COVID-19
អន្តរជាតិ
ចិន គោរពវិញ្ញាណក្ខន្ធជនរងគ្រោះដោយសារ COVID-19 ទូទាំងប្រទេស ទង់ជាតិចិនត្រូវបានបង្ហូតចុះនៅទីលានធានអានមិនក្នុងរដ្ឋធានីប៉េកាំង។ រូបភាព Xinhua
× ចិន នៅថ្ងៃទី៤ ខែមេសានេះ បានរៀបចំពិធីស្មិងស្មាធិ៍ទូទាំងប្រទេសដើម្បីគោរពវិញ្ញាណក្ខន្ធជនរងគ្រោះដែលបាត់បង់ជីវិតដោយសារជំងឺ COVID-19 ។ សំឡេងស៊ីផ្លេរថយន្ត និងស៊ីរ៉ែន ត្រូវបានបន្លឺឡើងព្រមគ្នាដើម្បីសម្ដែងការដឹងគុណ និងការគោរពចំពោះអ្នកស្លាប់ទាំងអស់ ក៏ដូចជាក្រុមគ្រូពេទ្យដែលលះបង់ជីវិតរបស់ពួកគេក្នុងការប្រយុទ្ធប្រឆាំង COVID-19 ។
ការគោរពវិញ្ញាណក្ខន្ធជនរងគ្រោះទាំងជាងបីពាន់បីរយនាក់ បានផ្ដើមនៅម៉ោង១០ព្រឹកថ្ងៃទី៤ ខែមេសា ដោយសកម្មភាពនៅទូទាំងប្រទេសចិន ត្រូវផ្អាករយៈពេលបីនាទី។ មនុស្សម្នាជាច្រើន បានឈរស្មិងស្មាធិ៍នៅតាមដងផ្លូវនានា សេវាកម្មរថភ្លើង ឡានក្រុង និងឡានឯកជនជាច្រើនបានឈប់ ហើយស៊ីផ្លេក៏ត្រូវបានបន្លឺយ៉ាងកងរំពង។
បើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua ប្រធានាធិបតីចិន ស៊ី ជិនភីង និងមន្ត្រីជាន់ខ្ពស់ជាច្រើននាក់ បានឈរស្មិងស្មាធិ៍នៅទីស្នាក់បក្សកុម្មុយនីស្ត Zhongnanhai ក្នុងរដ្ឋធានីប៉េកាំង។ ទង់ជាតិចិនទាំងអស់ ទាំងនៅក្នុងស្រុក និងនៅតាមស្ថានទូតចិនប្រចាំបរទេស ត្រូវបង្ហូតមកត្រឹមពាក់កណ្ដាលដងទាំងអស់។
នៅឯទីក្រុងវូហានវិញ ការគោរពវិញ្ញាណក្ខន្ធ ក៏ត្រូវបានធ្វើដែរ។ វូហានជាទីក្រុងដែល COVID-19 ផ្ទុះឡើងមុនគេ មុនរាលដាលទៅកាន់តំបន់ផ្សេងៗរបស់ចិន រួចបន្តទៅកាន់ពិភលោក។ មិនមែនតែសម្រាប់ពលរដ្ឋដែលរងគ្រោះឡើយ ការស្មឹងស្មាធិ៍ដល់ទៅបីនាទីនេះ ក៏ជាការសម្ដែងការដឹងគុណដល់ការលះបង់ជីវិតរបស់គ្រូពេទ្យផងដែរ។ វេជ្ជបណ្ឌិត លី វិនលាំង ដែលព្រមានពីការរាលដាលវីរុសនេះមុនគេ ក៏ជាប់ឈ្មោះក្នុងបញ្ជីពេទ្យជាវីរបុរសផងដែរ។
ដ្បិតជាប្រទេសរងគ្រោះមុនគេក្ដី ករណីឆ្លងនៅទូទាំងចិនមានចំនួនជាង៨ម៉ឺននាក់ប៉ុណ្ណោះ ហើយស្លាប់ជាងបីពាន់បីរយនាក់ ខណៈអ្នកសះស្បើយមានដល់ជាង៧ម៉ឺននាក់។ វិធានការម៉ឺងម៉ាត់ និងដាច់ខាតរបស់អាជ្ញាធរចិន ពិសេសការបិទវូហាន និងខេត្តហ៊ូប៉ីបានរួមចំណែកច្រើនក្នុងការទប់ស្កាត់ការរាលដាលវីរុស ប៉ុន្តែនៅជុំវិញពិភពលោក COVID-19 បែរជាអុកឡុកយ៉ាងរហ័សបំផុតដែលធ្វើឲ្យមានករណីឆ្លង និងស្លាប់យ៉ាងច្រើន។
ទូទាំងពិភពលោក ករណីឆ្លង COVID-19 មានលើសមួយលាននាក់ និងស្លាប់ជិត៦ម៉ឺននាក់។ អាមេរិកជាប្រទេសមានករណីឆ្លងច្រើនជាងគេ មានដល់ទៅជាង២៧ម៉ឺននាក់។ នៅអឺរ៉ុប អ៊ីតាលី អេស្ប៉ាញ បារាំង អាល្លឺម៉ង់ និងអង់គ្លេស ជាប្រទេសរងគ្រោះធ្ងន់។ អ៊ីរ៉ង់ និងកូរ៉េខាងត្បូងដែលជាប្រទេសមានករណីឆ្លងច្រើនដែរនោះ មានស្ថានភាពធូរស្រាលខ្លាំង៕
© រក្សាសិទ្ធិដោយ thmeythmey.com