សង្គមជាតិ
រីករាយពេលបានសះស្បើយ តែបុរសអាយុ៤០ឆ្នាំនៅបារម្ភគ្រួសារដែលឆ្លងជំងឺពីខ្លួន
បុរសជនជាតិខ្មែរអាយុ៤០ឆ្នាំ ជាសះស្បើយ និងចាកចេញពីមន្ទីរពេទ្យនៅរសៀលថ្ងៃទី២ មេសា
×![]()
សៀមរាប៖ ក្រោយសម្រាកព្យាបាលជំងឺអស់រយៈពេល១៩ថ្ងៃរួចមក បុរសជនជាតិខ្មែរអាយុ៤០ឆ្នាំ ដែលបានឆ្លងជំងឺកូវីដ១៩ពីប្រទេសម៉ាឡេស៊ី បានជាសះស្បើយ និងត្រឡប់ទៅផ្ទះវិញហើយ។ យ៉ាងណា គ្រូពេទ្យបន្តឱ្យបុរសរូបនេះ ធ្វើចត្ដាឡីស័កនៅផ្ទះរយៈពេល១៤ថ្ងៃទៀត ដើម្បីត្រួតពិនិត្យសុខភាពបន្ត។
អារម្មណ៍រីករាយ និងទុក្ខសោក បន្តស្ថិតនៅក្នុងខ្លួនបុរសជនជាតិខ្មែរអាយុ៤០ឆ្នាំ ក្រោយពេលជាសះស្បើយជំងឺកូវីដ១៩។ បុរសរូបនេះរីករាយពេលខ្លួនជាពីជំងឺ តែកើតទុក្ខ ពេលដឹងថា ប្រពន្ធនិងកូនប្រុសម្នាក់ ឆ្លងជំងឺពីខ្លួន។ ពួកគេទាំង២ កំពុងសម្រាកព្យាបាលជំងឺក្នុងមន្ទីរពេទ្យបង្អែកខេត្តសៀមរាបតាំងពីថ្ងៃទី៣០ មីនាមក មុនគ្រូពេទ្យធ្វើតេស្ដវិជ្ជមានមួយថ្ងៃ។
ប្រាប់ក្រុមអ្នកសារព័ត៌មានពេលរៀបចំចាកចេញពីមន្ទីរពេទ្យនៅរសៀលថ្ងៃទី២ មេសា បុរសដែលមានប្រវត្តិទៅចូលរួមពិធីបុណ្យសាសនានៅប្រទេសម៉ាឡេស៊ី បានអរគុណដល់ក្រុមគ្រូពេទ្យដែលខិតខំព្យាបាល និងយកអាសារខ្លួនទាំងយប់ថ្ងៃដោយមិនខ្លាចនឿយហត់។ ជាមួយគ្នានោះ លោកក៏អរគុណដល់ថ្នាក់ដឹកនាំសាសនាឥស្លាមក្នុងខេត្តសៀមរាប ដែលមើលទុក្ខធុរៈគ្រួសារលោកពេលជួបទុក្ខលំបាកនេះផងដែរ។ សម្រាប់បុរសរូបនេះ អ្វីដែលសោកស្ដាយខ្លាំងនោះ គឺលោកចម្លងមេរោគកូរ៉ណាទៅដល់ក្រុមគ្រួសារខ្លួនដោយមិនដឹងខ្លួន។ លោកបញ្ជាក់ថា សុខចិត្តឈឺតែម្នាក់ឯង មិនចង់ឱ្យប្រពន្ធកូនឈឺទេ។
គ្មានក្រុមគ្រួសារមកទទួលនឹងគេឡើយ មានតែថ្នាក់ដឹកនាំសហគមន៍ និងមិត្តភក្ដិប៉ុន្មាននាក់។ គ្រួសាររបស់លោក ក្រៅពីប្រពន្ធនិងកូន គឺមានឪពុកក្មេក និងកូនតូចៗចំនួន២នាក់ទៀត កំពុងសម្រាកនៅមន្ទីរពេទ្យ ដោយក្រុមគ្រូពេទ្យបន្តតាមដានសុខភាពពួកគេ។ ពួកគេទាំង៣នាក់ អាចនឹងវិលត្រឡប់ទៅផ្ទះវិញនៅថ្ងៃទី៣ មេសា ប្រសិនលទ្ធផលតេស្ដអវិជ្ជមានលើកទី២។ នេះជាការបញ្ជាក់ពីប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់។ លោកបន្ថែមថា អ្នកទាំង៥នាក់ (ប្រពន្ធនិងកូនដែលកំពុងឆ្លង, ឪពុកក្មេកបុរសដែលទើបជាសះស្បើយ និងកូន២នាក់ទៀត) មានសុខភាពល្អធម្មតា ហើយអាចសះស្បើយឆាប់ៗខាងមុខនេះ។
គួរបញ្ជាក់ថា បុរសខាងលើត្រូវបានរកឃើញថាមានជំងឺកូវីដ១៩នៅយប់ថ្ងៃទី១៥ មីនា។ ភ្លាមៗ គ្រួសារលោកចំនួន៥នាក់ បូកទាំងឪពុកក្មេកក៏ត្រូវបានធ្វើតេស្ដ តែរកមិនឃើញជំងឺនេះ។ រំលងបាន១៧ថ្ងៃ ប្រពន្ធ និងកូនប្រុសម្នាក់ ធ្វើតេស្ដវិជ្ជមាន។ ខេត្តសៀមរាបមានអ្នកជំងឺកូវីដ១៩ សរុប៧នាក់ តែសះស្បើយ២នាក់។ បុរសជនជាតិខ្មែរអាយុ៣៨ឆ្នាំ ដែលឆ្លងជំងឺនេះពីជនជាតិជប៉ុននៅថ្ងៃទី៧ មីនា បានជាសះស្បើយនៅថ្ងៃទី ៣០ មីនា គឺប្រើពេល២៥ថ្ងៃ ដើម្បីព្យាបាលជំងឺ៕
Tag:
COVID-19
© រក្សាសិទ្ធិដោយ thmeythmey.com
