COVID-19
កីឡាជាតិ
ជាតិ
ទូរទស្សន៍៥ ស្នើបើកសង្វៀនប្រដាល់ឡើងវិញ តែត្រូវសហព័ន្ធបដិសេធ
× ស្ថានីយទូរទស្សន៍ចំនួន៥ រួមមាន Bayon TV, PNN, CNC, SEATV និងស្ថានីយទូរទស្សន៍ថោន បានស្នើសុំបើកសង្វៀនសប្រដាល់ឡើងវិញ ទៅសហព័ន្ធកីឡាប្រដាល់គុនខ្មែរ ស្របពេលការរីករាលដាលនៃកូវីដ-១៩នៅកម្ពុជាមិនទាន់ធូរស្បើយ។ ប៉ុន្តែសំណើនេះ ត្រូវបានសហព័ន្ធបដិសេធ ដោយបានស្នើត្រឡប់ទៅទូរទស្សន៍ទាំងនោះ រង់ចាំស្ថានការណ៍កូវីដ-១៩ ធូរស្បើយសិន។
សំណើសុំបើកសង្វៀនប្រដាល់ឡើងវិញនៅសប្តាហ៍នេះ របស់ស្ថានីយទូរទស្សន៍ចំនួន៥ ពុំទទួលបានជោគជ័យនោះទេ បន្ទាប់ពីសហព័ន្ធកីឡាប្រដាល់គុនខ្មែរ ពុំបើកភ្លើងបៃតងឲ្យឡើយដោយបារម្ភពីការរីករាលនៃកូវីដ-១៩ ដែលពុំទាន់ធូរស្រាលនៅឡើយនៅកម្ពុជា។ នេះបើតាមការបញ្ជាក់របស់លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ។
ការផ្អាកដំណើរការមានរយៈពេលខ្លីពេក ក៏ជាមូលហេតុមួយផងដែរ។ ពោលគឺស្ថានីយទូរទស្សន៍ចំនួន៤ ក្នុងចំណោមស្ថានីយទាំងនេះ ពួកគេបានផ្អាកសង្វៀនប្រដាល់ ទើបតែបានមួយសប្តាហ៍នោះទេ។
«មានស្ថានីយទូរទស្សន៍ចំនួន៥ បានដាក់សំណើមកខ្ញុំ សុំបើកដំណើរការសង្វៀនប្រដាល់នៅសប្តាហ៍នេះ។ តែខ្ញុំមើលទៅដូចជាមិនទាន់ស្រួល ព្រោះវាសម្រាកទើបបានត្រឹមមួយសប្តាហ៍។ ដូច្នេះខ្ញុំបានចារលើសំណើទាំងនោះអស់ហើយ គឺមិនឲ្យរៀបចំទេ»។ នេះជាការបញ្ជាក់របស់លោក តែម ម៉ឺន ក្នុងបទសម្ភាសជាមួយសារព័ត៌មានថ្មីៗ តាមទូរសព្ទនៅថ្ងៃទី៣ ខែមេសា ឆ្នាំ២០២០។
ប្រធានសហព័ន្ធរូបនេះសង្កត់ធ្ងន់ថា ការផ្អាកនេះនឹងបន្តរហូតស្ថានការណ៍ នៃការរីករាលដាលនៃកូវីដ-១៩ នៅកម្ពុជា មានភាពធូរស្រាល។ ជាមួយគ្នានេះ លោក ស្នើឲ្យស្ថានីយទូរទស្សន៍ទាំងអស់ អត់ធ្មត់ និងចូលរួមបង្ការ និងទប់ស្កាត់ការរាលដាលនៃកូវីដ-១៩ នៅកម្ពុជា។ លោក ទទួលស្គាល់ថា ការផ្អាកនេះ នឹងធ្វើឲ្យប៉ះពាល់ដល់ជីវភាពកីឡាករមួយចំនួនដែលពឹងផ្អែកទាំងស្រុងលើការឡើងសង្វៀន ហើយក៏ប៉ះពាល់ដល់ក្លិបមួយចំនួនដែរ។
ស្ថានីយទូរទស្សន៍ទាំង៥ ដែលបានដាក់សំណើទៅសហព័ន្ធរួមមាន Bayon TV, PNN, CNC, SEATV និងស្ថានីយទូរទស្សន៍ថោន។ បើតាមការបញ្ជាក់របស់លោក តែម ម៉ឺន ក្នុងសំណើរបស់ស្ថានីយទូរទស្សន៍ទាំងនេះ គឺស្នើសុំបើកសង្វៀនប្រដាល់ឡើងវិញ តែសុំប្រកួតបិទទ្វារដោយមិនអនុញ្ញាតឲ្យមានអ្នកគាំទ្រចូលរួមទស្សនាផ្ទាល់នោះទេ។
គួររំលឹកថា កាលពីថ្ងៃទី២០ ខែមីនា ឆ្នាំ២០២០ សហព័ន្ធកីឡាប្រដាល់គុនខ្មែរ បញ្ជាឲ្យផ្អាករៀបចំសង្វៀនប្រដាល់តាមស្ថានីយទូរទស្សន៍ទាំងអស់ ដោយសារបារម្ភពីការរីករាលដាលនៃកូវីដ-១៩។ គិតត្រឹមថ្ងៃទី៤ ខែមេសា ឆ្នាំ២០២០ កម្ពុជាមានអ្នកផ្ទុកកូវីដ-១៩ ចំនួន១១៤នាក់ និងព្យាបាលជាសះស្បើយចំនួន៤៩នាក់៕
Tag:
ប្រដាល់គុនខ្មែរ
តែម ម៉ឺន
© រក្សាសិទ្ធិដោយ thmeythmey.com