អន្តរជាតិ
ហេតុអ្វីបានជារុក្ខជាតិភាគច្រើន មានពណ៌បៃតង?
× វាជារឿងធម្មជាតិមួយ ដែលរុក្ខជាតិភាគច្រើន មានពណ៌បៃតង។ តាំងពីកូនរុក្ខជាតិតូចៗ ដែលមនុស្សយកមកធ្វើជាអាហារ រហូតទៅដល់ព្រៃប្រឹក្សាធំៗ ពណ៌បៃតងភាគច្រើន គឺតំណាងឲ្យរុក្ខជាតិ និងភាពរស់រានមានជីវិត។ តើមូលហេតុអ្វី បានជារុក្ខជាតិភាគច្រើន មានពណ៌បៃតង? ហេតុអ្វីបានជាពេលខ្លះ ស្លឹកឈើផ្លាស់ប្តូរពណ៌?
រុក្ខជាតិជាភាវៈរស់ មិនខុសគ្នាពីសត្វមានជីវិតដទៃនោះទេ។ រុក្ខជាតិ ទាមទារការផលិតថាមពល ដើម្បីការរស់នៅ។ ដើម្បីផលិតថាមពលទាំងនេះឡើង រុក្ខជាតិផ្ទុកនូវសារធាតុគីមីម្យ៉ាងហៅថា «ក្លរ៉ូភីល» ឬ Chlorophyll ជាភាសាអង់គ្លេស។ ក្លរ៉ូភីល ជាអ្នកបម្លែងថាមពល ទៅឲ្យរុក្ខជាតិ ដោយការប្រើប្រាស់ពន្លឺព្រះអាទិត្យ ក្រោមលំនាំ«រស្មីសំយោគ» ឬ Photosynthesis ។ ក្លរ៉ូភីលនេះហើយ ដែលជាសារធាតុធ្វើឲ្យរុក្ខជាតិ មានពណ៌បៃតង មកកាន់ចក្ខុវិញ្ញាណរបស់មនុស្ស។ ក្លរ៉ូភីល ស្រូបយករលកពន្លឺពណ៌ខៀវ និងក្រហម នៅក្នុងតារាងអេឡិចត្រូម៉ាញេទិច និងផ្លាតរលកពន្លឺពណ៌បៃតង ចេញក្រៅវិញ។ ហេតុដូចនេះហើយ ទើបមនុស្សមើលរុក្ខជាតិថាមានពណ៌បៃតង។
ស្លឹករុក្ខជាតិប្តូរពណ៌ ដោយសារតែហេតុផលមួយចំនួន ដូចជា រដូវធម្មជាតិ និងសុខភាពនៃរុក្ខជាតិនោះផ្ទាល់។ នៅរដូវស្លឹកឈើជ្រុះត្រជាក់ សារធាតុក្លរ៉ូភីល ត្រូវបានបំបែក និងអនុញ្ញាតឲ្យសារធាតុផ្សេងៗ នៅក្នុងស្លឹករុក្ខជាតិ ផ្លាតពណ៌រាងត្នោតចេញមកក្រៅវិញ។ នៅពេលដែលរុក្ខជាតិទទួលពន្លឺតិច ឬច្រើនពេក ពណ៌បៃតង នៃរុក្ខជាតិ ក៏អាចហើរ ឬក្លាយទៅជាពណ៌ត្នោតដែរ។ ករណីមួយទៀត នៅពេលដែលរុក្ខជាតិមិនបានទទួលបរិមាណ ឬជីវជាតិក្នុងដីគ្រប់គ្រាន់ នោះស្លឹករុក្ខជាតិ ក៏អាចប្រែពណ៌ផងដែរ។
ស្លឹករុក្ខជាតិខ្លះ ដែលមិនមានពណ៌បៃតង មិនមែនមានន័យថា ពួកគេមិនផ្ទុកសារធាតុក្លរ៉ូភីលនោះទេ។ ពេលខ្លះ សារធាតុគីមីមួយចំនួន អាចគ្របដណ្តប់លើស្រទាប់ របស់សារធាតុក្លរ៉ូភីល ដែលធ្វើឲ្យរុក្ខជាតិនោះ មានពណ៌ខុសពីបៃតង។ ទោះបីជាយ៉ាងនេះក្តី រុក្ខជាតិទាំងនោះ ក៏នៅតែប្រើប្រាស់សារធាតុក្លរ៉ូភីល ក្នុងការផលិតថាមពលដដែលទេ៕
© រក្សាសិទ្ធិដោយ thmeythmey.com